Lesal yuj scꞌanchaj scolval Dios dꞌa oval
Sbꞌit jun tic vin̈aj David.
20
Mamin rey, yabꞌocabꞌ Jehová co Diosal a on̈ yin̈til on̈ vin̈aj Jacob a lesalvi. Aocabꞌ tzach colani ayic ayach och dꞌa ilcꞌolal.2 Yacꞌocabꞌcot scolval dꞌayach masanto dꞌa stemplo dꞌa Sion.
3 Snaocabꞌcot masanil ofrenda ix acꞌaꞌ. Schaocabꞌ scꞌool a silabꞌ tza n̈ustzꞌaoc.
4 Aocabꞌ ol acꞌan elcꞌoch icha a gana yedꞌ masanil tastac nabꞌil uuj.
5 Ol el cav yuj tzalajcꞌolal ayic ol acꞌan ganar ebꞌ ajcꞌool. Ol quicꞌchaan̈ co bandera yuj quicꞌanchaan̈ co Diosal. Aocabꞌ Jehová tzꞌacꞌan masanil tas cꞌanbꞌil uuj.
6 Cojtacxo ticnaic to a Jehová ol colan vin̈ co reyal sicꞌbꞌilel yuuj. Masanto dꞌa satchaan̈ to an̈ej ay yicoꞌ, ol tacꞌvoccot dꞌay. Yuj spoder Jehová chiꞌ ol yacꞌ ganar nivac oval vin̈ co reyal.
7 Ay ebꞌ tzꞌacꞌanoch scarruaje yic oval yipoc scꞌool, ay pax juntzan̈xo ebꞌ, a nocꞌ schej ebꞌ syacꞌoch yipoc scꞌool. A on̈xo pax tic, a Jehová co Diosal scacꞌoch yipoc co cꞌool.
8 A ebꞌ chiꞌ spax yip yoc ebꞌ, stelvi ebꞌ, a on̈xo pax tic jun, tecꞌtecꞌ caji, lin̈ann̈ej on̈ qꞌuei.
9 Mamin Jehová, col vin̈ co reyal. Tacꞌvan̈ dꞌayon̈ ayic tzach cavtani.