A jun bꞌit yujto ix lajvi oval
Sbꞌit jun tic vin̈aj David.
21
Mamin Jehová, a in rey in tic, tzin tzalaji, yujto syal uuj smasanil. Yelxo val tzin te tzalaji, yujto uuj val ix vacꞌ ganar.2 Ix a bꞌo tas snibꞌej in cꞌool, maj a tenecꞌlaj tas ix in cꞌanaꞌ.
3 Te nivan vachꞌil ix acꞌ dꞌayin, ix acꞌanqꞌue jun corona oro dꞌa in jolom.
4 Ix in cꞌan dꞌayach to tzacꞌ najatbꞌoc in qꞌuinal, a achxo ix acꞌ dꞌayin.
5 Te bꞌinajnac in yuj a colval. Uuj val syal vuuj, ay pax in tziquiquial.
6 Man̈ jantacoc a vachꞌcꞌolal ix acꞌ dꞌayin dꞌa masanil tiempo. Ste tzalaj in cꞌool dꞌa ichan̈.
7 Mamin Jehová, ecꞌal ach dꞌa yibꞌan̈ masanil, yujto a a vachꞌcꞌolal ayoch yipoc in cꞌool, yuj chiꞌ malaj bꞌaqꞌuin̈ ol in acꞌjoc ganar.
8 Mamin rey, ol a yam masanil ebꞌ ayoch ajcꞌolal dꞌayach, aton ebꞌ malaj sgana tzach yilaꞌ.
9 Ayic ol a chꞌoxan a bꞌa dꞌa scal ebꞌ, ol a satancanel ebꞌ, icha val tzꞌaj junoc tas slajviel yuj cꞌacꞌ. A Jehová ol satanel ebꞌ yedꞌ yoval scꞌool, axo cꞌacꞌ ol acꞌan lajvoquel ebꞌ.
10 A yuninal ebꞌ ajcꞌool chiꞌ yedꞌ ebꞌ yin̈tilal ebꞌ, ol a satcanel ebꞌ dꞌa scal anima dꞌa sat luum tic.
11 Vachꞌchom ix snibꞌej ebꞌ ix ach yixtej, ix say val modo ebꞌ tas tzꞌaj ach yacꞌan ganar, palta maj yal-laj yuj ebꞌ,
12 yujto a ach tic ix a pechcanbꞌat ebꞌ ayic ix och ijan a jul-labꞌ dꞌa ebꞌ.
13 Mamin Jehová, ach icꞌjocabꞌchaan̈ yujto masanil syal uuj. Ol co bꞌitej ipalil.