Av yuj ilcꞌolal yedꞌ bꞌit dꞌa aloj vachꞌ lolonel
Sbꞌit jun tic vin̈aj David. Sbꞌitej jun bꞌit tic vin̈ cuchbꞌum dꞌa bꞌit yedꞌ sjajil jun bꞌit scuchan nocꞌ cꞌultaquil chej dꞌa qꞌuin̈ibꞌalil.
22
Ach in Diosal, ach in Diosal, ¿tas val yuj tzin actejcani? ¿tas val yuj max in a coloꞌ ayic tzꞌel vav dꞌa scal in yaelal?2 Ach in Diosal, cꞌual dꞌacꞌval vavaj dꞌayach, palta max ach tacꞌvilaj dꞌayin, man̈xa bꞌaj syal vicꞌan vip.
3 A achxo pax jun, a achxon̈ejochi, tzach sbꞌitej ebꞌ vetisraelal.
4-5 A ebꞌ co mam quicham, yacꞌnac ach och ebꞌ yipoc scꞌool, yalnac sbꞌa ebꞌ dꞌayach, yuj chiꞌ a colnaccanel ebꞌ. Yacꞌannac ach och ebꞌ dꞌa scꞌool, yuj chiꞌ maj qꞌuixvoquel-laj ebꞌ.
6 A inxo jun, man̈xo in animaoc svabꞌi, icha val junoc nocꞌ aꞌay vaj svabꞌi. Tzebꞌajtac in yilanoch ebꞌ vetanimail, paticabꞌil in caneli.
7 A ebꞌ tzin ilani, sbꞌuchvaj ebꞌ dꞌayin, syedꞌtej in sat ebꞌ, syacꞌan ibꞌxoc sjolom ebꞌ.
8 Syalan ebꞌ: A jun vin̈ tic, a Jehová ix yacꞌoch vin̈ yipoc scꞌool yalani, yuj chiꞌ coljocabꞌel vin̈ yuj Jehová chiꞌ. Tato stzalaj scꞌol Dios yedꞌ vin̈, acꞌjocabꞌ el vin̈ dꞌa libre yuuj, xchi ebꞌ.
9 Yel toni, a ach ix in acꞌ aljoc. Ayic vanto in chuni dꞌa in nun, ix in a tan̈vej.
10 Atax ix in alji ix in ochcan dꞌa yol a cꞌabꞌ. Atax ay in ecꞌ dꞌa yol scꞌool in nun, in Diosal achtaxoni.
11 Yuj chiꞌ jun, man̈ a bꞌesel a bꞌa dꞌayin. Ay in och dꞌa nivac yaelal, malaj pax mach tzꞌoch vedꞌoc.
12 Toxo ix oymaj ebꞌ ajcꞌolal dꞌa in patic, icha val juntzan̈ oval vacax dꞌa yol yic Basán, icha val chiꞌ ebꞌ.
13 Toxon̈ej sjalali sjaj ebꞌ icha val junoc nocꞌ choj. Sjac stiꞌ ebꞌ, sjavi jucnaj ebꞌ dꞌayin.
14 Van yelcan vip, icha val tzꞌaj stobꞌbꞌat a aꞌ. Toxo ix yactej sbꞌa in bꞌaquil, a val in pixan, toxo ix ulaxbꞌat dꞌa yol in cꞌool icha val nocꞌ chaqꞌuibꞌ.
15 Toxo ix tacji yol in jaj, icha val junoc taquin̈ luum. Toxo ix qꞌue lotzan vacꞌ stacji, ix in acꞌanem dꞌa scal pococ icha val junoc chamnac.
16 Jun val n̈ilan̈ ebꞌ chuc ix och bꞌuyan dꞌayin icha val nocꞌ tzꞌiꞌ, ix yol in cꞌabꞌ ebꞌ yedꞌ voc.
17 Syal in bꞌisan masanil in bꞌaquil. Yacbꞌan van vabꞌan syail chiꞌ, axo ebꞌ chuc chiꞌ, qꞌuelann̈ej och ebꞌ dꞌayin.
18 A in pichul, ix spuquecꞌ ebꞌ dꞌa spatic. Axo dꞌa in pichul jucan, ix yacꞌ suerte ebꞌ.
19 A achxo Mamin Jehová, Vipumal aji. Man̈ ach najatbꞌocbꞌat dꞌayin. Colin, cotan̈ elan̈chamel dꞌayin.
20 Colin, man̈ in a cha xicjocchamoc, man̈ in a cha smilcham ebꞌ anima icha nocꞌ tzꞌiꞌ.
21 Colinel dꞌa stiꞌ juntzan̈ ebꞌ icha nocꞌ choj chiꞌ, colinel dꞌa schꞌaac juntzan̈ icha val nocꞌ cꞌultaquil vacax chiꞌ.
22 Ol valanel abꞌixal dꞌa ebꞌ vetchon̈abꞌ. Ayic ol smolbꞌan sbꞌa ebꞌ, ol ach in bꞌitej dꞌa scal ebꞌ, ol valan icha tic:
23 Mach on̈ ay yelcꞌoch Jehová dꞌa co sat, calec vachꞌ lolonel dꞌay. Bꞌinajnacocabꞌ cuuj masanil on̈ yin̈tilal on̈ vin̈aj Jacob. Masanil on̈ yin̈tilal on̈ Israel, caqꞌuequem co bꞌa dꞌay.
24 A Jehová maj yactejcanlaj ebꞌ ayoch syaelal. Man̈ ton̈ejoc ix yilochi, maj scꞌubꞌejel-laj sbꞌa. Ayic ix scꞌanan scolval ebꞌ, ix scꞌanabꞌajej Jehová chiꞌ yabꞌani, xin cham dꞌa ebꞌ.
25 Mamin Jehová, ol ach in bꞌitej dꞌa yichan̈ junoc snivan molchajelal ebꞌ a chon̈abꞌ yedꞌ dꞌa yichan̈ ebꞌ tzach xajanani. Ol vaqꞌuelcꞌoch in tiꞌ ix vacꞌ dꞌayach.
26 Ol va ebꞌ mebꞌaꞌ, ol bꞌudꞌjoccan scꞌool ebꞌ. Ol och ebꞌ ejmelal dꞌa Jehová, ol yal vachꞌ lolonel ebꞌ dꞌay, pitzann̈ej ebꞌ dꞌa masanil tiempo.
27 Masanil juntzan̈ chꞌoc nacional yedꞌ yin̈tilal cajan dꞌa slajvubꞌcꞌoch sat luum tic, ol nachajcot Jehová yuj ebꞌ, ol ja ebꞌ dꞌay, ol em cuman ebꞌ dꞌa yichan̈.
28 Yujto a Jehová ay yic masanil opisio, a Yajal yaj dꞌa masanil nación dꞌa yolyibꞌan̈qꞌuinal tic.
29 Masanil ebꞌ bꞌeyum ol va ebꞌ, ol yacꞌanem sbꞌa ebꞌ ejmelal dꞌa Jehová. Masanil ebꞌ chamelbꞌa yaji, ol em cuman ebꞌ dꞌa yichan̈ yujto malaj mach syal scolan sbꞌa dꞌa chamel.
30 A ebꞌ ichiquinabꞌil dꞌa yic bꞌaqꞌuin̈, ol yaqꞌuem sbꞌa ebꞌ dꞌa Jehová. Ol alchajel yabꞌixal vin̈ Yajal dꞌa ebꞌ anima toto ol aljoc.
31 A yabꞌixal stojolal yedꞌ svachꞌil tas sbꞌonac, ol alchaj dꞌa ebꞌ toto ol aljoc chiꞌ.