2 Ichato a bꞌaj yax an̈ an̈cꞌultac tzacꞌ vicꞌ vip. Ichato a dꞌa a aꞌ malali sbꞌeyi, ataꞌ tzin icꞌbꞌati.

3 Tzacꞌan vip dꞌa junjun cꞌu, tzin icꞌanbꞌat dꞌa yoltac bꞌe vachꞌ, icha yaj alannaccani.

4 Mamin, vachꞌchom tzin ecꞌ dꞌa chꞌolquixtac bꞌaj te qꞌuicꞌqꞌuinal, max in xivlaj yuj junoc tas ay smay, yujto ayach ecꞌ vedꞌoc. Icha junoc vin̈ tan̈vum calnel yedꞌnac teꞌ scꞌococh yedꞌ pax jun teꞌ ay schꞌocal, icha chiꞌ tzutej in a tan̈vani, yuj chiꞌ max in xivlaj.

5 Tza bꞌo in vael dꞌa yichan̈ ebꞌ vajcꞌool. Tzacꞌqꞌue aceite dꞌa in jolom, tzacꞌan bꞌudꞌjoc in vaso masanto tzꞌel malnaj dꞌa stiꞌ.

6 A a vachꞌcꞌolal yedꞌ bꞌaj tzin a xajanej ayn̈ejecꞌ vedꞌoc yacbꞌan pitzan in. Mamin Jehová, ol in aj cajan bꞌaj ayach dꞌa masanil tiempo.