2 Yujto a ix bꞌoanem yich lum luum tic dꞌa yich aꞌ mar yedꞌ dꞌa yich aꞌ nivac aꞌ.

3 ¿Mach ebꞌ syal sqꞌuecꞌoch dꞌa jun tzalan to yic Jehová? ¿Mach ebꞌ syal yajecꞌ bꞌaj syal sbꞌa ebꞌ anima dꞌa Jehová chiꞌ?

4 Aton ebꞌ tic syal sqꞌuecꞌochi: Ebꞌ malaj chucal scꞌulej, ebꞌ te vachꞌ spensar, ebꞌ max yaqꞌuem sbꞌa dꞌa juntzan̈ comon dios, ebꞌ max scomon aqꞌuej stiꞌ yuj yacꞌan musansatil junocxo anima.

5 A Jehová Dios Scolumal ebꞌ, a tzꞌacꞌan vachꞌilal dꞌa ebꞌ. Syacꞌanpax spac dꞌa ebꞌ icha smojal yuj svachꞌil ebꞌ chiꞌ.

6 Icha chiꞌ sbꞌeybꞌal ebꞌ sgana yoch dꞌa yichan̈ Dios Cajalil a on̈ yin̈tilal on̈ can Jacob.

7 Ex aj Jerusalén, jaquec jun snivan puertail e chon̈abꞌ aytaxon dꞌa pecaꞌ. Jaquec teꞌ sicꞌlabꞌil yic vachꞌ tze cha val jun Rey dꞌa tzalajcꞌolal, aton jun Te Bꞌinajnac.

8 ¿Mach jun Rey Te Bꞌinajnac chiꞌ? Aton Jehová, te ay yip, te ay spoder. A Jehová syacꞌn̈ej ganar oval.

9 Ex aj Jerusalén, jaquec jun snivan puertail e chon̈abꞌ aytaxon dꞌa pecaꞌ. Jaquec teꞌ sicꞌlabꞌil yic vachꞌ tze cha val jun Rey dꞌa tzalajcꞌolal, aton jun Te Bꞌinajnac.