Scꞌan scolval Dios vin̈aj David
Sbꞌit jun tic vin̈aj David.
25
Mamin Jehová, tic val sval in bꞌa dꞌayach.2 Ach in Diosal, a achn̈ej tzach vacꞌoch yipoc in cꞌool. Man̈ in actejcan dꞌa scal nivac qꞌuixvelal. Man̈ in a cha yacꞌ ganar ebꞌ ajcꞌool yajoch dꞌayin yic max tzalaj ebꞌ in stzetzani.
3 Vojtac val to a masanil ebꞌ tzach acꞌanoch yipoc scꞌool, man̈ ol qꞌuixvoquel-laj ebꞌ. A ebꞌ schichon scꞌol dꞌayach dꞌa nabꞌan̈ej, qꞌuixvocabꞌel ebꞌ.
4 Mamin Jehová, chꞌox a bꞌe dꞌayin. Dꞌa juntzan̈ a bꞌe chiꞌ tzin icꞌ bꞌeyoc.
5 Cꞌaybꞌej in dꞌa a lolonel te yel, yic vachꞌ tzin bꞌey dꞌa vachꞌil, yujto in Diosal ach, in Columal ach. A achn̈ej tzach vacꞌoch yipoc in cꞌool dꞌa masanil tiempo.
6 Mamin Jehová, nacot a chamcꞌolal yedꞌ a vachꞌcꞌolal, jun toxonton ix acꞌ quilaꞌ.
7 Axo pax juntzan̈ in mul jun, man̈xo a nacoti. Man̈xoocabꞌ a nacot in chucal dꞌa yictax ix vacꞌan quelemal. Mamin, tzin a nacot yedꞌ a nivan chamcꞌolal yedꞌ a vachꞌcꞌolal.
8 Mamin Jehová, vachꞌ ach toni, tojol ach toni. Yuj chiꞌ tza tojolbꞌitej sbꞌeybꞌal ebꞌ scꞌulan chucal.
9 Tza chꞌoxan pax ebꞌ emnaquil dꞌa sbꞌeal tojolal, aton bꞌeybꞌal tza nibꞌej.
10 Yuj a vachꞌcꞌolal, yujto tza cꞌanabꞌajej pax tas tzalaꞌ, yuj chiꞌ tza cuchbꞌej ebꞌ scꞌanabꞌajan a checnabꞌil icha syal a trato.
11 Mamin Jehová, te nivan in chucal. Acꞌ in nivancꞌolal icha val ix utej alani.
12 A mach tzach cꞌanabꞌajani, tza cꞌaybꞌej ebꞌ. Dꞌa jun bꞌe vachꞌ tzicꞌbꞌat ebꞌ.
13 Toxonton tzicꞌchaan̈ ebꞌ. A ebꞌ yuninal ebꞌ ol icancan lum luum tic.
14 A ebꞌ ay elcꞌoch dꞌa sat, aton ebꞌ ay xivcꞌolal dꞌayach, tzacꞌ razón dꞌa ebꞌ, tzacꞌan pax elcꞌoch a trato dꞌa ebꞌ.
15 Mamin Jehová, an̈ej dꞌayach ayoch in pensar. A ach ol in a colel dꞌa chꞌan̈ yaal.
16 Mamin, ilincoti, ocꞌoc val a cꞌool dꞌayin. Ina to in chꞌocojil, te ay in och dꞌa ilcꞌolal.
17 Ix te nivanbꞌi vilcꞌolal tic, colinel dꞌa in somcꞌolal.
18 Ilincot dꞌa in cuscꞌolal yedꞌ dꞌa in yaelal, tzacꞌancan nivancꞌolal in chucal.
19 Il tonabꞌi, man̈ jantacoc ebꞌ ayoch ajcꞌolal dꞌayin, ste chichonoch scꞌol ebꞌ dꞌayin.
20 Tan̈vej in, man̈ in a cha chamoc, man̈ in a chabꞌat dꞌa nivac qꞌuixvelal, yujto a dꞌayach tzin col in bꞌa.
21 Comonoc tzin a coloꞌ, yujto vachꞌ in bꞌeybꞌal, malaj in mul. A ach ayachoch yipoc in cꞌool.
22 Ach in Diosal, colon̈canel a on̈ israel on̈ tic dꞌa co cuscꞌolal yuj masanil syaelal.