A slesal ebꞌ anima vachꞌ
Sbꞌit jun tic vin̈aj David.
26
Mamin Jehová, chꞌoxcaneli to malaj in mul, yujto an̈ej tas vachꞌ ayoch dꞌa in pensar in cꞌulani. Mamin, ayach och yipoc in cꞌool, malaj in chabꞌcꞌolal dꞌayach.2 Mamin, ilin, bꞌeytzitej in pensar yedꞌ tas tzin nibꞌej.
3 Yujto max bꞌatcanlaj a vachꞌcꞌolal satcꞌolal vuuj, tzach in cꞌanabꞌajejn̈ej.
4 Man̈ junn̈ejoclaj tzin ecꞌ yedꞌ ebꞌ ixtum anima. Malaj bꞌaj junn̈ej tzin ecꞌ yedꞌ ebꞌ chabꞌ sat.
5 Tzin yajcanel smolchajelal ebꞌ chuc chiꞌ. Val yel malaj bꞌaj vachꞌ vacꞌan yedꞌ ebꞌ tzꞌixtanbꞌat vachꞌ bꞌeybꞌal.
6 Tzin bꞌiquel in cꞌabꞌ yuj in chꞌoxaneli to malaj in chucal. Ichato chiꞌ bꞌian tzin ecꞌ oyoyoc dꞌa spatic yichan̈ altar,
7 svalan vachꞌ lolonel dꞌa bꞌital, svalanel masanil tas satubꞌtac tza bꞌoꞌo.
8 Mamin Jehová, tzin xajanej a templo bꞌaj cajan ach eqꞌui. Ataꞌ tzꞌalchajel snivanil elcꞌochi.
9 Man̈ iqꞌuel in qꞌuinal yedꞌ ebꞌ scꞌulan chucal. Man̈ in a satel yedꞌ ebꞌ milum anima,
10 yujto an̈ej chucal snibꞌej ebꞌ scꞌulej, bꞌecan scꞌol ebꞌ schaan qꞌuen tumin yic smontaji.
11 A inxo jun, tzin nibꞌej tzin bꞌeyn̈ej dꞌa in vachꞌilal, yuj chiꞌ colinel Mamin, ocꞌoc val a cꞌool dꞌayin,
12 yic tecꞌann̈ej vaj dꞌa bꞌeybꞌal vachꞌ. Mamin Jehová, ol val vachꞌ lolonel dꞌayach dꞌa scal ebꞌ molanecꞌ dꞌa ichan̈.