A Jehová tzꞌacꞌan saquilqꞌuinal dꞌayin
Sbꞌit jun tic vin̈aj David.
27
A Jehová tzꞌacꞌan saquilqꞌuinal dꞌayin, in Columal paxi. ¿Machto val bꞌaj syal in xivi? A tzin colani, yuj chiꞌ malaj bꞌaj tzin xivi.2 A ebꞌ chuc smol sbꞌa dꞌa in patic yic tzin satanel ebꞌ yalani, palta a ebꞌ ayoch ajcꞌolal chiꞌ dꞌayin, ol lajvoquel ebꞌ.
3 Vachꞌchom junoc bꞌulan soldado tzꞌoch oyan dꞌa in patic vichan̈, val yel, man̈ ol in xivlaj. Vachꞌchom sqꞌue vaan ebꞌ yacꞌ oval vedꞌoc, an̈ejaꞌ vacꞌanoch Dios yipoc in cꞌool.
4 Junn̈ej val tas tzin cꞌan dꞌa Jehová, aton jun tic tzin nibꞌej: To tzin ecꞌ dꞌa stemplo Dios yacbꞌan pitzan in yic svil snivanil yelcꞌoch Dios chiꞌ, svacꞌanpaxem in bꞌa dꞌay.
5 Ayic ol javoc yaelal dꞌa vibꞌan̈, a ol in cꞌubꞌaneloc. A dꞌa scajnubꞌ, ataꞌ ol in scꞌubꞌejeli. Ol in yicꞌqꞌue dꞌa yibꞌan̈ junoc qꞌueen yic tzin colchajcaneli.
6 Ichaton val chiꞌ ol aj in scolancanel dꞌa ebꞌ ajcꞌool oyanoch dꞌa in patic vichan̈. Dꞌa scal av yedꞌ tzalajcꞌolal ol vacꞌ in silabꞌ dꞌa Jehová dꞌa yol stemplo. Ol val vachꞌ lolonel dꞌa bꞌital dꞌay.
7 Mamin, a dꞌayach tzin avaji, cha abꞌ dꞌayin. Ocꞌoc val a cꞌool dꞌayin, tacꞌvan̈ dꞌayin.
8 Mamin Jehová, a in pensar ix alan dꞌayin to tzin nitzcot in bꞌa dꞌa a tzꞌey. Yuj chiꞌ svacꞌ vip in nitzanoch in bꞌa dꞌa a tzꞌey chiꞌ.
9 Man̈ a cꞌubꞌejel a bꞌa dꞌayin. Man̈ in a chec meltzaj yedꞌ yoval a cꞌool. A achtaxon tzin a coloꞌ. Ach in Diosal in Columal ach, man̈ in actejcan in chꞌocoj.
10 Mamin Jehová, vachꞌchom tzin yactejcan ebꞌ in mam in nun, palta a ach ol in a tan̈vej.
11 Mamin, chꞌox a bꞌe dꞌayin, icꞌ in bꞌat dꞌa yol bꞌe tojol, yuj ebꞌ ajcꞌool snibꞌan in yacꞌan telvoc.
12 Man̈ in acꞌcanoch dꞌa yol scꞌabꞌ ebꞌ ayoch ajcꞌolal dꞌayin. Sqꞌue vaan ebꞌ dꞌa in patic, syesan in muloc ebꞌ. Sgana ebꞌ tzin yacꞌ chamoc.
13 Mamin Jehová, svacꞌoch dꞌa in cꞌool to ol a chꞌox a vachꞌcꞌolal dꞌayin yacbꞌan pitzan into, tato maay, toxom ix pax vip naic.
14 Ex vetchon̈abꞌ, aqꞌuecoch Jehová yipoc e cꞌool. Tecꞌtecꞌ tzeyutej e bꞌa, man̈ eyacꞌ chabꞌax e cꞌool. Val yel, aqꞌuecn̈ejoch Jehová yipoc e cꞌool.