Syabꞌ Jehová ayic scalan co bꞌa dꞌay
Sbꞌit jun tic vin̈aj David.
28
Mamin Jehová, an̈ej dꞌayach sval in bꞌa, icha n̈aqꞌueen aj dꞌayin, man̈ ach bꞌat mican dꞌayin. Tato max ach colvaj dꞌayin, aton val in bꞌat dꞌa scal ebꞌ chamnac chiꞌ bꞌian.2 Mamin, snibꞌej in cꞌool tzabꞌi ayic svalan in bꞌa dꞌayach. Svicꞌqꞌue in cabꞌ dꞌa yol a templo, tzin cꞌanan a colval.
3 Man̈ acꞌ in yaelal icha tzutej ebꞌ scꞌulan chucal, aton ebꞌ stzꞌacan yal vachꞌ lolonel dꞌa ebꞌ yetanimail, palta an̈ej chucal sna ebꞌ dꞌa spatic ebꞌ anima chiꞌ.
4 Acꞌ spac dꞌa ebꞌ, icha syal tastac scꞌulej ebꞌ, icha syal tas chucal scꞌulej ebꞌ, ichato chiꞌ bꞌian, tzacꞌanoch syaelal ebꞌ.
5 Malaj yelcꞌoch juntzan̈ tastac ix a bꞌo dꞌa yol sat ebꞌ. A ebꞌ chiꞌ ol a satcanel ebꞌ, man̈xo ol icꞌchajqꞌue vaan ebꞌ.
6 Alchajocabꞌ vachꞌ lolonel dꞌa Jehová, yujto ix yabꞌ tas ix val dꞌa scal in yaelal.
7 A Jehová Vipumal, aꞌ tzin colan icha junoc qꞌuen qꞌueen tzꞌoch ven̈uloc. A svacꞌoch yipoc in cꞌool, tzꞌochn̈ej vedꞌoc, yuj chiꞌ man̈ jantacoc stzalaj in cꞌool. Tzin bꞌitani, svacꞌan pax yuj diosal dꞌay.
8 A Jehová ayoch yipumaloc ebꞌ schon̈abꞌ, scolvajpax dꞌayin, to sreyal in ebꞌ, sicꞌbꞌil in el yuuj.
9 Mamin Jehová, colcanel a chon̈abꞌ, acꞌcot a vachꞌcꞌolal dꞌa yibꞌan̈ ebꞌ ictaxoni. Tan̈vej ebꞌ dꞌa masanil tiempo.