A spoder yol sjaj Jehová
Sbꞌit jun tic vin̈aj David.
29
Ex aj satchaan̈, alec vachꞌ lolonel dꞌa Jehová. Alec vachꞌ lolonel dꞌay to syal yuj smasanil, te bꞌinajnac.2 Alec vachꞌ lolonel dꞌa Jehová icha dꞌa smojal. Aqꞌuequem e bꞌa dꞌay dꞌa stemplo te vachꞌ yilji.
3 A Jehová Dios te nivan yelcꞌochi, tzꞌabꞌchaj sjaj dꞌa yibꞌan̈ aꞌ mar. A tzꞌacꞌan cꞌan̈ cꞌu, a tzꞌacꞌan mandar dꞌa yibꞌan̈ aꞌ oval mar chiꞌ.
4 A sjaj Jehová tzꞌabꞌchaji, man̈ jantacoc spoder. Yuj sjaj chiꞌ scheclaji to te nivan yelcꞌochi.
5 Yuj yav Jehová sjecchajcanbꞌat teꞌ cꞌuteꞌ. Yuj Jehová spojcan juntzan̈ teꞌ nivac cꞌuteꞌ dꞌa Líbano.
6 A juntzan̈ lum nivac vitz yic Líbano yedꞌ lum yic Sirión, tzꞌibꞌxi lum yuj Jehová. Sqꞌue bꞌachnaj lum vitz chiꞌ, icha sqꞌue chennaj junoc nocꞌ quelem vacax.
7 A yav Jehová, a tzꞌacꞌancot copnaj lebꞌlon.
8 A yav Jehová tzꞌacꞌan ibꞌxoc lum tzꞌinan luum. Aꞌ tzꞌacꞌan ibꞌxoc lum tzꞌinan luum yic Cades.
9 A yuj yav Jehová tzꞌel jequeljoc scꞌabꞌtac teꞌ ji, axon̈ej yibꞌ teꞌ scan dꞌa sat lum vitz. Axo dꞌa stemplo tzꞌalchaj vachꞌ lolonel dꞌay yuj ebꞌ anima smasanil.
10 A Jehová acꞌannac yajalil dꞌa jun aꞌ oval aꞌ mucvajum. Yajal yaj dꞌa masanil tiempo.
11 A tzꞌacꞌan yip ebꞌ schon̈abꞌ. Yuj svachꞌil scꞌool Jehová, syacꞌ juncꞌolal dꞌayon̈ a on̈ schon̈abꞌ on̈ tic.