Bꞌit yic acꞌoj yuj diosal dꞌa Jehová
Sbꞌitaj jun bꞌit tic ayic tzꞌoch yopisio jun templo. Sbꞌit jun tic vin̈aj David.
30
Mamin Jehová, tzach in bꞌitej yedꞌ in vachꞌ lolonel, yujto ix in a sicꞌqꞌue vaan dꞌa scal in nivan yaelal, maj in a cha bꞌuchjoc yuj ebꞌ ayoch ajcꞌolal dꞌayin.2 Mamin, in Diosal ach, ix in cꞌan a colval, ix acꞌan bꞌoxoc in cꞌool.
3 Mamin, a ach ton ix in a colel dꞌa chamel. Ix acꞌ in qꞌuinal, maj in a chabꞌatlaj dꞌa scal ebꞌ chamnac.
4 Bꞌitanan̈ec dꞌa Jehová, mach ex to schon̈abꞌ ex, bꞌitejec yujto an̈ej Te Nivan Yelcꞌochi.
5 Yujto junn̈ej rato ay yoval scꞌool, axo svachꞌcꞌolal ayn̈ejecꞌ dꞌa masanil tiempo. Vachꞌchom tzon̈ ocꞌ dꞌacꞌvalil, axo yic sqꞌuin̈ibꞌi sja co tzalajcꞌolal.
6 Ayic te vachꞌ vaji, ix in naꞌ icha tic: Malaj bꞌaqꞌuin̈ ol in telvoc yuj junoc tas, xin chi.
7 Mamin Jehová, yuj val svachꞌil a cꞌool, ix in acꞌcanoch bꞌaj malaj tas tzin icꞌani. Palta ayic ix icꞌanel a bꞌa dꞌayin, ix somchajcanel in cꞌool.
8 Mamin, ix ach vavtej, ix valan in bꞌa dꞌayach:
9 ¿Tasto a ganar dꞌayin, qꞌuinaloc tato tzin chami, tzin mucchaji? Man̈xo ol yal-laj ach sbꞌitan ebꞌ toxo ix och pococal. Man̈ ol yal pax laj yalan vachꞌ lolonel ebꞌ dꞌayach yuj svachꞌil tas ix a bꞌoꞌo, xin chi.
10 Mamin Jehová, abꞌ val tas svalaꞌ, ocꞌoc val a cꞌool dꞌayin. Mamin, ochan̈n̈ej vedꞌoc.
11 Ix acꞌan qꞌuexmaj in yaelal dꞌa tzalajcꞌolal. Ix icꞌanel in cuscꞌolal, ix acꞌancanoch cꞌapac pichul yic qꞌuin̈ in pichuloc.
12 Yuj val chiꞌ jun, ach Jehová in Diosal, max yal-laj vem numan. Tzin bꞌitan dꞌayach dꞌa aloj vachꞌ lolonel yedꞌ acꞌoj yuj diosal dꞌayach dꞌa masanil tiempo.