An̈ej Jehová ayoch yipoc in cꞌool
Sbꞌit jun tic vin̈aj David.
31
Mamin Jehová, an̈ej dꞌayach tzin col in bꞌa. Malajocabꞌ bꞌaqꞌuin̈ tzin a cha somchajeli. Colinel yuj a tojolal.2 Acꞌcot tzꞌeyan a chiquin dꞌayin, tzin a colan dꞌa elan̈chamel. Ochan̈ in n̈aqꞌueenoc bꞌaj ol in col in bꞌa.
3 Yujto in n̈aqꞌueen ach, in cuartel ach, yuj chiꞌ ochan̈ ven̈uloc. Icꞌ in bꞌeyoc yic man̈ ol ach alchaj chucal.
4 Colin dꞌa jun yaal ix em dꞌa vichan̈, yujto in Columal ach.
5 Mamin Jehová, ach in Diosal, svacꞌcanoch in bꞌa dꞌa yol a cꞌabꞌ. A ach tzin a colcaneli, to tzꞌelcꞌoch syal a lolonel.
6 Tzin chaquel ebꞌ anima syaqꞌuem sbꞌa dꞌa juntzan̈ comon dios malaj yelcꞌochi. A inxo Mamin Jehová, tzach vacꞌoch yipoc in cꞌool.
7 Tzin tzalaj val yuj a vachꞌcꞌolal. A ach ix iqꞌuel in cuscꞌolal, ojtac pax in yaelal.
8 Maj in acꞌcanoch dꞌa yol scꞌabꞌ ebꞌ vajcꞌool. Te levan bꞌaj ix in can uuj.
9 Mamin Jehová, ocꞌocabꞌ val a cꞌool dꞌayin, yujto ay in och dꞌa ilcꞌolal. Ix te chacbꞌi in sat voqꞌui, man̈xalaj yip in pixan yedꞌ in nivanil.
10 A in qꞌuinal slajviem dꞌa scal in yaelal. A vabꞌilal slajviel yuj in cꞌacvi. A cuscꞌolal tzꞌicꞌanel vip, cꞌununi yel yip in nivanil tic svabꞌi.
11 Tzetzabꞌil in yuj ebꞌ ayoch ajcꞌolal dꞌayin, bꞌuchbꞌil in yuj ebꞌ cajan dꞌa in lacꞌanil. Yajbꞌil in canel yuj ebꞌ ojtannac in. A ebꞌ tzin ilan dꞌa yoltac bꞌe, tzꞌel ebꞌ dꞌayin.
12 Juneln̈ej ix in bꞌatcan satcꞌolal yuj ebꞌ. Icha val to man̈xo in animaoc svabꞌi, icha val junoc lum xalu pojnac, icha chiꞌ vaji.
13 Svabꞌ sajson ebꞌ vetchon̈abꞌ dꞌa in patic. Yalxon̈ej bꞌajtiil, ay xivcꞌolal sja dꞌayin. Junlajanxon̈ej snaan ebꞌ dꞌa in patic. Nanon yecꞌ scꞌool ebꞌ tas syutej in yacꞌanchamoc.
14 A inxo jun Mamin Jehová, a achn̈ej ayachoch yipoc in cꞌool. Toxonton svalaꞌ: A ach val tic, in Diosal ach, xin chi.
15 Yol val a cꞌabꞌ ay in qꞌuinal. Colinel dꞌa ebꞌ ayoch ajcꞌolal dꞌayin, aton ebꞌ tzacꞌanoch vuuj.
16 Il in val och a in a checabꞌ in tic yuj svachꞌil a cꞌool, tzin a colanel yuj a vachꞌcꞌolal.
17 Mamin, van valan in bꞌa dꞌayach. Man̈ in acꞌbꞌat dꞌa nivac qꞌuixvelal. A ebꞌ chuc tzacꞌcanbꞌat dꞌa nivac qꞌuixvelal chiꞌ, tzacꞌancanbꞌat ebꞌ bꞌaj tzꞌinan, bꞌaj ay ebꞌ chamnac.
18 A ebꞌ snaanqꞌue lolonel, numcꞌajocabꞌ ebꞌ, yujto syal lolonel ebꞌ ya dꞌa ebꞌ anima vachꞌ. Spatiquejel ebꞌ vachꞌ spensar ebꞌ, sbꞌuchvaj ebꞌ dꞌa ebꞌ vachꞌ chiꞌ.
19 Yel ton val nivan a vachꞌcꞌolal tzacꞌ dꞌa ebꞌ tzach icꞌanchaan̈. Dꞌa yichan̈ ebꞌ anima tzacꞌ a vachꞌilal dꞌa ebꞌ tzach acꞌanoch yipoc scꞌool.
20 A dꞌa a tzꞌey tza cꞌubꞌejel ebꞌ dꞌa chucal sna ebꞌ puch vinac. A bꞌaj ay ach tza colel ebꞌ dꞌa schucal lolonel ebꞌ ajcꞌolal yajoch dꞌa ebꞌ.
21 Alchajocabꞌ vachꞌ lolonel dꞌayach Mamin Jehová, yujto satubꞌtac tas ix a bꞌo dꞌayin yuj a vachꞌcꞌolal, ayic oyanoch ebꞌ ajcꞌool dꞌa in patic vichan̈.
22 A val yic man̈xo animaoc in cꞌool, ix in naꞌ to ix in icꞌcanel dꞌa ichan̈, axo val yic ix in cꞌanan a colval, ix abꞌ in tevi.
23 Xajanejec Jehová, masanil ex yiquexxo yujto aꞌ stan̈van ebꞌ scꞌanabꞌajani, palta tzꞌacan syutej yacꞌan yaelal dꞌa yibꞌan̈ ebꞌ syicꞌchaan̈ sbꞌa.
24 Tecꞌbꞌejec e bꞌa mach ex tzeyacꞌoch Jehová yipoc e cꞌool.