Vachꞌ yic mach sucbꞌil sat schucal
Jun bꞌit tzon̈ cꞌaybꞌani. Sbꞌit jun tic vin̈aj David.
32
Te vachꞌ yic ebꞌ tzꞌacꞌchaj lajvoc smul, succhaj sat schucal ebꞌ.2 Te vachꞌ yic ebꞌ syal Jehová to man̈xalaj smul ebꞌ dꞌa yichan̈, aton ebꞌ maxtzac cꞌubꞌanel smul dꞌa ebꞌ yetanimail.
3 Ayic manto valqꞌuetalaj in mul, yelxo val ijan ix lajviel in nivanil ix vabꞌi, yujto ix in te cꞌacvi.
4 Ach in Diosal, cꞌual dꞌacꞌval yelcꞌolal ix acꞌoch in yaelal. Icha val an̈ taquin̈ an̈cꞌultac stacjiel yuj varesma, ichinta ix vabꞌi.
5 Ichato chiꞌ ix valanqꞌueta in mul chiꞌ dꞌayach, malaj tas ix in cꞌubꞌejeli. Ix el val dꞌa in cꞌool valan in bꞌa dꞌayach. A achxo Mamin Jehová ix in acꞌ nivancꞌolal.
6 Yuj val chiꞌ jun, yalocabꞌ sbꞌa ebꞌ tzach cꞌanabꞌajani yacbꞌan tzato yalaꞌ. Vachꞌchom sja yaelal icha aꞌ elumaꞌ, palta max yamchajlaj ebꞌ yuuj.
7 A ach ay ach och ven̈uloc, a ach ol in a colel dꞌa yaelal. Tzach in bꞌitej yujto ix in a coleli.
8 Ix yal Jehová dꞌayin: Ol ach in cꞌaybꞌej dꞌa tas ol a cꞌulej. Ol in chꞌox dꞌayach bꞌajtil ol ach bꞌatoc, ol ach in tan̈vej.
9 Man̈ utej a bꞌa icha nocꞌ chej ma icha junoc nocꞌ mula, a juntzan̈ nocꞌ chiꞌ max nachajel-laj yuj nocꞌ. Yovalil syamchajoch vaan nocꞌ yedꞌ qꞌuen freno. Tato man̈ ichocta tzꞌutaj nocꞌ, max scꞌanabꞌajejlaj nocꞌ, xchi Jehová dꞌayin.
10 A ebꞌ chuc sbꞌeybꞌal, man̈ jantacoc yaelal ol cot dꞌa yibꞌan̈ ebꞌ. Axo ebꞌ ayoch Dios yipoc scꞌool, a svachꞌcꞌolal Dios chiꞌ ol moyanqꞌue ebꞌ.
11 Aqꞌuec tzalajbꞌoc e cꞌool dꞌa Jehová ex anima vachꞌ e pensar. Bꞌitanan̈ec dꞌa tzalajcꞌolal e masanil ex ayex och dꞌa stojolal.