A vachꞌ lolonel yedꞌ acꞌoj yuj diosal
33
Ex anima vachꞌ e pensar, bꞌitejec Jehová dꞌa tzalajcꞌolal. Yujto a ebꞌ anima tojol sbꞌeybꞌal, smojton val sbꞌitan ebꞌ dꞌa Jehová chiꞌ.2 Alec vachꞌ lolonel dꞌa Jehová yedꞌ teꞌ arpa. Bꞌitanan̈ec dꞌay yedꞌ salterio lajun̈eꞌ schꞌan̈al.
3 Bꞌitanan̈ec dꞌa Jehová yedꞌ acꞌ bꞌit. Vachꞌ tzeyutej e bꞌitan dꞌay dꞌa tzalajcꞌolal.
4 Yujto a slolonel Jehová yel toni. A tas sbꞌoꞌo, a schꞌoxaneli to syaqꞌuelcꞌoch tas syalaꞌ.
5 A Jehová, a tojolal yedꞌ vachꞌ bꞌeybꞌal snibꞌej. Schꞌoxel sbꞌa svachꞌcꞌolal dꞌa masanil yolyibꞌan̈qꞌuinal tic.
6 Ton̈ej ix yal Jehová, ix bꞌo satchaan̈ yedꞌ masanil tastac ay dꞌay.
7 Aꞌ ix molbꞌancan a aꞌ. A aꞌ mar ton̈ej malanecꞌ aꞌ dꞌa yedꞌtal yuuj.
8 Ayocabꞌ yelcꞌoch Jehová dꞌa masanil tastac ay dꞌa sat luum tic. E masanil cajan ex dꞌa yolyibꞌan̈qꞌuinal tic, ayocabꞌ e xivcꞌolal dꞌa Jehová.
9 Yujto aꞌ ix alani, ix bꞌo smasanil. Aꞌ ix alani, vachꞌ ix ajcan masanil tas.
10 A Jehová smacꞌan lajvoc spensar juntzan̈ chꞌoc nacional.
11 Axo tas snaꞌa, ayn̈ej ecꞌ dꞌa masanil tiempo.
12 Tzalajcꞌolal yic junoc nación to a Jehová ayoch sDiosaloc, to sicꞌbꞌilel yuuj yic tzꞌoch yicoc.
13 A dꞌa satchaan̈ qꞌuelanemta Jehová, syilanemta masanil anima.
14 A bꞌaj cajanecꞌ Jehová syilcot masanil ebꞌ cajan dꞌa sat luum tic.
15 Aꞌ ix bꞌoan spensar ebꞌ smasanil. An̈ejaꞌ pax smaclan yilaꞌ tas scꞌulej ebꞌ.
16 Man̈ yujoc to te nivan sbꞌisul soldado ol colchajel junoc yajal. Man̈ yujoc to te ay yip junoc soldado, ol colchajoc.
17 A nocꞌ chej, malaj yopisio nocꞌ scolan ebꞌ anima. Vachꞌchom te ay yip nocꞌ, palta max yal-laj scolvaj nocꞌ.
18 A Jehová qꞌuelanoch dꞌa ebꞌ ay xivcꞌolal dꞌay, aton ebꞌ ayoch svachꞌcꞌolal yipoc scꞌool.
19 Scoljicanel ebꞌ yuuj dꞌa chamel, tzꞌacꞌji va ebꞌ yuuj dꞌa stiempoal vejel.
20 A on̈ tic, a Jehová scacꞌoch yipoc co cꞌool. Aꞌ tzon̈ colani, tzon̈ stan̈van paxi.
21 Yuj chiꞌ stzalajbꞌi co cꞌool yuuj. Scacꞌanoch yipoc co cꞌool, yujto Axon̈ejochi.
22 Mamin Jehová, ayocabꞌoch a vachꞌcꞌolal dꞌayon̈, yujto tzach cacꞌoch yipoc co cꞌool.