Aloj vachꞌ lolonel yuj svachꞌcꞌolal Dios
Sbꞌit jun tic vin̈aj David ayic ix yacꞌanoch sbꞌa vin̈ quistalil dꞌa yichan̈ vin̈aj rey Abimelec, yuj chiꞌ ix pechjielta vin̈.
34
Svicꞌchaan̈ Jehová dꞌa masanil tiempo, svaln̈ej vachꞌ lolonel dꞌay.2 A dꞌay stzalaj in cꞌool. Abꞌec ex anima emnaquil, tzalajan̈ec.
3 Alequel yabꞌixal sbꞌinajnaquil Jehová vedꞌoc, junn̈ej scutej quicꞌanec chaan̈.
4 Ix in avaj dꞌa Jehová, ix tacꞌvi dꞌayin, ix yicꞌcanel masanil in xivcꞌolal.
5 A ebꞌ tzꞌacꞌanoch Jehová yipoc scꞌool, stzetzon sat ebꞌ yuj tzalajcꞌolal, malaj bꞌaj sqꞌuixvi ebꞌ.
6 Ix val in bꞌa dꞌa Jehová, vachꞌchom te malaj velcꞌochi, axo ix abꞌani, ix in scolanel dꞌa masanil vilcꞌolal.
7 A ebꞌ ay yelcꞌoch Jehová dꞌa sat, a yángel tzoymaj dꞌa spatic yichan̈ ebꞌ, axo scolchaj ebꞌ chiꞌ yuuj.
8 Acꞌlejec eyilaꞌ, ol eyilani to te ay svachꞌcꞌolal Jehová. Te vachꞌ yic ebꞌ scol sbꞌa dꞌa Jehová chiꞌ.
9 Mach ex yiquex Jehová, ayocabꞌ yelcꞌoch dꞌa e sat. Malaj tas ol yacꞌ palta dꞌa ebꞌ ay yelcꞌoch Dios dꞌay.
10 A nocꞌ choj, tzꞌel yip nocꞌ yuj vejel, axo pax ebꞌ syaqꞌuem sbꞌa dꞌa Jehová, malaj bꞌaqꞌuin̈ ol yacꞌ palta junoc tas vachꞌ dꞌa ebꞌ.
11 Ex unin, cotan̈ec, abꞌec tas svalaꞌ, ol ex in cꞌaybꞌej yic tzeyacꞌoch e pensar dꞌa Jehová.
12 Tato syal e cꞌol snajatbꞌi e qꞌuinal, e gana pax tzalajcꞌolal tzꞌecꞌ junjun cꞌu eyuuj,
13 man̈xo eyal chucal lolonel, man̈xo eyesej.
14 Iqꞌuequel e bꞌa dꞌa chucal, man̈xo eyacꞌ oval, axo vachꞌil tze cꞌulej, tze bꞌeybꞌalan juncꞌolal.
15 A Jehová stan̈van ebꞌ anima vachꞌ sbꞌeybꞌal, smaclan val yabꞌi ayic syalan sbꞌa ebꞌ dꞌay.
16 A Jehová, aycot yoval scꞌol dꞌa ebꞌ scꞌulan chucal yic satel ebꞌ, yic man̈xa mach ol naan ebꞌ.
17 Syabꞌ Jehová ayic syalan sbꞌa ebꞌ anima vachꞌ spensar dꞌay, scolchajcanel ebꞌ dꞌa masanil yilcꞌolal.
18 A Jehová ayecꞌ dꞌa stzꞌey ebꞌ anima man̈xo animaoc yedꞌnac syabꞌi, scolancanel ebꞌ somchajel scꞌool yuj cuselal.
19 A ebꞌ anima vachꞌ spensar, vachꞌchom tzijtum tas tzꞌicꞌan ebꞌ, axo Jehová scolanel ebꞌ dꞌa masanil juntzan̈ syaelal chiꞌ.
20 Aꞌ stan̈van ebꞌ, malaj junoc sbꞌaquil ebꞌ ol qꞌuichajoc.
21 Axo pax ebꞌ scꞌulan chucal jun, a yuj schucal ebꞌ chiꞌ ol chamoc. A ebꞌ schichon scꞌol dꞌa ebꞌ vachꞌ sbꞌeybꞌal, ol cotcan dꞌa yibꞌan̈ ebꞌ.
22 Axo Jehová ol colan ebꞌ schecabꞌ. A ebꞌ scol sbꞌa dꞌay, man̈ ol cotcanlaj dꞌa yibꞌan̈ ebꞌ.