Scꞌanchaj scolval Jehová
Sbꞌit jun tic vin̈aj David.
35
Mamin Jehová, telaj a bꞌa yedꞌ ebꞌ stelaj sbꞌa vedꞌoc, acꞌ oval yedꞌ ebꞌ tzꞌacꞌan oval vedꞌoc.2 Iqꞌuelta a yamcꞌabꞌ yic oval, tzul in a colani.
3 Iqꞌuelta a lanza tza macan sat ebꞌ tzin pechan bꞌeyecꞌoc. Al dꞌayin to in Columal ach.
4 A ebꞌ sgana in chami, somchajocabꞌbꞌat ebꞌ yuj qꞌuixvelal. A ebꞌ snibꞌej ay tas scot dꞌa vibꞌan̈, meltzajocabꞌbꞌat ebꞌ dꞌa spatic.
5 Ichocabꞌ smatzꞌil ixim trigo syicꞌbꞌat icꞌ, ichocabꞌ ta tzꞌaj ebꞌ. Pechjocabꞌbꞌat ebꞌ yuj ángel.
6 Qꞌuicꞌolinacocabꞌi, n̈ereriocabꞌ sbꞌe ebꞌ, axo ángel spechan ebꞌ.
7 Vachꞌchom malaj in mul, palta ix yaqꞌuem in yaalil ebꞌ. Malaj in mul, palta ix sjoy jun olan ebꞌ yic vachꞌ tzin bꞌat dꞌa yool snaan ebꞌ.
8 Yuj chiꞌ, mocabꞌ naanoc yuj ebꞌ ayic sjavi nivac yaelal dꞌa yibꞌan̈ ebꞌ. Canocabꞌ ebꞌ dꞌa syaalil ix yaqꞌuem chiꞌ. Bꞌatocabꞌcan ebꞌ dꞌa yol jun olan ix sbꞌo chiꞌ.
9 Ichato chiꞌ ol vacꞌan tzalajbꞌoc in cꞌol dꞌayach Jehová. Ol el lenaj ol vil yuj a colval.
10 Dꞌa smasanil in cꞌool ol val icha tic: Mamin Jehová, ¿machto val junoc icha ach tic? A ebꞌ mebꞌaꞌ yedꞌ ebꞌ ayoch dꞌa tzapan majanil, tza colel ebꞌ dꞌa yol scꞌabꞌ ebꞌ te ay yip, to syiqꞌuecꞌ ebꞌ tastac ay dꞌa ebꞌ, xin chama.
11 Scot ebꞌ testigo esum, axo tas man̈ vojtacoc scꞌanbꞌej ebꞌ dꞌayin.
12 A in vachꞌcꞌolal chuc ix yutej ebꞌ spactzitan dꞌayin, ix in stzuntzej cus ebꞌ.
13 A inxo, ayic yaꞌay ebꞌ, ix vacꞌoch pichul yic cuscꞌolal, maxtzac in valaj yuj cuscꞌolal, ya svabꞌi. Max vactejcanlaj in lesalvi dꞌa in pixan yuj ebꞌ.
14 Cusnac in cꞌool ix in bꞌeyeqꞌui, icha val to a yuj junoc vamigo, ma vucꞌtac, ma icha in nun tzin cus yuuj.
15 Ayic ix in telvi, ix qꞌue umnaj ebꞌ smasanil in stzetzani. Ichato chꞌoc animail in dꞌa ebꞌ, ichato man̈ in yojtacoc ebꞌ. Max yactejcanlaj ebꞌ in ste bꞌajani.
16 Te ya ix in ecꞌ yuj ebꞌ, ix in sbꞌuch ebꞌ, ix cot qꞌuelan ebꞌ dꞌayin yedꞌ schichoncꞌolal.
17 Mamin Jehová, ¿tom ton̈ej ol ach och qꞌuelan yuj jun tic? Colinel dꞌa yol scꞌabꞌ ebꞌ icha nocꞌ choj, tzꞌel yav, scot dꞌayin.
18 Ol valel yabꞌixal a vachꞌcꞌolal dꞌa yichan̈ ebꞌ tzijtumal anima molaneqꞌui. Ol val vachꞌ lolonel dꞌayach dꞌa yichan̈ ebꞌ a chon̈abꞌ.
19 Mocabꞌ tzalaj scꞌool ebꞌ ayoch ajcꞌolal dꞌayin. Mocabꞌ reprepan sat ebꞌ schichon scꞌol dꞌayin, vachꞌchom malaj in mul dꞌa ebꞌ.
20 Malaj sgana ebꞌ dꞌa juncꞌolal. Sgana ebꞌ snaqꞌue esal lolonel dꞌa spatic ebꞌ munil ayeqꞌui.
21 Te chaan̈ tzꞌel yav ebꞌ dꞌayin, syalan ebꞌ: Ix quil tas ix a cꞌulej chiꞌ, toxo ix quilaꞌ, xchi ebꞌ.
22 Mamin, ix il val. Acꞌ yovalil dꞌa ebꞌ, man̈ ach najatbꞌocbꞌati, man̈ ach el dꞌa in tzꞌey.
23 Mamin ach Vajal, in Diosal ach, cotan̈, colin, bꞌo yaj tas sval tic. Ochan̈ vedꞌoc.
24 Ach Jehová in Diosal ach, bꞌo yaj dꞌayin ato syal a tojolal, in gana to max in tzetzaj yuj ebꞌ.
25 Mocabꞌ yal ebꞌ dꞌayin icha tic: Ix elcꞌoch icha co gana. Juneln̈ej ix quixtejcanbꞌat vin̈, mocabꞌ xchioc ebꞌ.
26 A ebꞌ stzalaj yuj in yaelal, qꞌuixvocabꞌcan ebꞌ, somchajocabꞌel scꞌool ebꞌ. Qꞌuixvocabꞌel ebꞌ nivac vinac syutej sbꞌa dꞌa vichan̈.
27 Axo ebꞌ sgana to vachꞌ tzin elcꞌochi, tzalajocabꞌ scꞌool ebꞌ. Elocabꞌ yav ebꞌ yuj tzalajcꞌolal. Yalocabꞌ ebꞌ dꞌa masanil tiempo: A Jehová, te nivan ton yelcꞌochi, stzalaj val yuj svachꞌil jun schecabꞌ tic, xchiocabꞌ ebꞌ.
28 Mamin, ol valel a tojolal, ol valn̈ej vachꞌ lolonel dꞌayach dꞌa masanil tiempo.