A schucal anima yedꞌ svachꞌcꞌolal Dios
A vin̈ cuchbꞌum dꞌa bꞌit scuchbꞌan jun bꞌit syal yuj tas ol aj ebꞌ scꞌulan chucal. Sbꞌit jun tic vin̈aj David schecabꞌ Jehová.
36
A ebꞌ scꞌulan chucal, an̈ej chucal chiꞌ ayoch dꞌa spensar ebꞌ scꞌulani. Malaj jabꞌoc yelcꞌoch Dios dꞌa sat ebꞌ.2 Yujto syaloch sbꞌa ebꞌ vachꞌil, man̈ ojtacabꞌiloc smul ebꞌ chiꞌ snaani. Max snalaj ebꞌ yactejcan schucal chiꞌ.
3 An̈ej chucal lolonel syal ebꞌ, naumqꞌue lolonel ebꞌ. Syactejcan vachꞌ pensaril ebꞌ, max sbꞌolaj vachꞌil ebꞌ.
4 Ayic vaynac ebꞌ dꞌa sat schꞌat, toxon̈ej snanonecꞌ scꞌool ebꞌ scꞌulan chucal. Man̈ vachꞌoc sbꞌeybꞌal ebꞌ, max yal-laj scꞌol ebꞌ syiqꞌuel sbꞌa dꞌa chucal.
5 A achxo Mamin Jehová, te nivanxo pax a vachꞌcꞌolal, masanto dꞌa satchaan̈ sqꞌuecꞌochi, tzacꞌn̈ejelcꞌoch tas tzalaꞌ.
6 Ecꞌal a vachꞌilal dꞌa yichan̈ lum nivac vitz. A a tojolal, ecꞌal dꞌa sjulal yich aꞌ nivac mar. Mamin Jehová, ilbꞌil ebꞌ anima yedꞌ masanil nocꞌ nocꞌ uuj.
7 Ach Dios, satubꞌtacxon̈ej a vachꞌcꞌolal, yuj chiꞌ sco col co bꞌa dꞌayach, icha nocꞌ yunetac caxlan̈ tzꞌoch dꞌa yalan̈ snun.
8 Tzon̈ bꞌudꞌji yuj jun nivan vael tzacꞌ dꞌayon̈. A a aꞌ man̈xo jantacoc svachꞌil yucꞌji tzacꞌ cuqꞌuej.
9 Yujto a dꞌayach scot co qꞌuinal icha yaj sjaj a aꞌ. Yujn̈ej a saquilqꞌuinal ay co qꞌuinal.
10 A on̈ cojtac achxo, ayocabꞌ a vachꞌcꞌolal dꞌayon̈. A on̈ vachꞌ co pensar, colon̈caneli.
11 Man̈ a cha yacꞌ chucal ebꞌ syicꞌchaan̈ sbꞌa dꞌayin. Man̈ a cha in spech bꞌeyecꞌ ebꞌ scꞌulan chucal.
12 Ilecnabꞌ bꞌajtil ix telvi ebꞌ scꞌulan chucal. Ix telvi ebꞌ, man̈xa bꞌaqꞌuin̈ ol qꞌuex vaan ebꞌ.