Caqꞌuecoch Jehová yipoc co cꞌool
Sbꞌit jun tic vin̈aj David.
37
Mocabꞌ somchajel co cꞌool yuj ebꞌ scꞌulan chucal. Mocabꞌ co nibꞌejoch sbꞌeyumal ebꞌ.2 Yujto elan̈chamel ol satel ebꞌ, icha stacji an̈ ac sjochchajeli, ma icha stacjiel an̈ an̈cꞌultac.
3 Caqꞌuecoch Jehová yipoc co cꞌool, co bꞌoec tas vachꞌ. Con̈ canecn̈ej cajan dꞌa lum luum tic, ol on̈ acꞌjoc va dꞌa acꞌancꞌolal.
4 Caqꞌuec tzalajbꞌoc co cꞌool dꞌa Jehová, a ol acꞌan tas sco nibꞌej.
5 Scabꞌenejoch co bꞌa dꞌa yol scꞌabꞌ Jehová, scacꞌanoch yipoc co cꞌool, a ol colvaj quedꞌoc.
6 Axo ol acꞌan checlaj svachꞌil co bꞌeybꞌal icha val tzꞌaj scheclaj yoc cꞌu dꞌa chimcꞌualil.
7 Numan scutejec co bꞌa dꞌa yichan̈ Jehová. Nivan scutejec co cꞌool co tan̈van scolvaj quedꞌoc. Man̈ caqꞌuec somchajel co cꞌool yuj ebꞌ te vachꞌ tzꞌelcꞌoch yuj chucal scꞌulej.
8 Co satequel coval, caqꞌuec tup co cꞌacꞌalcꞌolal. Mocabꞌ te chichon co cꞌool, ta maay, chucn̈ej tas ol on̈ ajelcꞌochoc.
9 Dꞌa val yel ol satel ebꞌ scꞌulan chucal, a on̈xo pax scacꞌoch Jehová yipoc co cꞌool jun, ol co cha co macbꞌen yic bꞌaj ol on̈ cajnaj dꞌa lum luum tic.
10 Ayic jayeꞌ cꞌual tic, man̈xalaj ebꞌ scꞌulan chucal chiꞌ. Vachꞌchom ol co sayecꞌ ebꞌ, palta man̈xo ol ilchajlaj ebꞌ cuuj.
11 Axo ebꞌ anima emnaquil, ol aj ebꞌ dꞌa sat lum luum tic, ol yacꞌan val sgana ebꞌ yajecꞌ dꞌa juncꞌolal.
12 A ebꞌ scꞌulan chucal, nanon yecꞌ scꞌool ebꞌ yacꞌan chucal chiꞌ dꞌa anima vachꞌ sbꞌeybꞌal. Juchꞌuchꞌi scꞌuxan ye ebꞌ dꞌa ebꞌ yuj chichoncꞌolal.
13 Axo Jehová ton̈ej stzevaj yuj ebꞌ, yujto yojtac to lacꞌanxo sja yaelal dꞌa yibꞌan̈ ebꞌ.
14 A ebꞌ scꞌulan chucal, syiqꞌuelta yespada ebꞌ, sbꞌoan sjul-labꞌ ebꞌ yic vachꞌ slajviel ebꞌ emnaquil anima mebꞌaꞌ, to smilcham ebꞌ vachꞌ sbꞌeybꞌal ebꞌ yalani.
15 A qꞌuen yespada ebꞌ chuc chiꞌ, an̈ejaꞌ qꞌuen ol ecꞌ dꞌa spixan ebꞌ. Axo sjul-labꞌ ebꞌ chiꞌ, ol can̈chajcanbꞌat teꞌ.
16 Yelxo val te vachꞌ jabꞌoc tas ay dꞌa ebꞌ anima vachꞌ spensar, dꞌa yichan̈ sbꞌeyumal jantac ebꞌ scꞌulan chucal.
17 Ol satel sbꞌeyumal ebꞌ anima chuc chiꞌ yuj Jehová, axo ebꞌ anima vachꞌ spensar, ol coljoc ebꞌ yuuj.
18 A Jehová stan̈van ebꞌ malaj spaltail, axo tas ay dꞌa ebꞌ, malaj bꞌaqꞌuin̈ ol sateloc.
19 Ayic te chuc tiempo yujto te ay vejel, man̈ ol ecꞌlaj ebꞌ qꞌuexabꞌ, ayn̈ej tas ol sva ebꞌ.
20 A ebꞌ scꞌulan chucal, ol satel ebꞌ icha val stacji an̈ xumac ay dꞌa caltac teꞌ. A ebꞌ ayoch ajcꞌolal dꞌa Jehová, ol satcanel ebꞌ icha val satem teꞌ tabꞌ.
21 A ebꞌ scꞌulan chucal, tzꞌoch ebꞌ majan, maxtzac yacꞌ meltzaj smajan ebꞌ chiꞌ. Axo ebꞌ anima vachꞌ spensar, ay yoqꞌuelcꞌolal ebꞌ, elbꞌenn̈ej yel yuj ebꞌ.
22 A ebꞌ schaan svachꞌcꞌolal Jehová, a ebꞌ ol cajan lum luum, axo pax ebꞌ chuc catabꞌil yuuj, ol icꞌchajel ebꞌ dꞌa sat luum.
23 A Jehová scuchbꞌan bꞌey ebꞌ anima vachꞌ spensar ayic van sbꞌey ebꞌ dꞌa tojolal.
24 Vachꞌchom stelvi ebꞌ, palta max ecꞌlaj tiempo sqꞌuexvan ebꞌ, yujto yambꞌil scꞌabꞌ ebꞌ yuj Jehová.
25 Atax dꞌa in quelemal masanto yic icham vinac inxo tic, malaj bꞌaj ix vil yactajcan junoc anima vachꞌ spensar yuj Jehová yic tzꞌecꞌ dꞌa syaelal. Malaj pax bꞌaj ix vil yuninal ebꞌ vachꞌ sbꞌeybꞌal chiꞌ scꞌanan va sbꞌa dꞌa titac pat.
26 Tzꞌocꞌn̈ej scꞌool ebꞌ vachꞌ pensar chiꞌ dꞌa ebꞌ yetanimail, ayn̈ej tas syacꞌ ebꞌ majanil. Axo yuninal ebꞌ chiꞌ, syicꞌcot yaxilal ebꞌ dꞌa scal ebꞌ yetanimail.
27 Yuj chiꞌ, cactejeccan chucal, sco cꞌulan vachꞌil, ichato val chiꞌ vachꞌ ol on̈ aj dꞌa masanil tiempo.
28 Yujto stzalaj Jehová yedꞌ tojolal, malaj bꞌaqꞌuin̈ syactejcan ebꞌ scꞌanabꞌajan dꞌay. Dꞌa masanil tiempo scolchajel ebꞌ. Axo yin̈tilal ebꞌ scꞌulan chucal, satjiel ebꞌ yuj Jehová chiꞌ.
29 A ebꞌ anima vachꞌ spensar chiꞌ ol icꞌancan lum luum tic, ol cajnajecꞌ ebꞌ dꞌa lum dꞌa masanil tiempo.
30 A ebꞌ vachꞌ sbꞌeybꞌal, slolon ebꞌ dꞌa jelanil, vachꞌn̈ej tas syal ebꞌ.
31 A scꞌaybꞌubꞌal Dios yedꞌnac ebꞌ, yuj chiꞌ malaj bꞌaj ol em ebꞌ dꞌa chucal.
32 A ebꞌ scꞌulan chucal, ayn̈ejoch sat ebꞌ dꞌa ebꞌ anima vachꞌ sbꞌeybꞌal, snibꞌej ebꞌ smilcham ebꞌ.
33 Palta man̈ ol acꞌchajcanlaj ebꞌ vachꞌ dꞌa yol scꞌabꞌ ebꞌ chuc chiꞌ yuj Jehová. Man̈ ol stacꞌlaj Dios scotcan dꞌa yibꞌan̈ ebꞌ vachꞌ dꞌa yichan̈ ley.
34 Caqꞌuecoch Jehová dꞌa co cꞌool, sco cꞌanabꞌajanec. Aꞌ ol on̈ icꞌanchaan̈. Ol yacꞌ lum luum tic dꞌayon̈. Ol quil val satel ebꞌ scꞌulan chucal.
35 A ebꞌ scꞌulan chucal, ix vil val yixtan ebꞌ yetanimail ebꞌ, ix yicꞌchan̈ sbꞌa ebꞌ, nivaquil syutej sbꞌa ebꞌ icha junoc te teꞌ man̈ jantacoc scꞌabꞌ, te yax xiil.
36 Palta ix satel ebꞌ, man̈xalaj mach ix cani. Ix in say ebꞌ, palta majxo ilchajlaj ebꞌ vuuj.
37 Scham val quilan ebꞌ vachꞌ spensar max cꞌulanlaj chucal chiꞌ, te vachꞌn̈ej ol elcꞌoch ebꞌ yujto a juncꞌolal sayecꞌ ebꞌ.
38 Axo ebꞌ pit, ol satjoquel ebꞌ. Ol satjocpaxel yin̈tilal ebꞌ bꞌaqꞌuin̈.
39 A Jehová scolanel ebꞌ anima vachꞌ spensar. Aꞌ ayoch yen̈uloc ebꞌ ayic sja yaelal.
40 Aꞌ ol colanel ebꞌ dꞌa yol scꞌabꞌ ebꞌ scꞌulan chucal, yujto aꞌ ayoch yipoc scꞌool ebꞌ.