Scꞌanchaj scolval Dios
A jun bꞌit tic sbꞌitaj yuj vin̈ cuchbꞌum dꞌa bꞌit, yic snaancot Dios tastac tzon̈ icꞌani. Sbꞌit jun tic vin̈aj David.
38
Mamin Jehová, man̈ acꞌ in yaelal yuj yoval a cꞌool. Man̈ acꞌ in yaelal yacbꞌan aycot a cꞌacꞌalcꞌolal.2 Toxo ix och tzolan a jul-labꞌ dꞌayin, ix acꞌoch in yaelal.
3 A yuj yoval a cꞌool chiꞌ, masanil in nivanil tic te yaꞌ ay svabꞌi, yujn̈ej to ix och in mul dꞌayach.
4 A in chucal ichato cꞌojanqꞌue dꞌa vibꞌan̈ icha icatz, maxtzac techajlaj vuuj.
5 Yujn̈ej in pital, vanxo sqꞌue sjabꞌ vechen yujto van scꞌabꞌati.
6 N̈ojan in emi tzin bꞌeyi. Juneln̈ej lachan vaji. Maxtzac och vaan jabꞌoc in cuscꞌolal.
7 Van in cham yuj qꞌuixvelal svabꞌi. Masanil in nivanil te ya ay svabꞌi.
8 Ix te bꞌuychaj in nivanil tic, man̈xalaj jabꞌoc yip. Tzin cꞌacvi yuj vilcꞌolal.
9 Mamin Vajalil, ojtac masanil tas tzin nibꞌej. Ayic sicꞌson sja in cꞌool, ichan̈ yaj jun tic.
10 Toxon̈ej ste tin̈tin̈an in pixan yabꞌan syail. Numumi yel vip, maxtzac yal-laj vilani.
11 A ebꞌ anima vachꞌ vacꞌan yedꞌoc yedꞌ ebꞌ junn̈ej tzin ecꞌ yedꞌoc, najat sbꞌesel sbꞌa ebꞌ dꞌayin. A ebꞌ cajan dꞌa in lacꞌanil, najat sbꞌesel sbꞌa ebꞌ dꞌayin yuj in yaelal.
12 A ebꞌ sgana in smilanchamoc, van yacꞌanem in yaalil ebꞌ. A ebꞌ snibꞌan yacꞌ chucal dꞌayin, an̈ej chucal syal ebꞌ dꞌa in patic. Max ochlaj vaan ebꞌ snaubꞌtan̈an tas ol in yutoc dꞌa elcꞌaltac.
13 A inxo pax jun, ichato macan in chiquin, max vabꞌlaj tas syal ebꞌ, ichato max ujilaj in loloni, malaj tas tzꞌelta dꞌa in tiꞌ.
14 Lajan in icha junoc mach max yabꞌlaj, max yal-laj yalan sbꞌa.
15 Mamin Jehová in Diosal, a achn̈ej tzach vacꞌoch yipoc in cꞌool, a ach ol in a tacꞌvej.
16 A jun tic tzin cꞌan dꞌayach: Mocabꞌ in stzetzej ebꞌ ajcꞌol chiꞌ. Mocabꞌ bꞌitan ebꞌ yuj tzalajcꞌolal tato tzin acꞌji ganar.
17 Palta ijanxo val tzin acꞌji ganar svabꞌi. Max och vaan jabꞌoc in yaelal tic.
18 Ol valqꞌueta in mul. Man̈xo in animaoc svabꞌ yuj in chucal.
19 A ebꞌ ajcꞌol sgana in chami, toxo ix te qꞌuibꞌ sbꞌisul ebꞌ. Man̈xo jantacoc ix te aj ebꞌ tzin chacani, vachꞌchom malaj in mul dꞌa ebꞌ.
20 Chucn̈ej syutej sbꞌa ebꞌ dꞌayin yuj in vachꞌcꞌolal dꞌa ebꞌ. Yujn̈ej to tzin bꞌeybꞌalej vachꞌil, tzꞌoch ebꞌ ajcꞌolal dꞌayin.
21 Mamin Jehová, man̈ in actejcani. Ach in Diosal, man̈ a bꞌesel a bꞌa dꞌayin.
22 Ach Vajalil, ach in Columal, cotan̈ dꞌa elan̈chamel tzin a colani.