Te quenn̈ej sqꞌuinal ebꞌ anima
A jun bꞌit tic ix bꞌoji yic sbꞌitej vin̈aj Jedutún, vin̈ cuchbꞌum dꞌa bꞌit. Sbꞌit jun tic vin̈aj David.
39
Ix vacꞌ pensar to ol in yaꞌilej in bꞌeybꞌal, yic max och in mul yuj tas svalaꞌ. Tzin yamoch vaan in tiꞌ yacbꞌan ayecꞌ ebꞌ anima chuc spensar dꞌa vichan̈.2 Ix in em numnajoc, majxo valpaxlaj vachꞌ lolonel. Palta axo in yaelal ix te nivtaji.
3 Vanxo stzꞌa in pixan ix vabꞌi. Yacbꞌan van in te naubꞌtan̈ani, ix vachꞌ och pitzꞌan dꞌa in pixan. Yuj chiꞌ chaan̈ ix in avaji, ix valani:
4 Mamin Jehová, acꞌ val vojtaquejeli to chamel bꞌa vaji, to jayen̈ej abꞌil in qꞌuinal. In gana snachajel vuuj to elan̈chamel tzꞌecꞌbꞌat in qꞌuinal.
5 Quenn̈ej in qꞌuinal ix acꞌaꞌ. Man̈ nivanoclaj in qꞌuinal dꞌa ichan̈. A on̈ anima on̈ tic, icha val quicꞌan jabꞌoc quicꞌ, icha chiꞌ co qꞌuinal.
6 Icha veven caj co masanil. Nabꞌan̈ej sco macꞌ cꞌunbꞌoc co bꞌa. ¿Tocval scacꞌ co gana yedꞌ co bꞌeyumal sco molbꞌejqꞌue bꞌulan? Man̈ cojtacoc mach ol icꞌancanbꞌatoc.
7 Mamin Vajal, axo ticnaic, ¿tas vachꞌ svacꞌoch yipoc in cꞌool? A ach ton ayach och yipoc in cꞌool.
8 Colinel dꞌa masanil in chucal. Man̈ in a cha bꞌuchjoc yuj ebꞌ chuc spensar.
9 Icha val ebꞌ max ujilaj sloloni, icha chiꞌ ix vutej in bꞌa. Man̈xalaj tas ix elta dꞌa in tiꞌ, yujto a ach tic ix acꞌoch juntzan̈ tic dꞌayin.
10 Iqꞌuel in yaelal ix acꞌochi. Vanxo in lajviel svabꞌ yuj bꞌaj ix in a macꞌaꞌ.
11 A ach tzacꞌoch co yaelal a on̈ anima on̈ tic. Tzacꞌanoch co tzꞌuumal yuj co mul. A ach tzacꞌ lajvoc tas nibꞌabꞌil cuuj, ichato tzꞌijaxbꞌati. Co masanil, icha val quicꞌan quicꞌ, icha chiꞌ yecꞌ co qꞌuinal.
12 Mamin Jehová, abꞌ in lesal tic, cotan̈ qꞌuelan dꞌayin ayic svalan in bꞌa dꞌayach. Man̈ acꞌ sat a cꞌool dꞌa yal in sat tic. Mamin, a dꞌayach, eqꞌuelbꞌan̈ej vecꞌ dꞌa sat luum tic icha ebꞌ in mam vicham.
13 Mamin, man̈ acꞌcot a cꞌacꞌalcꞌolal dꞌayin, yic vachꞌ tzin tzalaj junoc rato, yacbꞌan manto el-laj in cꞌool.