Acꞌoj yuj diosal yuj scolval Dios
Sbꞌit jun tic vin̈aj David.
40
Ix in tan̈vejn̈ej scolval Jehová, axo ix abꞌani ayic ix in tevi dꞌay.2 Ix in yicꞌqꞌueta dꞌa jun olan te ay smay. Ix in scol bꞌaj sitzꞌatac. Ix in yacꞌanqꞌue dꞌa yibꞌan̈ jun qꞌuen qꞌueen yic tzin tecꞌbꞌej in bꞌa.
3 Ix yacꞌ val jun bꞌit acꞌto dꞌayin, bꞌit yic aloj vachꞌ lolonel dꞌa co Diosal. Comonoc sat scꞌol jantac ebꞌ tzꞌilan jun tic, yic syacꞌoch Jehová ebꞌ yipoc scꞌool.
4 Te vachꞌ yic ebꞌ tzꞌacꞌanoch Jehová yipoc scꞌool, max yacꞌoch spensar ebꞌ dꞌa ebꞌ syicꞌchaan̈ sbꞌa, aton ebꞌ tzꞌoch tzacꞌan dꞌa spatic juntzan̈ comon dios.
5 Mamin Jehová in Diosal, man̈ jantacoc juntzan̈ tas satubꞌtac ix a bꞌoꞌo yedꞌ jantac a vachꞌcꞌolal ix acꞌ dꞌayon̈. Malaj junoc mach syal slajbꞌan sbꞌa edꞌoc. In gana svalel masanil a vachꞌcꞌolal chiꞌ, palta max in tzacꞌvanlaj, yujto man̈xo bꞌischajbꞌenoc.
6 Max a nibꞌejlaj nocꞌ nocꞌ yedꞌ ixim trigo silabꞌil. Malaj nocꞌ nocꞌ tza cꞌanaꞌ yic sn̈usji silabꞌil dꞌayach, ma silabꞌ yic stupcanel co mul. Palta ix a jac in chiquin yic tzin cha vabꞌ tas tzalaꞌ.
7 Yuj chiꞌ ix valaꞌ: Tic tzin jaꞌi, xin chi. A tas tzꞌibꞌabꞌilcan dꞌa a lolonel, a vabꞌixal syalaꞌ.
8 Ach in Diosal, snibꞌej in cꞌool tzin cꞌulej icha a gana. Ayoch a cꞌaybꞌubꞌal dꞌa in pensar.
9 Mamin Jehová, ix valcanel yabꞌixal a tojolal dꞌa scal ebꞌ a chon̈abꞌ. Ojtac val to malaj bꞌaj ix vactejcan valaneli.
10 Malaj bꞌaj max valel a tojolal. Ix valel yabꞌixal to tzꞌeln̈ejcꞌoch tas tzalaꞌ, tzacꞌanpax colnabꞌil. Malaj bꞌaj ix in cꞌubꞌejel dꞌa yichan̈ ebꞌ a chon̈abꞌ molaneqꞌui, to te nivan a vachꞌcꞌolal, yeln̈ej pax tzalaꞌ.
11 Mamin Jehová, ayocabꞌn̈ej oqꞌuelcꞌolal dꞌayin. Ilinn̈ej yedꞌ a vachꞌcꞌolal icha ix aj alani.
12 Yujto te ay tas sjavi dꞌa vibꞌan̈, maxtzac bꞌischajlaj vuuj. In yamchajelta yuj in chucal. Ichato maxtzac yal-laj vilani. Ecꞌbꞌal in chucal chiꞌ dꞌa yichan̈ sbꞌisul xil in jolom. Vanxo somchajel in cꞌool.
13 Mamin, cotan̈ val qꞌuelan dꞌayin, cotan̈, colineli. Cotan̈ elan̈chamel, tzach och vedꞌoc.
14 A ebꞌ sgana in smilanchamoc, javocabꞌ qꞌuixvelal yedꞌ somcꞌolal dꞌa yibꞌan̈ ebꞌ. Bꞌatocabꞌ ebꞌ elelal dꞌa scal nivac qꞌuixvelal, yujto sgana ebꞌ yacꞌan chucal dꞌayin.
15 A ebꞌ tzin bꞌuchani, canocabꞌ ebꞌ dꞌa man̈ pensaril yuj somcꞌolal.
16 Axo masanil ebꞌ ayoch spensar dꞌayach, tzalajocabꞌ ebꞌ dꞌayach. Te nivan elcꞌoch ach Jehová, xchiocabꞌ ebꞌ snibꞌan a colval.
17 A inxo jun, obꞌiltac in, ay in och dꞌa ilcꞌolal. Mamin, mocabꞌ in bꞌatcan satcꞌolal uuj. A ach tzach ochtaxon vedꞌoc yic tzin a colani. Ach Jehová in Diosal, man̈ iqꞌuecꞌ tiempo in a colani.