A slesal jun yaꞌ ay
Sbꞌit jun tic vin̈aj David.
41
Vachꞌ yic ebꞌ scolvaj dꞌa ebꞌ mebꞌaꞌ, a Jehová ol colanel ebꞌ dꞌa scal syaelal.2 Aꞌ ol tan̈van ebꞌ, ol acꞌjoc sqꞌuinal ebꞌ yedꞌ stzalajcꞌolal yuuj dꞌa sat luum tic. Man̈ ol acꞌjoc ochlaj ebꞌ dꞌa yol scꞌabꞌ ebꞌ ajcꞌool yuuj.
3 Ol acꞌjoc yip ebꞌ dꞌa scal syaelal yuj Jehová, ol bꞌoxoc scꞌool ebꞌ.
4 A in ix valaꞌ: Mamin Jehová, ocꞌoc a cꞌool dꞌayin. An̈tej in, yel toni ay in mul dꞌayach, xin chi.
5 A ebꞌ ayoch ajcꞌolal dꞌayin, syal chuc ebꞌ dꞌayin: Comonoc spet chami yic man̈xo ol nachajcotoc, xchi ebꞌ.
6 Sja ebꞌ yacꞌ in paxyal, palta man̈oc dꞌa svachꞌil scꞌol ebꞌ tzul in yilaꞌ. Masanil tas syilbꞌat ebꞌ dꞌayin, sicꞌcan ebꞌ dꞌa spensar, axo dꞌa yoltac bꞌe syal in pecal ebꞌ.
7 A ebꞌ tzin chacaneli, smolbꞌej sbꞌa ebꞌ, syalan in pecal ebꞌ. Chuc tas sna ebꞌ dꞌa in patic.
8 Syalan ebꞌ: A syaelal jun tic, man̈xa yan̈al. Toxo ix bꞌatcan dꞌa sat schꞌat, man̈xo ol bꞌoxlaj scꞌool, xchi ebꞌ.
9 A jun vamigo junn̈ej tzin va yedꞌoc, yip in cꞌool valani, aꞌ ix och ajcꞌolal dꞌayin.
10 A achxo Mamin Jehová, ocꞌoc val a cꞌool dꞌayin. Icꞌ in qꞌue vaan yic ol vacꞌanecꞌ in pac dꞌa ebꞌ.
11 Tato man̈ ol tzalaj scꞌool ebꞌ ayoch ajcꞌolal dꞌayin, ichato chiꞌ ol nachajel vuuj to tzach tzalaj vedꞌoc.
12 A inxo pax jun, malaj in mul dꞌa ichan̈, yuj chiꞌ ix in a quetz yedꞌ a cꞌabꞌ. Ayinn̈ejocabꞌ ecꞌ dꞌa ichan̈ dꞌa masanil tiempo.
13 Alchajocabꞌ vachꞌ lolonel dꞌa Jehová co Diosal a on̈ israel on̈ tic, ticnaic yedꞌ dꞌa masanil tiempo. Ujocabꞌi.