LIBRO 2
(SALMOS 42—72)
A Dios ayoch yipoc in cꞌool
Jun bꞌit tzon̈ cꞌaybꞌani. Sbꞌit jun tic ebꞌ yin̈tilal vin̈aj Coré.
42
Ach in Diosal, tzach in nibꞌej val icha junoc nocꞌ cꞌultaquil chej tzꞌecꞌ sayoj aꞌ yuj taquin̈tial.2 Ach Dios pitzan, a val in pensar tzach nibꞌanochi, ¿bꞌaqꞌuin̈ ol in cꞌoch dꞌa ichan̈ junelxo?
3 Cꞌual dꞌacꞌval voqꞌui. Axon̈ej voqꞌuel tic ayoch in vaeloc, yacbꞌan sbꞌuchvaj ebꞌ anima dꞌayin scꞌanbꞌejn̈ej ebꞌ: ¿Bꞌajtil ay jun a Diosal chi? xchi ebꞌ.
4 Ayic tzin naan juntzan̈ tic, ste och pitzꞌan dꞌa in cꞌool. Tzin naancoti ayic ay in ecꞌ dꞌa scal ebꞌ anima, yic tzin cuchbꞌan ebꞌ, yic tzon̈ bꞌat dꞌa a templo. Man̈xo jantacoc yel yav ebꞌ yuj tzalajcꞌolal yedꞌ acꞌoj yuj diosal. Nivan qꞌuin̈ ton val jun chiꞌ.
5 ¿Tas val yuj schabꞌaxqꞌue in cꞌool? ¿Tas yuj somchaj in pensar? Ach in Diosal, ayach och yipoc in cꞌool, olto val vachꞌ lolonel dꞌayach, in Columal, in Diosal aji.
6 Ach in Diosal te cuscꞌolal vaj ticnaic, yuj chiꞌ, man̈ jantacoc ach in naancot dꞌa yol yic aꞌ Jordán yedꞌ dꞌa yol yic svitzal Hermón yedꞌ svitzal Mizar.
7 Icha scꞌan̈ yem pon̈oljoc a aꞌ dꞌa nivac pajav, icha val chiꞌ juntzan̈ nivac cuscꞌolal tzꞌecꞌ dꞌa vibꞌan̈ uuj.
8 Ach Jehová, a dꞌa cꞌualil tza chꞌoxn̈ej a vachꞌcꞌolal dꞌayin, axo dꞌacꞌvalil, max in och vaan ach in bꞌitani, max in och pax vaan in lesalvi dꞌayach, yujto a ach tzacꞌ in qꞌuinal.
9 Svalan icha tic dꞌayach: Ach in Columal, ¿tas yuj tzin bꞌatcan satcꞌolal uuj? Yuj chiꞌ cusnac in cꞌool ayic tzin bꞌeyeqꞌui, yujto tzin yixtej val ebꞌ ayoch ajcꞌolal dꞌayin, xin chi.
10 Svabꞌ val syail, icha val to smacꞌjipoj in bꞌaquil bꞌaj tzin yixtej ebꞌ ajcꞌool chiꞌ. Junjun rato sbꞌuchvaj ebꞌ dꞌayin scꞌanbꞌan ebꞌ: ¿Bꞌajtil ay jun a Diosal chiꞌ? xchi ebꞌ.
11 ¿Tas val yuj schabꞌaxqꞌue in cꞌool? ¿Tas yuj somchaj in pensar? Ach in Diosal, ayach och yipoc in cꞌool, olto val vachꞌ lolonel dꞌayach, in Columal, in Diosal aji.