Ebꞌ cajan dꞌa Jerusalén
11
A ebꞌ yajal dꞌa co chon̈abꞌ tic ix cajnaj ebꞌ dꞌa Jerusalén. Axo juntzan̈xo ebꞌ, lajun̈eꞌ macan̈ ix laj aj ebꞌ, ix och suerte dꞌa yibꞌan̈ ebꞌ mach junoc macan̈ ebꞌ ol cajnaj dꞌa Jerusalén tic, aton dꞌa jun chon̈abꞌ to yic Dios yaji. Axo bꞌalun̈ macan̈xo ebꞌ sbꞌatxican ebꞌ dꞌa schon̈abꞌ junjun. 2 Ix lajvi chiꞌ, ix yalan vachꞌ lolonel ebꞌ chon̈abꞌ dꞌa yibꞌan̈ ebꞌ bꞌecan scꞌol scajnaj dꞌa Jerusalén chiꞌ.3 Ay ebꞌ quetisraelal, ebꞌ sacerdote, ebꞌ levita, ebꞌ smunlaj dꞌa templo, ebꞌ yin̈tilal ebꞌ acꞌjinac servil vin̈aj Salomón, ix cajnaj ebꞌ dꞌa sluum dꞌa juntzan̈ schon̈abꞌ ebꞌ dꞌa yol yic Judá. Palta axo ebꞌ yajal yaj dꞌa scal ebꞌ, ix can cajan ebꞌ dꞌa Jerusalén yedꞌ yal yuninal.
4-6 Aton ebꞌ yin̈tilal Judá tic yedꞌ ebꞌ yin̈tilal Benjamín ix can cajan dꞌa Jerusalén:
Ay chavan̈ ebꞌ vin̈ yajal yaji. A jun vin̈ scuchan Ataías yuninal vin̈aj Uzías. Axo ebꞌ smam yicham vin̈, aton vin̈aj Zacarías, vin̈aj Amarías, vin̈aj Sefatías, vin̈aj Mahalaleel. A masanil ebꞌ tic yin̈tilal ebꞌ vin̈aj Fares yuninal vin̈aj Judá. A sbꞌisul ebꞌ, 468 dꞌa smasanil, te tecꞌan ebꞌ.
Axo junxo vin̈ yajal chiꞌ, Maasías sbꞌi vin̈, yuninal vin̈ vin̈aj Baruc. Axo ebꞌ smam yicham vin̈, aton vin̈aj Colhoze, vin̈aj Hazaías, vin̈aj Adías, vin̈aj Joiarib, vin̈aj Zacarías, yin̈tilal ebꞌ vin̈aj Siloni yuninal vin̈aj Judá.
7-8 Axo pax dꞌa scal ebꞌ yin̈tilal Benjamín, ay oxvan̈ ebꞌ vin̈ yajal yaji. Aton vin̈aj Salú, vin̈aj Gabai yedꞌ vin̈aj Salai. A vin̈aj Salú chiꞌ yuninal vin̈aj Mesulam, axo ebꞌ smam yicham vin̈, aton vin̈aj Joed, vin̈aj Pedaías, vin̈aj Colaías, vin̈aj Maasías, vin̈aj Itiel, vin̈aj Jesaías. 928 sbꞌisul ebꞌ dꞌa smasanil. 9 Axo vin̈aj Joel yuninal vin̈aj Zicri yajal soldado yaj dꞌa ebꞌ, axo vin̈aj Judá yuninal vin̈aj Senúa schabꞌil yajal yaji.
10 A ebꞌ vin̈ yajal yaj dꞌa scal ebꞌ vin̈ sacerdote, ebꞌ vin̈ ix can cajan dꞌa Jerusalén, chan̈van̈ ebꞌ vin̈: A vin̈ bꞌabꞌel, aton vin̈aj Jedaías yuninal vin̈aj Joiarib scꞌabꞌyoc vin̈aj Jaquín.
11 Axo vin̈ schabꞌil, aton vin̈aj Seraías yuninal vin̈aj Hilcías. Axo ebꞌ smam yicham vin̈, aton vin̈aj Mesulam, vin̈aj Sadoc, vin̈aj Meraiot, vin̈aj Ahitob vin̈ yacꞌnac sat sacerdoteal. 12 A sbꞌisul masanil ebꞌ tic, 822 ebꞌ, scꞌabꞌyocn̈ej sbꞌa ebꞌ, aton ebꞌ munlajnac dꞌa scajnubꞌ Dios.
Axo vin̈ yoxil, aton vin̈aj Adaías yuninal vin̈aj Jeroham. Axo ebꞌ smam yicham vin̈, aton vin̈aj Pelalías, vin̈aj Amsi, vin̈aj Zacarías, vin̈aj Pasur yedꞌ vin̈aj Malquías. 13 A sbꞌisul ebꞌ yajal yaj dꞌa ebꞌ, 242 ebꞌ, scꞌabꞌyocn̈ej sbꞌa ebꞌ.
Axo vin̈ schan̈il, aton vin̈aj Amasai yuninal vin̈aj Azareel. Axo ebꞌ smam yicham vin̈, aton vin̈aj Azai, vin̈aj Mesilemot yedꞌ vin̈aj Imer. 14 A sbꞌisul ebꞌ, 128, te jelan ebꞌ dꞌa oval. Axo vin̈aj Zabdiel yuninal vin̈aj Gedolim, a vin̈ yajal yaj dꞌa scal ebꞌ.
15 Axo ebꞌ vin̈ yajal yaj dꞌa ebꞌ levita, ebꞌ ix can cajan dꞌa Jerusalén, aton vin̈aj Semaías yuninal vin̈aj Hasub. Axo ebꞌ smam yicham vin̈, aton vin̈aj Azricam, vin̈aj Hasabías yedꞌ vin̈aj Buni. 16 Ay pax chavan̈xo ebꞌ vin̈ yajal, aton vin̈aj Sabetai yedꞌ vin̈aj Jozabad. A ebꞌ vin̈ ayoch yil munlajel dꞌa spatictac scajnubꞌ Dios. 17 Axo junxo vin̈, aton vin̈aj Matanías yuninal vin̈aj Micaía. Axo ebꞌ smam yicham vin̈, aton vin̈aj Zabdi yedꞌ vin̈aj Asaf. A vin̈aj Matanías chiꞌ scuchbꞌan ebꞌ sbꞌitan vachꞌ lolonel yedꞌ acꞌoj yuj diosal dꞌa stiempoal lesal. Axo vin̈aj Bacbuquías schabꞌil cuchbꞌum yaj vin̈.
Axo junxo vin̈, aton vin̈aj Abda yuninal vin̈aj Samúa. Axo ebꞌ smam yicham vin̈, aton vin̈aj Galal yedꞌ vin̈aj Jedutún. 18 A sbꞌisul ebꞌ yin̈tilal Leví ix can cajan dꞌa schon̈abꞌ Dios chiꞌ, 284 ebꞌ dꞌa smasanil.
19 Axo ebꞌ tan̈vum puerta, 172 sbꞌisul ebꞌ. A vin̈aj Acub yedꞌ vin̈aj Talmón yajal dꞌa scal ebꞌ scꞌabꞌyoc stan̈van puerta chiꞌ.
20 Axo juntzan̈xo ebꞌ quetisraelal, ebꞌ sacerdote yedꞌ juntzan̈xo ebꞌ levita, ix cajnaj junjun ebꞌ dꞌa smacbꞌen dꞌa juntzan̈xo chon̈abꞌ dꞌa yol yic Judá. 21 A ebꞌ smunlaj dꞌa templo, ix cajnaj ebꞌ dꞌa Jerusalén dꞌa jun tzalan scuchan Ofel. Axo vin̈aj Ziha yedꞌ vin̈aj Gispa scuchbꞌan ebꞌ dꞌa munlajel chiꞌ.
22 A vin̈aj Uzi yajal dꞌa scal ebꞌ levita yin̈tilal vin̈aj Asaf dꞌa Jerusalén chiꞌ, aton ebꞌ vin̈ scuchbꞌan bꞌit dꞌa scajnubꞌ Dios. A ebꞌ smam yicham vin̈aj Uzi chiꞌ, aton vin̈aj Bani, vin̈aj Hasabías, vin̈aj Matanías yedꞌ vin̈aj Micaía. 23 Dꞌa stzolal tzꞌaj yoch ebꞌ sbꞌitan dꞌa junjun cꞌu icha yalan vin̈ rey.
24 A mach tzꞌoch dꞌa yichan̈ vin̈ rey yuj yaln̈ej tas schecnabꞌil ebꞌ chon̈abꞌ, aton vin̈aj Petaías. A ebꞌ smam yicham vin̈, aton vin̈aj Mesezabeel yin̈tilalcan vin̈aj Zera yuninal vin̈aj Judá.
Juntzan̈xo chon̈abꞌ bꞌaj ix cajnaj ebꞌ
25-30 A juntzan̈xo ebꞌ yin̈tilal Judá, ix cajnaj ebꞌ dꞌa juntzan̈ chon̈abꞌ tic yedꞌ dꞌa masanil yaldeail: Aton dꞌa Quiriat-arba, dꞌa Dibón, dꞌa Jecabseel, dꞌa Jesúa, dꞌa Molada, dꞌa Bet-pelet, dꞌa Hazar-sual, dꞌa Beerseba, dꞌa Siclag, dꞌa Mecona, dꞌa En-rimón, dꞌa Zora, dꞌa Jarmut, dꞌa Zanoa, dꞌa Adulam, dꞌa Laquis yedꞌ dꞌa Azeca. Ix cajnajpax ebꞌ bꞌaj sbꞌo munlajel. Ix aj ebꞌ dꞌa Beerseba masanto ix qꞌuecꞌoch ebꞌ dꞌa schꞌolanil yic Hinom.
31-35 Axo ebꞌ yin̈tilal Benjamín, ix cajnaj ebꞌ dꞌa juntzan̈ chon̈abꞌ tic: Aton dꞌa Geba, dꞌa Micmas, Aía, Betel yedꞌ dꞌa yaldeail, Anatot, Nob, Ananías, Hazor, Ramá, Gitaim, Hadid, Seboim, Nebalat, Lod, Ono yedꞌ dꞌa schꞌolanil yic ebꞌ bꞌoum qꞌueen. 36 Ay pax ebꞌ levita ix scha smacbꞌen dꞌa yol yic Judá yedꞌ dꞌa yol yic Benjamín.