A sbꞌi ebꞌ ix yacꞌ stiꞌ to ol scꞌanabꞌajej
10
1-8 Aton ebꞌ vin̈ tic ix yacꞌ sbꞌi dꞌa chꞌan̈ uum ix tzꞌibꞌchaj chiꞌ. A in Nehemías in tic, yuninal in vin̈aj Hacalías, yajal vaji. Ix yacꞌanpax sbꞌi ebꞌ vin̈ sacerdote: Aton vin̈aj Sedequías, vin̈aj Seraías, vin̈aj Azarías, vin̈aj Jeremías, vin̈aj Pasur, vin̈aj Amarías, vin̈aj Malquías, vin̈aj Hatús, vin̈aj Sebanías, vin̈aj Maluc, vin̈aj Harim, vin̈aj Meremot, vin̈aj Obadías, vin̈aj Daniel, vin̈aj Ginetón, vin̈aj Baruc, vin̈aj Mesulam, vin̈aj Abías, vin̈aj Mijamín, vin̈aj Maazías, vin̈aj Bilgai yedꞌ vin̈aj Semaías.9-13 Axo pax juntzan̈xo ebꞌ vin̈ levita, aton ebꞌ vin̈ tic: Vin̈aj Jesúa yuninal vin̈aj Azanías, vin̈aj Binúi yin̈tilal vin̈aj Henadad, vin̈aj Cadmiel yedꞌ ebꞌ yetlevitail: Aton vin̈aj Sebanías, vin̈aj Hodías, vin̈aj Kelita, vin̈aj Pelaías, vin̈aj Hanán, vin̈aj Micaías, vin̈aj Rehob, vin̈aj Hasabías, vin̈aj Zacur, vin̈aj Serebías, vin̈aj Sebanías, vin̈aj Hodías, vin̈aj Bani yedꞌ vin̈aj Beninu.
14-27 Axo pax ebꞌ ayoch yajalil dꞌa chon̈abꞌ chiꞌ: Aton vin̈aj Paros, vin̈aj Pahat-moab, vin̈aj Elam, vin̈aj Zatu, vin̈aj Bani, vin̈aj Buni, vin̈aj Azgad, vin̈aj Bebai, vin̈aj Adonías, vin̈aj Bigvai, vin̈aj Adín, vin̈aj Ater, vin̈aj Ezequías, vin̈aj Azur, vin̈aj Hodías, vin̈aj Hasum, vin̈aj Bezai, vin̈aj Harif, vin̈aj Anatot, vin̈aj Nebai, vin̈aj Magpías, vin̈aj Mesulam, vin̈aj Hezir, vin̈aj Mesezabeel, vin̈aj Sadoc, vin̈aj Jadúa, vin̈aj Pelatías, vin̈aj Hanán, vin̈aj Anaías, vin̈aj Oseas, vin̈aj Hananías, vin̈aj Hasub, vin̈aj Halohes, vin̈aj Pilha, vin̈aj Sobec, vin̈aj Rehum, vin̈aj Hasabna, vin̈aj Maasías, vin̈aj Ahías, vin̈aj Hanán, vin̈aj Anán, vin̈aj Maluc, vin̈aj Harim yedꞌ vin̈aj Baana.
Juntzan̈xo ebꞌ chon̈abꞌ ix yacꞌ stiꞌ dꞌa Dios
28 Axo jantacto ebꞌ chon̈abꞌ, aton ebꞌ sacerdote yedꞌ juntzan̈xo ebꞌ levita tan̈vum puerta, ebꞌ sbꞌitani, ebꞌ smunlaj dꞌa templo yedꞌ masanil ebꞌ anima toxo ix yiqꞌuel sbꞌa dꞌa scal ebꞌ chꞌoc chon̈abꞌil yic scꞌanabꞌajan scꞌaybꞌubꞌal Dios ebꞌ, ix yacꞌ stiꞌ ebꞌ yedꞌ ebꞌ ix yetbꞌeyum yedꞌ ebꞌ yal yuninal ebꞌ tzaxo nachaj yuuj. 29 A ebꞌ tic ix smolbꞌej sbꞌa ebꞌ yedꞌ ebꞌ scꞌabꞌyoc yedꞌ pax ebꞌ yajal, ix yacꞌan stiꞌ ebꞌ to ol sbꞌeybꞌalej schecnabꞌil Dios ebꞌ, aton albꞌilcan yuj vin̈aj Moisés schecabꞌ Dios chiꞌ. Ix yalan ebꞌ to ol scꞌanabꞌajej val schecnabꞌil yedꞌ scꞌaybꞌubꞌal Jehová Cajalil ebꞌ. 30 Yuj chiꞌ ix yal ebꞌ icha tic: Man̈xo ol yicꞌlaj sbꞌa ebꞌ cal cuninal yedꞌ ebꞌ chꞌoc chon̈abꞌil. 31 Tato sjavi ebꞌ chꞌoc chon̈abꞌil chon̈oj tastac dꞌayon̈ dꞌa scꞌual icꞌoj ip, ma dꞌa juntzan̈xo scꞌual qꞌuin̈, malaj tas ol co man dꞌa ebꞌ. Axo dꞌa yuquil abꞌil ol yicꞌ yip lum co luum, ol cacꞌanpax lajvoc sbꞌoc ebꞌ ay sbꞌoc dꞌayon̈.
32 An̈ejtonaꞌ toxo ix cacꞌoch dꞌa quibꞌan̈ to yovalil ol cacꞌ chan̈eꞌ gramo* qꞌuen plata junjun on̈ dꞌa junjun abꞌil yic smanchaj tas scꞌanchaj dꞌa scajnubꞌ co Diosal: 33 Aton yuj ixim pan tzꞌacꞌchajoch dꞌa yichan̈ Dios, ofrenda tzꞌacꞌji dꞌa junjun cꞌu dꞌa tas svaji, silabꞌ sn̈usjitzꞌa dꞌa junjun cꞌu, silabꞌ dꞌa scꞌual icꞌoj ip, silabꞌ ayic tzꞌalji qꞌuen uj yedꞌ juntzan̈xo qꞌuin̈ tzꞌoch dꞌa junjun abꞌil, yedꞌ pax juntzan̈xo ofrenda yedꞌ silabꞌ yuj yacꞌji tup co mul a on̈ israel on̈ tic yedꞌ juntzan̈xo tas scꞌanchaj dꞌa stemplo co Diosal.
34 An̈ejtonaꞌ yuj teꞌ cꞌatzitz scꞌanchaj dꞌa stemplo Jehová, yic stzꞌa teꞌ dꞌa yaltar Jehová co Diosal, toxo ix co bꞌo dꞌa junjun macan̈ quin̈tilal tas tiempoal dꞌa junjun abꞌil ol cacꞌ teꞌ cꞌatzitz chiꞌ, icha yajcan dꞌa chꞌan̈ ley chiꞌ. Vachꞌchom sacerdote, ma levita, ma comon anima, ol co cꞌanabꞌajej co masanil. 35 Ix co chaoch dꞌa quibꞌan̈ to ol quicꞌcot sbꞌabꞌel sat co munlajel yedꞌ bꞌabꞌel sat cavbꞌen teꞌ dꞌa junjun abꞌil dꞌa scajnubꞌ co Diosal. 36 Ol quicꞌanpaxcot ebꞌ bꞌabꞌel cuninal yedꞌ bꞌabꞌel yuneꞌ nocꞌ co vacax yedꞌ nocꞌ co calnel dꞌa stemplo co Diosal dꞌa yichan̈ ebꞌ sacerdote smunlaj taꞌ, icha val yajcan dꞌa chꞌan̈ ley chiꞌ. 37 Ol quicꞌanpaxcot co colval dꞌa ebꞌ sacerdote, aton ixim co bꞌabꞌel harina, bꞌabꞌel sat cavbꞌen teꞌ, co bꞌabꞌel vino yedꞌ co bꞌabꞌel aceite. Ol cacꞌan bꞌaj sicꞌchaj dꞌa stemplo co Diosal. Ol quicꞌanpaxcot sdiezmoal sat cavbꞌen. Ol cacꞌan dꞌa ebꞌ levita, yujto a ebꞌ smolbꞌan sdiezmoal tas squicꞌ dꞌa sat co luum dꞌa junjun chon̈abꞌ bꞌaj tzon̈ munlaji.
38 Ayic ol bꞌat ebꞌ levita chiꞌ smolbꞌej co diezmo chiꞌ, yovalil sbꞌat junoc ebꞌ sacerdote yin̈tilal vin̈aj Aarón yedꞌ ebꞌ. Syicꞌanpaxbꞌat sdiezmoal diezmo scha ebꞌ chiꞌ, syacꞌanoch ebꞌ bꞌaj sicꞌchaj tas tzꞌacꞌji dꞌa scajnubꞌ co Diosal. 39 A on̈ israel on̈ tic yedꞌ ebꞌ levita ol quicꞌcot ixim trigo, vino yedꞌ aceite bꞌaj molan masanil tas scꞌanchaj dꞌa templo, bꞌaj ay pax scuarto ebꞌ ayoch dꞌa opisio, aton ebꞌ sacerdote, ebꞌ tan̈vum puerta yedꞌ ebꞌ sbꞌitani. Ix cacꞌan co tiꞌ to man̈ ol cactejcan stemplo co Diosal, xchi ebꞌ.