Ix yal smul ebꞌ israel vin̈aj Esdras
9
Ayic 24 yoch yuquil uj chiꞌ, ix smolbꞌan sbꞌa masanil ebꞌ israel yic tzꞌoch ebꞌ tzecꞌojcꞌolal, ix yacꞌanoch pichul ebꞌ yic cuscꞌolal, ix yacꞌanqꞌue pococ ebꞌ dꞌa sjolom. 2 Ix yicꞌanel sbꞌa ebꞌ dꞌa scal ebꞌ chꞌoc chon̈abꞌil. Ix qꞌue lin̈an ebꞌ yalanqꞌueta smul yedꞌ smul ebꞌ smam yicham ebꞌ. 3 Yacbꞌan lin̈anqꞌue ebꞌ dꞌa yedꞌtal chiꞌ, oxeꞌ val hora ix avtaj chꞌan̈ sley Jehová dꞌa scal ebꞌ, axo dꞌa oxeꞌ horaxo, ix yalanqꞌueta smul ebꞌ, ix och ebꞌ ejmelal dꞌa Jehová sDiosal. 4 Axo jun macan̈ ebꞌ vin̈ levita, aton vin̈aj Jesúa, vin̈aj Bani, vin̈aj Cadmiel, vin̈aj Sebanías, vin̈aj Buni, vin̈aj Serebías, vin̈aj Bani yedꞌ vin̈aj Quenani, ix qꞌue ebꞌ vin̈ dꞌa yibꞌan̈ jun bꞌachquiltac sqꞌuei, te chaan̈ ix yal ebꞌ vin̈ dꞌa Jehová Dios. 5 Ix yalanpax junxo macan̈ ebꞌ vin̈ levita chiꞌ, aton vin̈aj Jesúa, vin̈aj Cadmiel, vin̈aj Bani, vin̈aj Hasabnías, vin̈aj Serebías, vin̈aj Hodías, vin̈aj Sebanías yedꞌ vin̈aj Petaías icha tic: Calec vachꞌ lolonel dꞌa Jehová co Diosal dꞌa masanil tiempo. Mamin, alchajocabꞌ vachꞌ lolonel dꞌayach vachꞌchom max qꞌuecꞌoch ach co bꞌitan dꞌa smojal.6 Mamin Jehová, a achn̈ej ayachn̈ej eqꞌui. A ach ix a bꞌo satchaan̈ squilaꞌ yedꞌ juntzan̈xo satchaan̈ max quil-laj. A ach ix a bꞌo masanil qꞌuen cꞌanal. A ach pax ix a bꞌo lum luum tic yedꞌ pax masanil tastac ay dꞌa luum. A ach pax ix a bꞌo aꞌ mar yedꞌ masanil tas ay dꞌa aꞌ. A ach tzacꞌ sqꞌuinal masanil tas, yuj chiꞌ tzꞌoch ebꞌ ángel ejmelal dꞌayach.
7 Mamin Jehová, a ach ton val Dios ach, a sicꞌnaquelta vin̈aj Abram. Icꞌannaquelta vin̈ dꞌa Ur schon̈abꞌ ebꞌ caldeo, acꞌannac scuch vin̈ Abraham. 8 Ilnac to yacꞌnac ach och vin̈ dꞌa scꞌool, yuj chiꞌ a bꞌonac jun a trato yedꞌ vin̈ yic tzacꞌan lum luum dꞌa ebꞌ yin̈tilal vin̈, aton lum yic ebꞌ cananeo, ebꞌ heteo, ebꞌ amorreo, ebꞌ ferezeo, ebꞌ jebuseo yedꞌ ebꞌ gergeseo. Elnacxocꞌoch a lolonel chiꞌ yujto tzꞌeln̈ejcꞌoch tas tzalaꞌ. 9 Ilnac val yabꞌan syail ebꞌ co mam quicham dꞌa Egipto, abꞌannac yel yav ebꞌ dꞌa stiꞌ a Chacchac Mar. 10 A chꞌoxannac juntzan̈ tas satubꞌtac yilji dꞌa vin̈ sreyal Egipto chiꞌ yedꞌ dꞌa masanil ebꞌ schecabꞌ vin̈ yedꞌ dꞌa masanil anima ay dꞌa yol smacbꞌen vin̈, yujto ilnac to te chacjinaquel ebꞌ quetisraelal yuj ebꞌ. Yuj juntzan̈ chiꞌ tzach te bꞌinajn̈ej. 11 A pojnac snan̈al aꞌ mar chiꞌ dꞌa yichan̈ ebꞌ co mam quicham chiꞌ, yecꞌnacta ebꞌ dꞌa staquin̈al lum dꞌa yol aꞌ chiꞌ. Axo ebꞌ pechjinac ebꞌ chiꞌ, bꞌatnaccan ebꞌ dꞌa yich aꞌ icha val tzꞌaj sbꞌatcan junoc qꞌuen qꞌueen dꞌa sjulal yich aꞌ. 12 Slajvi chiꞌ, icꞌannac bꞌey ebꞌ dꞌa cꞌualil yedꞌ jun nivan topan̈ asun, axo dꞌacꞌvalil ayoch scꞌacꞌal jun asun chiꞌ yic syacꞌan saquilqꞌuinal bꞌaj sbꞌat ebꞌ.
13 Slajvi chiꞌ, emnacul dꞌa sjolom lum vitz Sinaí, a lolonnac emta dꞌa ebꞌ. Acꞌannac ley to tojol dꞌa ebꞌ yedꞌ cꞌaybꞌubꞌal te yel yedꞌ pax checnabꞌil te vachꞌ. 14 A cꞌaybꞌannac ebꞌ yic scꞌanabꞌajej scꞌual icꞌoj ip ebꞌ yuj ach yicꞌanchaan̈ ebꞌ, acꞌannac checnabꞌil yedꞌ cꞌaybꞌubꞌal dꞌa vin̈aj Moisés, axo vin̈ alannac dꞌa ebꞌ. 15 Acꞌannac vael scot dꞌa satchaan̈ sva ebꞌ ayic tzꞌoch svejel ebꞌ. Acꞌannaquelta a aꞌ dꞌa sat qꞌuen qꞌueen yucꞌ ebꞌ yic tzꞌecꞌ staquin̈tial ebꞌ. Slajvi chiꞌ alannac dꞌa ebꞌ to scajnaj ebꞌ dꞌa sat lum luum acꞌnac a tiꞌ acꞌan dꞌa ebꞌ.
16 Palta a ebꞌ co mam quicham chiꞌ te acꞌumtac ebꞌ, te pit yutejnac sbꞌa ebꞌ, man̈ schanacoc yabꞌ a checnabꞌil ebꞌ. 17 Man̈ ach scꞌanabꞌajejnacoc ebꞌ, man̈xo snanacoccot ebꞌ tas satubꞌtac a cꞌulejnac yuj svachꞌiloc ebꞌ. Te pit yutejnac sbꞌa ebꞌ, snaannac ebꞌ yacꞌoch jun yajalil yic scuchbꞌaj meltzaj ebꞌ yuj dꞌa Egipto, yic tzꞌochxi ebꞌ checabꞌil taꞌ yalani. Palta a ach tic, Dios ach, te ay a nivancꞌolal, ay oqꞌuelcꞌolal, te xajan anima uuj, man̈ cꞌunoc scot oval. Man̈ actejnacoccanlaj ebꞌ 18 vachꞌchom sbꞌonac jun qꞌuen yechel vacax ebꞌ. Yalannac val ebꞌ to a jun chiꞌ sdiosal ebꞌ, to aꞌ icꞌanelta ebꞌ dꞌa Egipto. Te nivan smul ebꞌ yacꞌnacochi. 19 Palta a ach tic te nivan a cꞌool, yuj chiꞌ man̈ actejnacoccan ebꞌ dꞌa tzꞌinan luum. Man̈ icꞌnacoquel jun nivan topan̈ asun tzꞌicꞌan bꞌey ebꞌ dꞌa cꞌualil, man̈ icꞌnacocpaxeli ayic syacꞌan yoc dꞌa ebꞌ dꞌacꞌvalil yic syacꞌan saquilqꞌuinal dꞌa ebꞌ bꞌaj sbꞌati. 20 Acꞌnac Espíritu vachꞌ dꞌa ebꞌ yic scꞌaybꞌaj ebꞌ yuuj. Man̈ actejnacoc acꞌan maná sva ebꞌ. Acꞌnacn̈ej a aꞌ yucꞌ ebꞌ yic tzꞌecꞌ staquin̈tial ebꞌ. 21 40 abꞌil acꞌnac svael ebꞌ dꞌa tzꞌinan lum chiꞌ. Malaj val jabꞌoc tas yacꞌnac palta dꞌa ebꞌ, man̈ lajvinacoquel spichul ebꞌ ayochi, man̈ malnacocqꞌue yoc ebꞌ sbꞌeyi.
22 Uuj yacꞌnac ganar ebꞌ rey ebꞌ yedꞌ juntzan̈ chon̈abꞌ, yicannaccan slum ebꞌ chiꞌ ebꞌ, a pojannac ecꞌ lum dꞌa ebꞌ. Acꞌannac lum Hesbón dꞌa ebꞌ, aton lum bꞌaj ochnac vin̈aj Sehón reyal yedꞌ lum Basán bꞌaj ochnac vin̈aj Og reyal. 23 Acꞌannacpax qꞌuibꞌ sbꞌisul yuninal ebꞌ icha sbꞌisul qꞌuen cꞌanal dꞌa satchaan̈. Icꞌannaccot ebꞌ yic schaan smacbꞌen ebꞌ bꞌaj acꞌnac a tiꞌ acꞌan yicoc ebꞌ co mam quicham. 24 Ochnac ebꞌ yuninal ebꞌ dꞌa lum Canaán, yicꞌannac luum ebꞌ. Uuj yacꞌnac ganar juntzan̈ anima chiꞌ ebꞌ yedꞌ sreyal, yic scꞌulan ebꞌ tas sgana scꞌulej dꞌa juntzan̈ anima chiꞌ. 25 Yicꞌannacpax chon̈abꞌ ebꞌ te vachꞌ yaj sbꞌoi, lum luum te yax sat yedꞌ juntzan̈ pat te bꞌudꞌan yuj tastac vachꞌ. Yicꞌannacpax aꞌ ucꞌbꞌilaꞌ ebꞌ, teꞌ uva, teꞌ olivo yedꞌ juntzan̈xo te teꞌ syacꞌ sat. Vanac ebꞌ, bꞌudꞌjinac ebꞌ, bꞌaqꞌuechbꞌinac ebꞌ. Yacꞌnac val tzalajbꞌoc scꞌool ebꞌ yuj a nivan vachꞌcꞌolal. 26 Palta te pit yutejnac sbꞌa ebꞌ, yochnac ebꞌ ajcꞌolal dꞌayach, spaticannaquel a cꞌaybꞌubꞌal ebꞌ. Cachjinac ebꞌ yuj ebꞌ a checabꞌ, yic syacꞌxioch sbꞌa ebꞌ dꞌa yol a cꞌabꞌ, palta smilnaccham ebꞌ a checabꞌ chiꞌ ebꞌ. Yelxo te nivan smul ebꞌ ochnac dꞌayach. 27 Yuj chiꞌ acꞌnacoch ebꞌ co mam quicham chiꞌ dꞌa yol scꞌabꞌ ebꞌ ajcꞌool, ixtajnac val ebꞌ yuj ebꞌ. Palta ayic van yabꞌan syail ebꞌ chiꞌ, scꞌanannac a colval ebꞌ. A achxo jun, ayach ecꞌ dꞌa satchaan̈, abꞌnac slesal ebꞌ chiꞌ, yujto ocꞌnac val a cꞌol dꞌa ebꞌ, yuj chiꞌ acꞌnaccot ebꞌ scolan ebꞌ dꞌa yol scꞌabꞌ ebꞌ ajcꞌool chiꞌ. 28 Palta ayic juncꞌolalxo yajxi ebꞌ, scꞌulannacxi chucal ebꞌ dꞌa ichan̈. Yuj chiꞌ actejnacxibꞌat ebꞌ dꞌa yol scꞌabꞌ ebꞌ ajcꞌol chiꞌ, yacꞌjinacoch syaelal ebꞌ yuj ebꞌ. Yuj chiꞌ scꞌananxi a colval ebꞌ. A achxo ayach ecꞌ dꞌa satchaan̈, abꞌannac slesal ebꞌ. Yujto tzꞌocꞌ val a cꞌool dꞌa ebꞌ, tzijtum el a colnac ebꞌ. 29 Alannac dꞌa ebꞌ to scꞌanabꞌajej a cꞌaybꞌubꞌal ebꞌ, palta an̈ejaꞌ pit yutejnac sbꞌa ebꞌ, man̈ scꞌanabꞌajejnacoc a checnabꞌil ebꞌ. Ochnac smul ebꞌ dꞌa a cꞌaybꞌubꞌal, aton jun tzꞌacꞌan sqꞌuinal ebꞌ scꞌanabꞌajani. Te chuc yutejnac sbꞌa ebꞌ, te pit ebꞌ, man̈ schanacoclaj ebꞌ yabꞌi. 30 Tzijtum abꞌil acꞌnac techaj schucal ebꞌ. A Espíritu acꞌannac yojtaquejel ebꞌ a checabꞌ, axo ebꞌ cachannac ebꞌ, palta man̈ schanacoclaj ebꞌ yabꞌi. Yuj chiꞌ acꞌnacoch ebꞌ dꞌa yol scꞌabꞌ juntzan̈xo nación. 31 Palta yujto tzꞌocꞌ val a cꞌool dꞌa ebꞌ, te nivan a vachꞌcꞌolal, yuj chiꞌ man̈ a satnacoquel ebꞌ smasanil, man̈ actejnacoc paxcan ebꞌ schꞌocoj.
32 Yuj chiꞌ, ach co Diosal, te nivan elcꞌochi, te ay a may, smojton val co xiv dꞌayach. Max bꞌat a lolonel satcꞌolal uuj yujto te xajan on̈ uuj. Nacot jantac syaelal ebꞌ co reyal, ebꞌ cajalil, ebꞌ sacerdote, ebꞌ a checabꞌ, ebꞌ co mam quicham yedꞌ masanil ebꞌ quetchon̈abꞌ, a tax dꞌa stiempoal ebꞌ sreyal Asiria syabꞌn̈ej syail ebꞌ masanto ticnaic. 33 Palta tojoln̈ej tas sjavi dꞌa quibꞌan̈ uuj. Vachꞌn̈ej tas tza cꞌulej, a on̈xo tic, chucn̈ej tas sco scꞌulej. 34 A ebꞌ co reyal, ebꞌ cajalil, ebꞌ sacerdote yedꞌ ebꞌ co mam quicham, man̈ schanacoclaj yabꞌ ebꞌ, man̈ scꞌanabꞌajejnacoclaj a checnabꞌil ebꞌ icha ajnac yalji dꞌa ebꞌ. 35 Man̈ jantacoc tas acꞌnac dꞌa ebꞌ, te levan lum luum te yax sat tic acꞌnac dꞌa ebꞌ, palta man̈ ochnacoc ebꞌ ejmelal dꞌayach, man̈ yactejnacoccan chuc bꞌeybꞌal ebꞌ dꞌa yol smacbꞌen ebꞌ acꞌnac chiꞌ.
36 Ina val quilji ticnaic, toxo ix on̈ meltzajoch checabꞌil dꞌa lum luum acꞌnac dꞌa ebꞌ co mam quicham, lum bꞌaj yacꞌnac val tzalajbꞌoc scꞌool ebꞌ. 37 A val tas te vachꞌ avabꞌil cuuj, a chiꞌ syiqꞌuecꞌ ebꞌ rey dꞌayon̈, aton ebꞌ bꞌaj on̈ acꞌoch dꞌa yalan̈ smandar yuj co mul ix och dꞌayach. Scꞌulej ebꞌ tas snibꞌej scꞌol dꞌayon̈ yedꞌ dꞌa nocꞌ co molbꞌetzal nocꞌ, yuj chiꞌ te ayon̈ val och dꞌa ilcꞌolal ticnaic.
38 Yuj chiꞌ a on̈ tic scacꞌ co tiꞌ, stzꞌibꞌchajcani to yel ol co cꞌanabꞌajej. Yuj chiꞌ tzꞌochcan sello yedꞌ sbꞌi ebꞌ cajalil, ebꞌ levita yedꞌ ebꞌ sacerdote dꞌa chꞌan̈ uum tic, xchi ebꞌ vin̈ dꞌa slesal chiꞌ.