Ix yavtej chꞌan̈ ley vin̈aj Esdras dꞌa yichan̈ masanil anima
8
1-2 Ayic ix el yich yuquil uj, ix smolbꞌej sbꞌa masanil ebꞌ anima dꞌa Jerusalén chiꞌ, ix cot junjun ebꞌ dꞌa schon̈abꞌ, ix javi ebꞌ bꞌaj ay jun puerta bꞌaj tzꞌel ebꞌ ix ix icꞌoj aꞌ. Ix alji dꞌa vin̈aj sacerdote Esdras cꞌaybꞌum paxi to syicꞌcot chꞌan̈ ley Moisés vin̈, aton jun ley chiꞌ acꞌbꞌil yuj Jehová dꞌa chon̈abꞌ Israel. A dꞌa bꞌabꞌel cꞌu yic jun uj chiꞌ, ix yicꞌcot chꞌan̈ vin̈ dꞌa yichan̈ ebꞌ anima molanecꞌ chiꞌ, ebꞌ vin̈ vinac yedꞌ ebꞌ ix ix yedꞌ pax ebꞌ unin tzaxo nachajel yuuj. 3 Ix syamanoch vin̈ yavtan chꞌan̈ dꞌa yichan̈ masanil anima chiꞌ dꞌa qꞌuin̈ibꞌalil masanto ix och chimcꞌualil.Ix smaclej val yabꞌ ebꞌ masanil tas aycan dꞌa chꞌan̈ ley chiꞌ. 4 Ix qꞌue lin̈an vin̈aj Esdras chiꞌ dꞌa yibꞌan̈ juntzan̈ te teꞌ ix bꞌochajqꞌue stecꞌnubꞌej vin̈. Axo dꞌa svachꞌ cꞌabꞌ vin̈ ayecꞌ vin̈aj Matatías, vin̈aj Sema, vin̈aj Anías, vin̈aj Urías, vin̈aj Hilcías yedꞌ vin̈aj Maasías. Axo dꞌa sqꞌuexan̈ vin̈ ayecꞌ vin̈aj Pedaías, vin̈aj Misael, vin̈aj Malquías, vin̈aj Hasum, vin̈aj Hasbadana, vin̈aj Zacarías yedꞌ vin̈aj Mesulam. 5 Yujto chaan̈ bꞌaj ayqꞌue vin̈aj Esdras chiꞌ, yuj chiꞌ ayic ix yilan ebꞌ anima chiꞌ smasanil xuyanel chꞌan̈ ley chiꞌ vin̈, ix qꞌue lin̈an ebꞌ. 6 Ix lajvi chiꞌ ix yalan vachꞌ lolonel vin̈ dꞌa Jehová Dios Nivan Yelcꞌochi. Ix tacꞌvi masanil ebꞌ anima chiꞌ, ix yicꞌanchaan̈ scꞌabꞌ ebꞌ, ix yalan ebꞌ: Ichocabꞌtaꞌ, xchi ebꞌ. Ix em n̈ojnaj ebꞌ dꞌa sat luum, ix och ebꞌ ejmelal dꞌa Jehová.
7-8 Ayic ix yavtan chꞌan̈ ley chiꞌ vin̈aj Esdras chiꞌ, axo ebꞌ vin̈ levita, aton vin̈aj Jesúa, vin̈aj Bani, vin̈aj Serebías, vin̈aj Jamín, vin̈aj Acub, vin̈aj Sabetai, vin̈aj Hodías, vin̈aj Maasías, vin̈aj Kelita, vin̈aj Azarías, vin̈aj Jozabed, vin̈aj Hanán yedꞌ vin̈aj Pelaía, a ebꞌ vin̈ ix alan dꞌa stiꞌ ebꞌ anima chiꞌ tas syal chꞌan̈ ley chiꞌ, yic snachajel yuj ebꞌ tas syal chꞌan̈, axo ebꞌ anima chiꞌ ayn̈ej ecꞌ ebꞌ dꞌa yedꞌtal junjun.* 9 Ayic ix yabꞌan ebꞌ anima chiꞌ tas val syal chꞌan̈ ley chiꞌ, ix ocꞌqꞌue ebꞌ. Axo vin̈aj Nehemías yajal yedꞌ vin̈aj sacerdote Esdras chiꞌ yedꞌ ebꞌ levita van yavtan chꞌan̈ ley chiꞌ dꞌa ebꞌ chon̈abꞌ chiꞌ, ix yalan ebꞌ vin̈: A jun cꞌu tic yic Jehová co Diosal yaji, yuj chiꞌ man̈ ex cusoc, man̈ ex ocꞌoc, xchi ebꞌ vin̈. 10 Ix yalanpax vin̈aj Nehemías dꞌa ebꞌ: Ixiquec, bꞌat vaan̈ec. A vael te vachꞌ tze vaꞌa. Tzeyucꞌan acꞌ vino dꞌa tzalajcꞌolal. Tzeyacꞌ yic ebꞌ anima malaj yic bꞌobꞌil yuuj, yujto a jun cꞌu tic yic Jehová co Diosal yaji. Man̈ ex cusoc, yujto a tzalajcꞌolal syacꞌ Jehová, a ayoch quipumaloc, xchi vin̈.
11 Ix cachjipax ebꞌ anima chiꞌ yuj ebꞌ levita chiꞌ icha tic: Actejec eyoqꞌui yujto yic Jehová yaj jun cꞌu tic, man̈ ex cusoc, xchi ebꞌ. 12 Ix lajvi chiꞌ ix bꞌat ebꞌ vael, ix yucꞌan aꞌ ebꞌ, ix yacꞌan yic ebꞌ malaj yic ebꞌ. Ix te tzalaj ebꞌ, yujto ix cham val yabꞌan ebꞌ tas ix yal scꞌaybꞌubꞌal ebꞌ.
Ix och qꞌuin̈ chinama
13-14 Axo dꞌa junxo cꞌu, ix smolbꞌan sbꞌa ebꞌ yajal yaj dꞌa junjun macan̈ yin̈tilal, ebꞌ sacerdote yedꞌ juntzan̈xo ebꞌ levita, yic scꞌaybꞌaj ebꞌ yuj vin̈aj Esdras dꞌa chꞌan̈ ley acꞌbꞌilcan yuj Jehová dꞌa vin̈aj Moisés. Ataꞌ ix ilchaj yuj ebꞌ to ayic tzꞌoch qꞌuin̈ chinama dꞌa yuquil uj dꞌa junjun abꞌil, tzꞌaj ebꞌ israel dꞌa yol chinama chiꞌ. 15 Yuj chiꞌ ix alchajel dꞌa caltac chon̈abꞌ yedꞌ dꞌa Jerusalén to sbꞌat ebꞌ anima dꞌa caltac teꞌ yicꞌcot scꞌabꞌtac teꞌ olivo avabꞌil yedꞌ teꞌ caltacteꞌal olivo, te arrayán, teꞌ palma, ma junocxo yaln̈ej tas teꞌal cꞌayum xiil yic sbꞌo chinama chiꞌ, icha yajcan dꞌa chꞌan̈ ley chiꞌ. 16 Yuj chiꞌ ix bꞌat ebꞌ yicꞌcot teꞌ cꞌabꞌtac teꞌ chiꞌ, axo dꞌa yibꞌan̈ spat ebꞌ ix sbꞌoqꞌue chinama chiꞌ, ma dꞌa yamaqꞌuil spat ebꞌ, ma dꞌa yamaqꞌuil stemplo Dios, ma dꞌa stiꞌ jun puerta bꞌaj tzꞌel ebꞌ ix ix icꞌoj aꞌ, ma dꞌa stiꞌ spuertail yic Efraín. 17 Masanil ebꞌ anima janacxi dꞌa Babilonia, ix sbꞌo schinama ebꞌ chiꞌ, ix och ebꞌ dꞌa yool. Atax dꞌa stiempoal vin̈aj Josué yuninal vin̈aj Nun, malaj bꞌaj ix uji icha jun chiꞌ, yuj val chiꞌ ix te tzalaj ebꞌ anima chiꞌ. 18 Ix yavtan chꞌan̈ ley vin̈aj Esdras chiꞌ dꞌa junjun cꞌu masanto ix tzꞌacvi yuquil cꞌual qꞌuin̈ chiꞌ. Axo dꞌa svajxaquil cꞌual, ix smolbꞌan sbꞌa ebꞌ smasanil yic tzꞌoch ebꞌ ejmelal dꞌa Jehová icha yalan chꞌan̈ ley chiꞌ.