Jesús nak nela tu baxtor gaꞌ
10
Orzeꞌ nzhab Jesús:
―Walika kwaꞌn nin lo go;
xaꞌ gat ño roꞌ kurral plo nzho rë mbëkxiꞌl,
waꞌn xaꞌ zeꞌ.
2 Per xaꞌ ño roꞌ kurral,
xaꞌ zeꞌ nak xaꞌ walika xaꞌ nikina rë mbëkxiꞌl.
Jesús el buen pastor (Juan 10.1-21)
3 No lëꞌ xaꞌ nikina roꞌ kurral,
nixaꞌl xaꞌi par ño xaꞌ nikina rë mbëkxiꞌl zeꞌ,
no nilibeꞌ rë mbëkxiꞌl zeꞌ chi baxtor cheꞌn bima.
No or nigoꞌ xaꞌ bima,
nibezh xaꞌ tugaꞌ rë mbëkxiꞌl zeꞌ kun lë bima.
4 No or nilox nigoche xaꞌ rë mbëkxiꞌl zeꞌ,
orzeꞌ nizhubner xaꞌ lo bima,
orzeꞌ rë ma ñakë tich xaꞌ,
porke nilibeꞌ bima chi xaꞌ.
5 Per tu xaꞌ gat nilibeꞌt rë mbëkxiꞌl zeꞌ,
nayakët bima tich xaꞌ,
lëꞌla karre nikëꞌ bima lo xaꞌ,
gat nzhakbeꞌt bima chi xaꞌ.
6 Midiꞌzh Jesús kureꞌ par nabei chi nganu laxtoꞌ bixaꞌ kwan gab widiꞌzh reꞌ,
per nangazobyekt bixaꞌi.
Jesús nak baxtor wen
7 Orzeꞌ nzhab Jesús xtu wëlt:
―Walika kwaꞌn nin,
na nak nela roꞌ kurral plo ño rë xaꞌ nak nela mbëkxiꞌl da gaꞌ.
8 Rë xaꞌ mbiꞌd lo go or naga yala lo go,
ngok bixaꞌ nela rë men waꞌn gaꞌ,
no nela rë men nzhut men gaꞌ;
per rë men da xaꞌ nak nela mbëkxiꞌl gaꞌ,
une bixaꞌ gat lëꞌt Dios mixëꞌl rë men zeꞌ.
9 Na nak nela roꞌ kurral gaꞌ,
no rë xaꞌ ño leꞌn kurral cheꞌn Dios por na,
lëꞌ bixaꞌ roꞌ lo kwaꞌn nazheꞌb kwaꞌn nzho bixaꞌ,
no gak bixaꞌ nela rë mbëkxiꞌl ma ño no niroꞌ leꞌn kurral par nzhao ma yix nayëꞌ.
10 Per rë xaꞌ nzë namás par liwaꞌn,
no par chil xaꞌ rë men da xaꞌ nak nela mbëkxiꞌl gaꞌ;
per na nzhal par nen yalnaban kwaꞌn nayot lox par go.
11 Lëꞌda nak baxtor xaꞌ nazhiꞌ rë ma cheꞌn,
mbaino ter gat da por lëꞌ bima,
12 per rë xaꞌ nikë zhiꞌn nab tsa por dimi,
or nine xaꞌ lëꞌ tu ma nazheꞌb nzë,
orzeꞌ nilaꞌ nzëꞌb xaꞌ rë mbëkxiꞌl,
nikëꞌ xaꞌ karre,
porke gat lëꞌt xaꞌ xaꞌ nak cheꞌn ma;
orzeꞌ nizen ma nazheꞌb zeꞌ rë mbëkxiꞌl,
mbaino más ma nireꞌchbe orzeꞌ.
13 Men nzhax kaꞌ zeꞌ,
nikëꞌ xaꞌ karre or nine xaꞌ ma nazheꞌb zeꞌ,
nilaꞌ nzëꞌb xaꞌ rë mbëkxiꞌl,
lëꞌ xaꞌ nileꞌ por dimi namás.
14 Orzeꞌ nzhab Jesús:
―Nase nazhiꞌ rë mbëkxiꞌl da,
no nilibeꞌn rë ma da;
mbaino rë ma da,
nilibeꞌ ska rë ma da.
15 Seꞌska nilibeꞌ Xuza da,
no nilibeꞌn Xuza;
mbaino ter gat da por rë men da,
xaꞌ nak nela mbëkxiꞌl gaꞌ.
16 Mbaino kinun más men,
xaꞌ nak nela mbëkxiꞌl,
ma naga yo leꞌn kurral da;
kuzeꞌ nakiꞌn nu bixaꞌ yakan;
no gon bixaꞌ kwaꞌn gapa par kwin bixaꞌ tutsa kun más rë men da xaꞌ nzho leꞌn kurral da,
mbaino tutsa da kina rë bixaꞌ.
17 ’Lëꞌ Xuza Dios nazhiꞌ da,
por niye laxtoꞌn gat da,
par ruban da xtu wëlt.
18 Yent cho men gak gut da chi lëꞌda naziyël gat da.
Zak len gat da,
mbaino zak len ruban da.
Kureꞌ nak kwaꞌn ne Xuza len.
19 No or mbin rë xaꞌ nileꞌ mandad xid rë men Israel xtu wëlt rë widiꞌzh reꞌ,
orzeꞌ xtu wëlt chop mod ngok xigab cheꞌn rë bixaꞌ,
20 nzho bixaꞌ nzhab:
―¿Chon nzhon go kwaꞌn nidiꞌzh xaꞌ baꞌ?
¡Ka mbi mal nzen xaꞌ baꞌ,
kuzeꞌ nzhak miyizh xaꞌ!
21 Per más bixaꞌ nzhab:
―¡Wenka xaꞌ,
porke nagakt diꞌzh tu xaꞌ nzho mbi mal laxtoꞌ saꞌ!
¿No xmod liyak tu xaꞌ nzho mbi mal laxtoꞌ tu men nikal-lo?
Rë men Israel, xaꞌ nileꞌ mandad, nangayilat bixaꞌ Jesús
22 Leꞌn rë zhë zeꞌ,
mer rë mbëoꞌ nayag,
or nzhal lani kwaꞌn nileꞌ bixaꞌ gazob liꞌn cheꞌn yadoꞌ yezh Jerusalén,
Jesús acusado de blasfemia (Juan 10.22-42)
23 dub nikizë Jesús roꞌ yadoꞌ gax laka Roꞌ Pwert cheꞌn Salomón,
24 no zeꞌ migan nayax men xaꞌ nileꞌ mandad xid rë men Israel,
nakaꞌn plo nzo Jesús,
par nzhab bixaꞌ:
―¿Pok ka nel lo no cho lux?
Chi lu nak Krist,
nakaꞌchtal;
binei lo no tuli.
25 Orzeꞌ nzhab Jesús:
―Lëꞌda ni lai lo go,
per gat ñilat go da;
por rë zhiꞌn nazhon kwaꞌn nilen por mandad cheꞌn Xuza niluꞌ,
cho ka da,
26 per gat ñilat go da,
porke gat lëꞌt men da go.
27 Rë xaꞌ nak men da,
nzhon bixaꞌ widiꞌzh da mbaino nilibeꞌn bixaꞌ,
no ñiꞌdkë bixaꞌ ticha;
28 mbaino len,
ban bixaꞌ kun Dios par dubtaꞌ,
no ni nayoraꞌ zhë lox bixaꞌ lon,
no yent cho kubchi bixaꞌ lon.
29 Lëꞌ Xuza michi bixaꞌ lon,
no lëꞌgaka Me más kwaꞌro lo rë kwaꞌn nzho,
no yent cho gak kubchi rë men da lo Me.
30 Lëꞌ Xuza Dios no na,
tutsa nak no.
―Por mandad cheꞌn Xuza milen rë zhiꞌn nazhon xid go;
no nal,
¿por cho tu rë zhiꞌn nazhon reꞌ nzhakla go gut go da kun ke?
33 Orzeꞌ nzhab rë men Israel zeꞌ:
―Nakot no kel por ni tu rë kwaꞌn nazhon mileꞌl baꞌ,
sino por midiꞌzhal kwaꞌn gat lëꞌ lo Dios;
nzhabal,
nakal yubska Dios,
mbaino ¡men yizhyuolx!
34 Per nzhab Jesús lo bixaꞌ:
―¿Chi gat lëꞌt lo ley cheꞌn go nzobniꞌ widiꞌzh reꞌ:
“Na ni,
lëꞌ go nak dios”?
35 Nane be,
par dubtaꞌ wali kwaꞌn nzobniꞌ lo Ley cheꞌn Dios,
yent cho gak chëꞌi.
Men mizaꞌ Dios widiꞌzh reꞌ,
nzhab Me,
xaꞌ reꞌ nak nela Dios gaꞌ.
36 No chi lëꞌ Dios ngule da par mixëꞌl Me da yizhyuo reꞌ,
orzeꞌ,
¿chon nidiꞌzh go,
midizha kwaꞌn gat lëꞌ lo Dios,
por midizha,
nak da Xgaꞌn Dios?
37 No chi lëꞌda gat nile rë kwaꞌn nzhakla Xuza gak,
orzeꞌ bilaꞌ go nayilat go da;
38 per chi nilene,
ter nayilat go da,
namás biwiꞌ go por rë kwaꞌn nilen,
par ne goi no par zobyek go,
lëꞌda tutsa nak kun Xuza,
no tutsa nak ska Xuza kun na.
39 Orzeꞌ xtu wëlt ngokla bixaꞌ ngazen bixaꞌ Jesús,
per mileꞌ Jesús gan yaꞌ bixaꞌ.
40 Orzeꞌ miëk Jesús par xtu roꞌ youꞌ Jordán,
plo mililëiꞌ Juan men leꞌn nits,
zeꞌ miaꞌn Jesús cheꞌp,
41 no zeꞌ,
nayax men ngwatswiꞌ lo Jesús,
kidiꞌzh bixaꞌ:
―Ter nangaleꞌt Juan ni tu rë zhiꞌn nazhon,
per rë kwaꞌn midiꞌzh Juan por miyiꞌ reꞌ,
lëꞌi walika.
42 No zeꞌ nayax men ngwayila Jesús.