Jesús mileꞌ ngwani lo tu men nikal-lo, dizde or ngol
9
No or nzhaded Jesús tu plo,
une Me tu miyiꞌ ngolnu nikal-lo,
2 orzeꞌ minaꞌbdiꞌzh rë men cheꞌn Me lo Me,
nzhab bixaꞌ:
―Maestr,
¿chon dizde ngol miyiꞌ baꞌ nikal-lo xaꞌ?
¿Chi por dol cheꞌn xuz xaꞌi o por cheꞌn xnaꞌ xaꞌi;
o por mis xtol xaꞌi?
Jesús cura a un ciego (Juan 9.1-41)
3 Orzeꞌ nzhab Jesús:
―Gat lëꞌt por xtol xaꞌi,
no ni gat lëꞌ por cheꞌn xuz xaꞌi,
no ni gat lëꞌ por cheꞌn xnaꞌ xaꞌi;
lëꞌi nak par ne men,
yalnazhon cheꞌn Dios por xaꞌ reꞌ.
4 Dub ñani zhë,
nakiꞌn leꞌ be zhiꞌn nazhon cheꞌn Dios,
Me mixëꞌl da,
porke or nzhala yëꞌl,
yentraꞌ cho gak leꞌ zhiꞌn;
5 dub nzon yizhyuo reꞌ,
lëꞌda nak Ki kwaꞌn nizini lo rë men yizhyuo.
6 Or milox midiꞌzh Jesús kureꞌ,
michuk Me lo yuo,
no kun nzhuk reꞌ michaoꞌ Me cheꞌp ben,
orzeꞌ mitsaꞌ Mei zalo miyiꞌ reꞌ,
7 orzeꞌ nzhab Me:
―Wazët lol kun nits leꞌn tank kwaꞌn lë Siloé (widiꞌzh kwaꞌn gab:
“Mixëꞌl xaꞌ”).
No zeꞌ ngwazët xaꞌ nikal-lo reꞌ lo xaꞌ,
no or miëk xaꞌ plo nzo Jesús,
lëꞌ lo xaꞌ ñani la.
8 No rë xaꞌ nzho gax kun lëꞌ xaꞌ,
no rë xaꞌ nilibeꞌ xaꞌ ninaꞌb xaꞌ gon,
nzhab rë men reꞌ lo wech bixaꞌ:
―¿Chi gat lëꞌt miyiꞌ reꞌ xaꞌ nizob ninaꞌb gon zeꞌ?
9 Nzho xaꞌ nzhab:
—Lëꞌ xaꞌi.
No más bixaꞌ nzhab:
—Gat lëꞌt xaꞌi,
per seꞌtaꞌ niluꞌ xaꞌ.
Per yub miyiꞌ reꞌ nzhab:
—Na ka xaꞌ zeꞌ.
10 Orzeꞌ minabdiꞌzh rë men zeꞌ lo miyiꞌ reꞌ:
―¿Xmod ska ngwani lol gaꞌ?
11 Mikab miyiꞌ zeꞌ,
nzhab xaꞌ:
―Lëꞌ xaꞌ lë Jesús zeꞌ,
michaoꞌ cheꞌp ben no mitsaꞌ xaꞌi zalon,
orzeꞌ ne xaꞌ:
“Wazët lol kun nits leꞌn tank kwaꞌn lë Siloé.”
No ngwan zeꞌ,
mizeta lon,
lëꞌchi tuli ngwani lon.
12 Orzeꞌ nzhab rë xaꞌ reꞌ:
―¿Ma xaꞌ zeꞌ nal?
Per nzhab xaꞌ ngwani lo reꞌ:
―Naneta da ma xaꞌ.
Minabdiꞌzh pla men fariseo xmod ngwani lo miyiꞌ nikal-lo zeꞌ
13 Orzeꞌ mbiꞌy bixaꞌ miyiꞌ xaꞌ ngwani lo zeꞌ lo rë men fariseo,
14 no zhë kwaꞌn mitsaꞌ Jesús ben lo miyiꞌ kwaꞌn nikal-lo zeꞌ,
ngoke tu zhë kwaꞌn nileꞌ rë men Israel diskans.
15 Orzeꞌ minabdiꞌzh rë men fariseo zeꞌ lo miyiꞌ xaꞌ ngwani lo reꞌ:
“Xmod ngok ngwani lol”,
nzhab bixaꞌ.
Orzeꞌ nzhab miyiꞌ reꞌ:
―Mitsaꞌ Jesús ben zalon,
orzeꞌ mizëtai,
no nal nzhak niwiꞌn.
16 No nzhab pla men fariseo zeꞌ:
―Xaꞌ mileꞌ kureꞌ,
gat lëꞌt men cheꞌn Dios xaꞌ,
porke gat nzhont xaꞌ nzho zhë kwaꞌn nileꞌ be diskans.
Per más bixaꞌ nzhab:
―No chi lëꞌ xaꞌ baꞌ nzëꞌb xki lo Dios,
orzeꞌ nagakt leꞌ xaꞌ tu rë kwaꞌn nazhon baꞌ.
Kuzeꞌ ngok chop mod mileꞌ rë men zeꞌ xigab.
17 Kuzeꞌ xtu wëlt minaꞌbdiꞌzh bixaꞌ lo miyiꞌ ngwani lo reꞌ:
―Nal lu,
por ngwani lol,
¿kwan nel por xaꞌ reꞌ?
Nkab miyiꞌ reꞌ:
―Xaꞌ reꞌ nak tu xaꞌ nidiꞌzh por Dios.
18 Kuzeꞌ rë men Israel zeꞌ nangayilat bixaꞌ,
chi walika mikal-lo xaꞌ reꞌ por niwiꞌ xaꞌ nal,
haxta ngurezh bixaꞌ xuz xaꞌ reꞌ no xnaꞌ xaꞌ,
19 no minaꞌbdiꞌzh rë men fariseo zeꞌ,
nzhab bixaꞌ:
―¿Chi xgaꞌn go miyiꞌ reꞌ,
xaꞌ nidiꞌzh men,
ngolnu nikal-lo?
¿Mbaino xmod ngok niwiꞌ xaꞌ nal?
20 Orzeꞌ nzhab rop xaꞌ nak xgaꞌne zeꞌ:
―Walika xgaꞌn no xaꞌ reꞌ,
no nane no,
ngolnu xaꞌ kureꞌ,
21 per nanet no xmod ngok miwiꞌ xaꞌ,
no ni nane no cho mileꞌ miwiꞌ xaꞌ.
Unaꞌbdiꞌzh go lo miyiꞌ,
lëꞌ xaꞌ plo la,
yub xaꞌ gak ne lo go,
cho mileꞌ ngwani lo miyiꞌ.
22 Saꞌ midiꞌzh rë xaꞌ nak xgaꞌne zeꞌ,
porke nizheb bixaꞌ,
lëꞌ rë xaꞌ nileꞌ mandad xid rë men Israel miaꞌn la diꞌzh,
lëꞌ bixaꞌ kutin rë men leꞌn yoꞌ plo nitseꞌd bixaꞌ widiꞌzh cheꞌn Dios,
chi cho gon bixaꞌ diꞌzh,
lëꞌ Jesús nak Krist.
23 Kuzeꞌla,
seꞌ nzhab rop xaꞌ nak xgaꞌne zeꞌ:
“Binaꞌbdiꞌzh go lo mbe,
porke lëꞌ mbe plo la.”
24 Orzeꞌ ngurezh rë xaꞌ fariseo zeꞌ miyiꞌ kwaꞌn ngok nikal-lo zeꞌ xtu wëlt par nzhab bixaꞌ:
―Bine kwaꞌn wali lo no,
no lo Dios,
porke no nane,
lëꞌ miyiꞌ baꞌ nzëꞌb xki la lo Dios por gat nzhon xaꞌ nzho zhë ro.
25 Orzeꞌ nzhab xaꞌ ngwani lo zeꞌ:
―Naneta mblë go,
chi wali nzëꞌb xki xaꞌ lo Dios o gat walite;
nab tsa kwaꞌn nanen,
lëꞌda ngol gat ñanit lon,
no nal niwiꞌn.
26 Per xtu wëlt minabdiꞌzh bixaꞌ,
nzhab bixaꞌ:
―¿Kwan ka mileꞌ xaꞌ kun lu?
¿Xmod mileꞌ xaꞌ par ngwani lol?
27 Orzeꞌ nzhab xaꞌ ngwani lo zeꞌ:
―Lëꞌda ni lai lo go,
per gat ñilat goi.
¿Chon nzhakla go nine xtu wëlt?,
o,
¿kwan nu go nzhakla,
gak go men cheꞌn xaꞌ?
28 Orzeꞌ gat lëꞌt mikab bixaꞌ lo miyiꞌ reꞌ,
nzhab bixaꞌ:
―¡Lu nak xpen miyiꞌ baꞌ,
per no nak men cheꞌn Muisés!,
29 porke no nane ka,
Dios midiꞌzh lo Muisés,
per xaꞌ reꞌ,
¡ni nane no plo nzë xaꞌ!
30 Orzeꞌ nzhab miyiꞌ reꞌ:
―¿Kwan kureꞌ nalx?
¡Nanet go plo nzë xaꞌ reꞌ,
per mileꞌ xaꞌ ngwani lon!
31 Mbai rë be nane ka,
Dios gat nzhont kwaꞌn nidiꞌzh men kwaꞌn nileꞌ kwaꞌn gat lëꞌ;
nab tsa nileꞌ Dios kwaꞌn ninaꞌb men xaꞌ nzhon roꞌ Dios.
32 Laltaꞌ gat gon men,
yo tu men leꞌ yani lo xtu men nikal-lo dizde or ngol.
33 No chi gat lëꞌ Dios mixëꞌl miyiꞌ reꞌ,
orzeꞌ nagakt leꞌ xaꞌ ni tu rë zhiꞌn nazhon reꞌ.
34 Orzeꞌ nzhab bixaꞌ lo miyiꞌ reꞌ:
―¡Lu,
por nzëꞌb xkil lo Dios,
kuzeꞌ dizde ngolal nikal-lol!
No nal,
¿ti lu nzhakla tseꞌdal no cheꞌn Dios?
Kuzeꞌ nguloꞌtin bixaꞌ miyiꞌ reꞌ leꞌn yoꞌ plo nitseꞌd bixaꞌ widiꞌzh cheꞌn Dios.
Men xaꞌ gat nilibeꞌt Dios
35 No or mbin Jesús,
nguloꞌtin bixaꞌ miyiꞌ xaꞌ ngwani lo zeꞌ,
leꞌn yoꞌ plo nitseꞌd bixaꞌ widiꞌzh cheꞌn Dios,
no or ngwazhëꞌl Jesús miyiꞌ xaꞌ ngwani lo reꞌ,
orzeꞌ minaꞌbdiꞌzh Jesús lo xaꞌ:
―¿Chi ñilal Xgaꞌn Dios,
xaꞌ nu nak tu men yizhyuo?
36 Orzeꞌ nzhab miyiꞌ reꞌ:
―Lëꞌ go,
bine go lon,
cho xaꞌ zeꞌ par yilan xaꞌ.
37 Nkab Jesús:
―Niwiꞌl lo xaꞌ zeꞌ nal;
kun lëꞌ xaꞌ kidiꞌzhal;
na xaꞌ zeꞌ.
38 Lëꞌchi nguzuxib miyiꞌ reꞌ lo Jesús,
nzhab xaꞌ:
―Lëꞌ go,
na ñila go.
39 Orzeꞌ nzhab Jesús:
―Na nzhal yizhyuo reꞌ par kobeꞌn xmod nak men,
nes par rë xaꞌ nikal-lo,
lëꞌ bixaꞌ yani lo;
no rë xaꞌ zak ñani lo;
lëꞌ bixaꞌ yaꞌn nela men nikal-lo gaꞌ.
40 No pla rë men fariseo xaꞌ nzo kun Jesús zeꞌ,
or mbin bixaꞌ widiꞌzh reꞌ,
orzeꞌ nzhab bixaꞌ lo Jesús:
―¿Kwan gabal,
nikal-lo no orzeꞌ?
Per gat nikalt lo no.
41 Orzeꞌ nzhab Jesús lo bixaꞌ:
―Chi zi go,
nak go nela tu men nikal-lo gaꞌ,
nagapt go dol lo Dios orzeꞌ,
porke lëꞌ Ki cheꞌn Dios zini lo go;
per por zak go ñani lo go nal,
kuzeꞌ net go zubi go lo Ki cheꞌn Dios,
no seꞌgaka ñaꞌn go lo kwaꞌn nzëꞌb xki go lo Dios.