8
Mbaino lëꞌ Jesús nzha par dan kwaꞌn lë Olivo.
2 No xtu riyëꞌl,
garziꞌl laka nzha Jesús leꞌn yadoꞌ xtu wëlt,
orzeꞌ nguzubi rë men lo Me;
orzeꞌ nguzob Jesús zeꞌ no nguzublo Me kiluꞌ Me widiꞌzh cheꞌn Dios lo rë men zeꞌ,
Jesús perdona a mujer condenada (Juan 8.1-11)
3 lëꞌchi mizhin pla xaꞌ kwaꞌn niluꞌ ley kun zipla men fariseo,
no nzhanu bixaꞌ tu unaꞌ lo Jesús kwaꞌn ngwagaꞌ kun xtu miyiꞌ,
no mizo bixaꞌ unaꞌ zeꞌ garol saoꞌ lo más rë men nzhin zeꞌ,
4 orzeꞌ nzhab bixaꞌ lo Jesús:
―Maestr,
lëꞌ unaꞌ reꞌ ngwagaꞌ kun xtu miyiꞌ,
5 no lo ley kwaꞌn milaꞌ Muisés lo be,
rë unaꞌ kwaꞌn nak saꞌ nakiꞌn gat kun ke;
no lu gaꞌ,
¿kwan nel?
6 Seꞌ midiꞌzh bixaꞌ par ne bixaꞌ nabei,
xmod kab Jesús lo kureꞌ,
nes par gak gab bixaꞌ lo rë xaꞌ nileꞌ mandad,
lëꞌ Jesús nzëꞌb xki.
Orzeꞌ nguzobdaꞌ Jesús lo yuo par këꞌ Me letr kun bikwen yaꞌ Me,
7 no como stubi kinaꞌbdiꞌzh bixaꞌ lo Jesús,
orzeꞌ nguzuliska Me par nzhab Me:
―Xaꞌ nzo xid go,
xaꞌ yent kwan nzëꞌb xki lo Dios,
xaꞌ zeꞌ galo laka këꞌ tu ke.
8 Orzeꞌ nguzobdaꞌ Me xtu wëlt lo yuo par mikëꞌ Me más kwaꞌn.
9 Or mbin rë xaꞌ reꞌ kwaꞌn midiꞌzh Jesús,
orzeꞌ mizi bixaꞌ,
lëꞌ bixaꞌ nzëꞌb xki lo Dios,
orzeꞌ nguzublo tugaꞌ bixaꞌ ña,
galo laka rë xaꞌ más ngwagal orzeꞌ lult rë xaꞌ xi,
lult miaꞌn nab tsa Jesús kun unaꞌ zeꞌ.
10 No or nguzuli Jesús,
nzhab Me lo unaꞌ zeꞌ:
―Unaꞌ,
¿ma rë xaꞌ michil lon zeꞌ?
¿Chi yent ni tu rë xaꞌ ne,
lëꞌl nzëꞌb xki?
11 Orzeꞌ nzhab unaꞌ reꞌ lo Jesús:
―Lëꞌ go,
yent ni tu bixaꞌ.
Orzeꞌ nzhab Jesús:
―Ni na,
gat nita lëꞌl nzëꞌb xki;
nal bizë,
per ya naleꞌtraꞌle.
Jesús nak Ki par rë men yizhyuo
12 Jesús midiꞌzh lo rë men xtu wëlt,
nzhab Me:
―Lëꞌda nak ki par rë men yizhyuo reꞌ;
xaꞌ yiꞌdkë ticha,
lëꞌ xaꞌ gap ki kwaꞌn leꞌ,
dubtaꞌ ban xaꞌ kun Dios,
no nayot zhë ban xaꞌ lo nakao.
Jesús es la luz del mundo (Juan 8.12-30)
13 Orzeꞌ nzhab rë men fariseo:
―Per yubal kidiꞌzh por lu,
kuzeꞌ yent cho yila kwaꞌn nidiꞌzhal.
14 Orzeꞌ nzhab Jesús:
―Ter yuba nidiꞌzh por da,
per walika kwaꞌn nidizha;
lëꞌ da nane ka plo nzhala no nane ka plo biꞌn;
per go nanet go plo nzhala no ni nane go plo biꞌn.
15 Lëꞌ go nigobeꞌ xmod nak men di xmod nzë yek go,
per na gat nigobeꞌta xmod nak men kun mis xigab da,
16 per chi kobeꞌn xmod nak men,
orzeꞌ na lei nela xmod ñal kai,
porke gat nabtaꞌ nzo par lene,
sino ke rop no nzo kun Xuza,
Me mixëꞌl da.
17 Haxta nu lo ley cheꞌn go nzobniꞌ,
or chop men nidiꞌzh tutsa kwaꞌn,
orzeꞌ kwaꞌn nidiꞌzh rop xaꞌ reꞌ,
lëꞌi walika.
18 Mbaino na,
walika kwaꞌn nidizha por da,
no Xuza Me mixëꞌl da,
nu ska Me nidiꞌzh,
walika kwaꞌn nidizha.
19 Orzeꞌ minaꞌbdiꞌzh bixaꞌ:
―¿Ma xuzal nal?
Orzeꞌ mikab Jesús:
―Go gat nilibeꞌt go da,
no ni Xuza gat nilibeꞌt go.
No chi ngalibeꞌ go cho da,
nu ska Xuza ngalibeꞌ go orzeꞌ.
20 Rë widiꞌzh reꞌ midiꞌzh Jesús dub kiluꞌ Me widiꞌzh cheꞌn Dios leꞌn yadoꞌ,
nez plo nzob kwaꞌn nila men gon;
no yent cho ngazen Jesús,
porke nagat gal or gut bixaꞌ Me.
Plo biꞌn nagakt bi go
21 Orzeꞌ nzhab Jesús xtu wëlt:
―Lëꞌda biꞌ,
no lëꞌ go kwaꞌn da,
per lëꞌ go lox lo Dios por naban go lo rë kwaꞌn gat lëꞌ;
no plo biꞌn,
nagakt bi go.
22 Orzeꞌ nzhab rë men Israel,
xaꞌ nak zhiꞌn:
―¿Taxa mis lëꞌ xaꞌ gut xaꞌ?
¿Chon nzhab xaꞌ:
“Plo biꞌn nagakt bi go”?
23 No nu nzhab Jesús:
—Go nak men xaꞌ nzhak kwaꞌn nzho yizhyuo reꞌ namás,
per na nzhak rë kwaꞌn nzho lo yibëꞌ;
kuzeꞌ nin lo go,
lëꞌ go nak men yizhyuo reꞌ,
per na gat lëꞌt men yizhyuo reꞌ da.
24 Kuzeꞌ nin lo go,
lëꞌ go lox lo Dios por naban go lo rë kwaꞌn gat lëꞌ;
no chi lëꞌ go gat ñila cho da,
lëꞌ go lox lo Dios.
25 Orzeꞌ minaꞌbdiꞌzh bixaꞌ:
―¿Cho lux?
―nzhab bixaꞌ.
Orzeꞌ nzhab Jesús:
―Lëꞌda nilai lo go,
dizde or galo laka.
26 Nzho dox kwaꞌn ganin lo go por rë kwaꞌn gat lëꞌ kwaꞌn nak go;
no Me mixëꞌl da,
walika kwaꞌn nidiꞌzh Me nak go,
no rë widiꞌzh kwaꞌn nidizha lo rë men,
Me mixëꞌl da nei lon.
27 Per nanganut laxtoꞌ bixaꞌ,
yub Dios midiꞌzh Jesús or nzhab Me,
lëꞌ Xuz Me mixëꞌl Me,
28 kuzeꞌ nzhab Jesús:
―Or lox leꞌ go rë kwaꞌn nzhakla go leꞌ go kun Xgaꞌn Dios,
Me nak ska tu men yizhyuo,
orzeꞌ ne go cho da,
no yent kwan gak len por mis da,
nab tsa nilun lo go kwaꞌn miluꞌ Xuza lon,
29 porke Me mixëꞌl da nzo tutsa kun na;
no gat nilaꞌt Xuza naba,
porke zilitaꞌ nilen kwaꞌn nzhakla Me gak,
no kwaꞌn ño laxtoꞌ Me.
30 No or milox midiꞌzh Jesús kureꞌ,
dox nayax men ngwayila Me.
Xmod nak rë men cheꞌn Dios, no rë men cheꞌn Mizhab
31 Orzeꞌ nzhab Jesús lo rë men Israel,
xaꞌ ñila Jesús:
―Chi lëꞌ go ban dubtaꞌ nela xmod midizha lo go,
orzeꞌ walika nak go men da,
Jesús se enfrenta a falsos discípulos (Juan 8.31-59)
32 mbaino lëꞌ go libeꞌ Yub paꞌ Dios,
Me walika Dios;
orzeꞌ nagaktraꞌ go nela mos nado lo xtu men gaꞌ.
33 Orzeꞌ nzhab rë men Israel zeꞌ:
―Lëꞌ no nzë ben cheꞌn Abraham,
no laltaꞌ gat,
gak no nela mos nado lo ni tu men;
no ¿chon nel,
nagaktraꞌ no mos nado lo xtu men?
34 Orzeꞌ nzhab Jesús:
―Walika kwaꞌn nin,
rë xaꞌ naban lo kwaꞌn gat lëꞌ,
lëꞌi nileꞌ mandad lo bixaꞌ,
nela xmod nileꞌ tu men mandad lo tu mos cheꞌn men.
35 Tu xaꞌ nak mos nado lo xtu men,
nayaꞌnt xaꞌ lizh xaꞌ nikë xaꞌ zhiꞌn cheꞌn dub tiemp ban xaꞌ;
nab tsa xgaꞌn paꞌ xaꞌ nileꞌ mandad zeꞌ,
yaꞌn lizh xuz dub tiemp ban xaꞌ.
36 No chi lëꞌ Xgaꞌn Dios leꞌ,
roꞌ go lo kwaꞌn gat lëꞌ,
walika kwaꞌn nin,
nagaktraꞌ go nela tu mos nado lo xtu men.
37 Na nane ka,
lëꞌ go nzë ben cheꞌn Abraham,
per nzhakla go gut go da,
por gat ñila go kwaꞌn nidizha.
38 Mbaino rë kwaꞌn nidizha lo go,
lo Xuza mitseꞌdai;
no saꞌ ska go,
nileꞌ go rë kwaꞌn mitseꞌd go lo xuz go.
39 Orzeꞌ nzhab bixaꞌ lo Jesús:
―Per no se,
¡Abraham nak xuz no!
Orzeꞌ nzhab Jesús:
―Chi lëꞌ go walika nzë ben cheꞌn Abraham,
orzeꞌ ñal ban go nela xmod miban Abraham gaꞌ,
40 mbaino dubtaꞌ midizha lo go nela xmod nzhakla Dios,
mbaino dub saꞌ nzhakla go gut go da;
¡per Abraham nangayot ngak xaꞌ saꞌ!
41 Rë kwaꞌn nileꞌ xuz go kuzeꞌ nileꞌ go.
Orzeꞌ nzhab bixaꞌ:
―Gat lëꞌt chola men nak xuz no;
¡nab tsa Dios nak Xuz no!
42 Orzeꞌ nzhab Jesús:
―Chi lëꞌi walika Dios nak Xuz go,
orzeꞌ lëꞌ go ngachizhiꞌ da,
porke Dios mixëꞌl da,
nzon kun go reꞌ;
no gat lëꞌt tli nzhala,
Dios ka mixëꞌl da yizhyuo reꞌ.
43 Gat nizobyekt go widiꞌzh da por gat nzhaklat go gon goi.
44 Lëꞌ yub Mizhab nak xuz go,
por nileꞌ go kwaꞌn nzhakla xaꞌ.
Lëꞌ Mizhab nak tu xaꞌ nzhut men dizde or nguio yizhyuo,
no laltaꞌ gat nzhudiꞌzht xaꞌ kwaꞌn wali.
Or nikëꞌ xaꞌ mbël,
orzeꞌ niluꞌ kwan nak xaꞌ;
pura kwaꞌn mbël nidiꞌzh xaꞌ porke lëꞌ xaꞌ nikiꞌl men nidiꞌzh men kwaꞌn mbël.
45 Ter kidizha kwaꞌn wali,
per gat ñilat goi.
46 ¿Cho tu go gak ne,
kwan tu kwaꞌn nak da?
No chi nidizha kwaꞌn wali,
orzeꞌ,
¿chonska gat ñila go da?
47 Xaꞌ nak men cheꞌn Dios,
nzhon xaꞌ widiꞌzh cheꞌn Dios,
per go,
gat nzhont go widiꞌzh cheꞌn Dios,
kuzeꞌ gat lëꞌt men cheꞌn Dios go.
Ni naga gal Abraham, lëꞌ Krist nzho la
48 Orzeꞌ nzhab rë men Israel zeꞌ:
―¡Walika kwaꞌn ne no:
Lu tu men Samaria,
mbaino nzhak miyizhal,
mbi mal nzho laxtoꞌl!
¿Kwan nidiꞌzhal?
49 Orzeꞌ nzhab Jesús lo bixaꞌ:
―Ni tu mbi mal gat nzhot laxtoꞌn,
no nab tsa nidizha pura kwaꞌn wen por Xuza;
per go gat nzhont go nzhoꞌn.
50 Na gat nikwantaꞌ diꞌzh men wen ticha,
per nzho xtu Me nzhakla diꞌzh men wen por da,
no Me reꞌ ñal kobeꞌ (wiꞌ) xmod nak da.
51 Dox wali kwaꞌn nin lo go,
xaꞌ yila widiꞌzh da,
nayot gat xaꞌ.
52 Orzeꞌ nzhab rë men Israel zeꞌ:
―¡Nalse walika,
nzho mbi mal laxtoꞌl!
Abraham no rë xaꞌ midiꞌzh por Dios,
ngut ka bixaꞌ,
no nel lo no:
“¡Men xaꞌ yila widiꞌzh da nayot gat xaꞌ!”
53 ¿Chi más tsakal lo xuz no Abraham orzeꞌ?
Lëꞌ xaꞌ ngut,
no más rë xaꞌ midiꞌzh por Dios nzhala,
no lu,
¿cho nileꞌl xigab nakal?
54 Orzeꞌ nzhab Jesús:
―Chi mis da nidizh wen da,
orzeꞌ natsakt kwaꞌn nidizha;
per Me nidiꞌzh wen por da nak Xuza;
yub Me kwaꞌn nidiꞌzh go nak Dios cheꞌn go,
55 per nangayot ngalibeꞌ go Me,
per na nilibeꞌ ka Me.
No chi nin lo go,
gat nilibeꞌtaꞌ Me,
mbël da orzeꞌ nela go gaꞌ.
Per na ni,
lëꞌda nilibeꞌ ka Me,
no nilen kwaꞌn mikaꞌb Me lon.
56 Abraham xaꞌ ngok xuz go nzhala,
dox mizak laxtoꞌ xaꞌ or mbin xaꞌ zhin zhë yala,
no une xaꞌi,
orzeꞌ más mizak laxtoꞌ xaꞌ.
57 Orzeꞌ nzhab rë men Israel zeꞌ lo Jesús:
―Nagat gapal ni choꞌ bichiꞌ liꞌn,
¿no nidiꞌzhal,
unel Abraham?
58 Orzeꞌ nzhab Jesús:
―Dox wali kwaꞌn nin lo go,
ni naga gal Abraham,
lëꞌda nzhoꞌ la.
59 Orzeꞌ nguzen bixaꞌ ke par këꞌ bixaꞌi taꞌ Jesús,
per nguiukaꞌch Jesús lo bixaꞌ,
orzeꞌ nguroꞌ Jesús leꞌn yadoꞌ.