Dxal-laꞌ gundxu zrin chee̱ Dios guchínedxu ca da ba nunna Dios dxiꞌu
4
Chee̱ le̱ naꞌ,
ca be̱n Cristo,
gudée̱ꞌ xel-laꞌ ziꞌ lu be̱laꞌ dxen chee̱ꞌ,
cáꞌanqueze leꞌe dxal-laꞌ si lu nale tele xel-laꞌ ziꞌ laweꞌ da che tu benneꞌ ba gudée̱ꞌ xel-laꞌ ziꞌ lu be̱laꞌ dxen chee̱ꞌ,
ba bzua bénneaꞌ chaláꞌala da naca dul-la,
2 chee̱ gune̱ꞌ ca da dxaca lazreꞌ Dios dxácate̱ naca bane̱ꞌ,
ne quebe gune̱ꞌ ca da dxenná be̱laꞌ dxen chee̱ꞌ.
3 Naze cátite da ba be̱nle gate nate da dxeledanne benneꞌ quebe zaj núnbeꞌe̱ Dios.
Ca lu iza da ba guledé be̱nle da sban caꞌ,
ne da zrinnaj caꞌ da guzá lázrele,
ne guzúzrele,
ne be̱nle laní sban caꞌ.
Güéꞌele̱ꞌe̱le,
ne bcaꞌana szrenle bedauꞌ xiaj xaga caꞌ da naꞌ dxecuide Dios.
4 Benneꞌ caꞌ quebe zaj núnbeꞌe̱ Dios dxelexebánene̱ꞌ laweꞌ da québedxa dxunle le̱ꞌ tuze ca naca da sban da dxelune̱ꞌ,
naꞌ chee̱ le̱ naꞌ dxelenné̱ꞌ schanniꞌ chee̱le.
5 Benneꞌ caꞌ,
dxun na ba xen xululéꞌene̱ꞌ ca da zaj nune̱ꞌ lau Bénneaꞌ naca chee̱ꞌ guchiꞌe̱ chee̱ benneꞌ ban caꞌ,
ne chee̱ benneꞌ gate caꞌ.
6 Benneꞌ caꞌ zaj nate belenne̱ꞌ ca naca dizraꞌ chee̱ Dios chee̱ xelexaca bane̱ꞌ lu beꞌ zaj nácaquezeꞌ ca naca ban Dios,
lácala lu xe̱zr la xu nigá Dios bchiꞌe̱ ca da belune̱ꞌ ca guchiꞌe̱ chee̱ xúgute̱ bénneache.
7 Ba za cheajsé̱ chee̱ xúgute̱ da dxeléꞌedxu.
Chee̱ le̱ naꞌ,
le sua ban lazreꞌ,
ne le guchálajle̱queze Dios.
8 Da nácadxa blau,
le zríꞌile̱ꞌe̱ ljwézrele.
Che nazríꞌidxu benneꞌ bíchedxu caꞌ,
naꞌ gunite laudxu da calela da belune̱ꞌ chee̱dxu.
9 Le guzúa lízrele ljwézrele tule xetule,
ne quebe nne̱le chee̱ ljwézrele.
10 Tu tule leꞌe dxal-laꞌ gunle zrin chee̱ ljwézrele ca da nunna Dios chee̱le,
ca benneꞌ dxuluchínene̱ꞌ chaweꞌ ca da chaweꞌ da dxunezruj Dios chee̱ꞌ.
11 Che nu benneꞌ dxuchálaje̱ꞌ,
dxal-laꞌ guchálaje̱ꞌ da gunezruj Dios le̱ꞌ.
Che nu benneꞌ gune̱ꞌ zrin chee̱le,
dxal-laꞌ gune̱ꞌ na guchínene̱ꞌ xel-laꞌ waca chee̱ꞌ da nunezruj Dios le̱ꞌ.
Ca naca xúgute̱ da dxunle,
dxal-laꞌ gaca ba Dios laweꞌ da nácale bi chee̱ Jesucristo,
naꞌ chee̱ Le̱ꞌ gaca xel-laꞌ szren,
ne xel-laꞌ dxenná bea chadía chacanna.
¡Caꞌan gaca na!
Wadedxu xel-laꞌ ziꞌ laweꞌ da nácadxu bi chee̱ Cristo
12 Benneꞌ bíchaꞌdauꞌ nazriꞌite̱ lazraꞌ,
quebe xebánele ca naca xel-laꞌ ziꞌ zren da tele,
quebe guéquele naca na tu da quebe dxal-laꞌ gaca.
13 Le be laweꞌ da tele xel-laꞌ ziꞌ ca xel-laꞌ ziꞌ da gudé Cristo chee̱ cáꞌanqueze béle̱ꞌe̱le gate léꞌele xel-laꞌ szren chee̱ Cristo gate zezé̱ꞌe̱.
14 Che dxulugazjaꞌ benneꞌ leꞌe dizraꞌ laweꞌ da nácale bi chee̱ Cristo,
ba neza zren naca na chee̱le,
laweꞌ da zúale̱ Beꞌ Láꞌazxa chee̱ Dios leꞌe,
Bénneaꞌ ze̱ꞌe̱ xabáa.
Dxelenné̱ bénneache schanniꞌ chee̱ Le̱ꞌ,
san leꞌe dxápale Le̱ꞌ ba láꞌana.
15 Che núlale leꞌe dxedele xel-laꞌ ziꞌ,
quebe dxal-laꞌ gaca na laweꞌ da bé̱tele benneꞌ,
u bi gulanle chee̱ benneꞌ,
u bi da zrinnaj be̱nle,
u laweꞌ da guchixre chee̱le da naca chee̱ benneꞌ xula.
16 Che nu benneꞌ dxedée̱ꞌ xel-laꞌ ziꞌ laweꞌ da naque̱ꞌ bi chee̱ Cristo,
quebe dxal-laꞌ xeduéꞌene̱ꞌ,
san dxal-laꞌ güe láꞌane̱ꞌ Dios laweꞌ da nazí le̱ꞌ bi chee̱ Cristo.
17 Ba bzrin zra su lau Dios guchiꞌe̱ ca da zaj nun tu tu bi nácabeꞌ chee̱ Le̱ꞌ.
Che Dios su lawe̱ꞌ guchiꞌe̱ ca da nundxu dxiꞌu,
¿ájala gaca chee̱ benneꞌ caꞌ quebe dxelune̱ꞌ ca dxenná dizraꞌ chaweꞌ chee̱ Dios?
18 Che benneꞌ xrlátaje caꞌ cánnaze xelelé̱ꞌ ¿ájazraqueze gaca chee̱ benneꞌ we̱n da zrinnaj caꞌ,
ne chee̱ benneꞌ we̱n dul-la caꞌ?
19 Caní naca,
benneꞌ dxeledée̱ꞌ xel-laꞌ ziꞌ laweꞌ da dxelune̱ꞌ da xrlátaje da dxaca lazreꞌ Dios,
dxal-laꞌ xelúnqueze̱ꞌ da xrlátaje,
ne xuluzúe̱ꞌ bénneꞌdu zaj xuꞌe̱ lu naꞌ Dios,
Bénneaꞌ be̱ne̱ꞌ leꞌ,
laweꞌ da naca Le̱ꞌ li lazreꞌ.