Pedro dxuzéajniꞌine̱ꞌ bi caꞌ chee̱ Cristo
5
Dxuzéajniꞌidaꞌ leꞌe,
benneꞌ gula dxuxúele tu tu cueꞌ bi caꞌ chee̱ Cristo laweꞌ da nacaꞌ nedaꞌ benneꞌ gula ca leꞌe,
ne dxexeche̱baꞌ ca xel-laꞌ ziꞌ da gudé Cristo,
ne cáꞌanqueze laweꞌ da gúnnaqueze̱ꞌ nedaꞌ,
ne leꞌe,
chee̱ sidxu da xabáa chee̱ꞌ da guléꞌene̱ꞌ te chee̱ zra caní.
2 Ca dxelún benneꞌ dxuluxúe̱ꞌ zrilaꞌ caꞌ,
le guxúe bidu caꞌ chee̱ Dios,
bénneꞌdu caꞌ nabágale.
Le gun na dute̱ lázrdaule ca dxaca lazreꞌ Dios,
quebe gun na ba xen nu benneꞌ nna béꞌene̱ꞌ leꞌe,
ne quebe gunle ba chee̱ dumí.
Le gun zrin du lázrele,
3 ne quebe gun cuínale ca xrane bénneꞌdu caꞌ nabágale.
Le gun ba xuzre gácale tu da guléꞌe na ca dxal-laꞌ xelún bénneꞌdu caꞌ.
4 Caní gaca,
gate xeláꞌ Xránadxu,
Benneꞌ Blau dxuxúe̱ꞌ zrilaꞌ caꞌ,
sile tu lazruj da naca na chee̱ xabáa,
da quebe te chee̱ na.
5 Cáꞌanqueze leꞌe,
benneꞌ cuideꞌ,
le gun ca da dxelenná benneꞌ gula caꞌ.
Xúgute̱le dxal-laꞌ guzúale dizraꞌ chee̱ ljwézrele tule xetule lu xel-laꞌ dxexruj lazreꞌ chee̱le laweꞌ da dxenná xiche láꞌazxa:
Dios dxezré̱ꞌe̱ benneꞌ caꞌ dxulucáꞌana szren cuine̱ꞌ.
Dute̱ xel-laꞌ chaweꞌ chee̱ꞌ dxácale̱ne̱ꞌ benneꞌ dxexruj lazreꞌ caꞌ.
6 Le guzexruj lázrele lu xel-laꞌ dxenná bea zren chee̱ Dios,
naꞌ xechisa Le̱ꞌ leꞌe ca zrin zra chee̱ na.
7 Le guzúa lu naꞌ Dios xúgute̱ da dxele gunne xue,
laweꞌ da dxeꞌ Le̱ꞌ gunne xue da naca chee̱le.
8 Le gaca benneꞌ li lazreꞌ,
ne le sua ban lazreꞌ laweꞌ da dxedá da xriweꞌ,
da naꞌ dxezráꞌa na leꞌe,
ne naca na ca tu be̱zre xixreꞌ,
dxebezre xaꞌabaꞌ,
dxíljabaꞌ nu gué̱bebaꞌ.
9 Le tíl-lale̱ da xriweꞌ,
ne le se̱ chacha lu xel-laꞌ dxeajlí lazreꞌ chee̱le,
laweꞌ da nézquezle dxeledéqueze xúgute̱ bíchele zaj zre̱ꞌe̱ lu xe̱zr la xu nigá xel-laꞌ ziꞌ ca da dxedele leꞌe.
10 Gate bache gudele xel-laꞌ ziꞌ tu chiꞌi,
Dios gune̱ꞌ leꞌe li lazreꞌ,
ne guzúa chawe̱ꞌe̱ leꞌe.
Dios náꞌqueze dxunne̱ꞌ dxiꞌu xúgute̱ da chaweꞌ chee̱ꞌ,
ne ba gunné̱ꞌ dxiꞌu chee̱ gápadxu da naca chee̱ xabáa chee̱ꞌ laweꞌ da nácadxu bi chee̱ Jesucristo.
11 Gaca ba Le̱ꞌ,
ne chee̱ꞌ Le̱ꞌ gaca xel-laꞌ dxenná bea chadía chacanna.
¡Caꞌan gaca na!
Pedro dxugape̱ꞌ diuzre bi bíchedxu caꞌ
12 Silvano,
benneꞌ nigá dxéquedaꞌ naqueꞌ tu bi bíchedxu li lazreꞌ,
ba bzuaje̱ꞌ dizraꞌ caní chee̱le leꞌe cáte̱ze nedaꞌ,
Pedro,
ba guchaꞌ le̱ꞌ guzúaje̱ꞌ.
Dxuzéajniꞌidaꞌ leꞌe,
ne dxapaꞌ leꞌe ca naca da xrlátaje da ba guzile da dxululéꞌe na Dios nazriꞌine̱ꞌ leꞌe.
Le se̱ chacha ca zaj naca da caní.
13 Bi chee̱ Cristo zaj zre̱ꞌe̱ Babilonia nigá,
benneꞌ caꞌ gucáꞌa Dios ca guqué̱ꞌe̱ leꞌe,
dxulugape̱ꞌ leꞌe diuzre.
Cáꞌanqueze Marcos,
bi naꞌ nácabeꞌ ca bi cheé̱quezaꞌ dxugápabeꞌ leꞌe diuzre.
14 Le gugapa diuzre ljwézrele tule xetule,
ne le gunidaꞌ ljwézrele lu xel-laꞌ zriꞌi lazreꞌ.
Dxenabaꞌ lau Dios gunne̱ꞌ leꞌe xel-laꞌ dxebeza zri lazreꞌ,
leꞌe nácale bi caꞌ chee̱ Jesucristo.
¡Caꞌan gaca na!