DIZRAꞌ GUDXUPEꞌ DA BZUAJ SAN PEDRO
Dizraꞌ da gusel-la San Pedro chee̱ bi caꞌ chee̱ Jesús
1
Nedaꞌ,
Simón Pedro,
nacaꞌ we̱n zrin chee̱ Jesucristo,
ne benneꞌ gubáz chee̱ꞌ.
Dxuzúajaꞌ da nigá chee̱le leꞌe,
ba nápale xel-laꞌ dxeajlí lazreꞌ da zácale̱ꞌe̱,
ne naca tuze ca da nápantuꞌ netuꞌ.
Caní naca laweꞌ da naca li lazreꞌ Dios chee̱dxu,
ne Benneꞌ Weselá chee̱dxu Jesucristo.
2 Dxenabaꞌ lau Dios gúnnale̱ꞌe̱ leꞌe da chaweꞌ chee̱ꞌ,
ne xel-laꞌ dxebeza zri lazreꞌ,
laweꞌ da núnbeale Dios,
ne Xránadxu Jesús.
Ca dxal-laꞌ gaca bi chee̱ Cristo
3 Dios lu xel-laꞌ waca chee̱ꞌ ba nunne̱ꞌ dxiꞌu xúgute̱ da nachínedxu chee̱ gápadxu xel-laꞌ nabán chee̱ Le̱ꞌ,
ne chee̱ gaca gundxu zrin chee̱ꞌ,
laweꞌ da núnbeadxu Bénneaꞌ gunné̱ꞌ dxiꞌu chee̱ gápadxu da xabáa chee̱ Le̱ꞌ,
ne xel-laꞌ szren chee̱ꞌ.
4 Caní naca na,
ba nunne̱ꞌ dxiꞌu ca da nache̱be lazre̱ꞌ,
da zaj naca na szrénle̱ꞌe̱,
ne da zaj zácale̱ꞌe̱ na,
chee̱ ne̱ chee̱ da guche̱be lazre̱ꞌ wazruéꞌele leꞌe gácale ca nácaqueze Dios,
ne chee̱ lale lu da sban da dxaca lu xe̱zr la xu nigá ne̱ chee̱ da dxezá lazreꞌ be̱laꞌ dxen chee̱ bénneache.
5 Chee̱ le̱ naꞌ dxal-laꞌ cueꞌle gunne xue gun xel-laꞌ dxeajlí lazreꞌ chee̱le gunle da xrlátaje,
ne chee̱ gun da xrlátaje da dxunle gácale benneꞌ sina.
6 Xel-laꞌ sina chee̱le dxal-laꞌ gun na nna beꞌe cuínale,
naꞌ xel-laꞌ dxenná beꞌe cuina chee̱le dxal-laꞌ gun na gácale benneꞌ zren lazreꞌ,
naꞌ xel-laꞌ zren lazreꞌ chee̱le dxal-laꞌ gun na zriꞌile Dios.
7 Xel-laꞌ zriꞌi lazreꞌ chee̱le nen Dios dxal-laꞌ gun na zriꞌile benneꞌ bíchedxu caꞌ,
naꞌ xel-laꞌ zriꞌi lazreꞌ chee̱le nen bíchele caꞌ dxal-laꞌ gun na gácale zriꞌi lazreꞌ.
8 Che leꞌe dxunle da caní,
ne dxele̱pe ban na,
quebe xegáꞌana cáꞌaze xel-laꞌ nabán chee̱le,
ne quebe naca na níteze núnbeale Xránadxu Jesucristo.
9 Benneꞌ quebe dxune̱ꞌ da caní naque̱ꞌ ca benneꞌ la chul-la,
u ca benneꞌ quebe dxenné̱ꞌe̱ ca da za zaꞌ.
Ba gul-la lazre̱ꞌ guxádxie̱ꞌ ca naca chee̱ dul-la caꞌ da be̱ne̱ꞌ gate nate.
10 Chee̱ le̱ naꞌ,
benneꞌ bíchaꞌdauꞌ,
le gun ba xuzre nézele Dios gunné̱ꞌ leꞌe,
ne ba guqué̱ꞌe̱ leꞌe,
naꞌ che gunle da nigá,
cabataꞌ cheajcházele.
11 Caní gun Dios,
gúnnale̱ꞌe̱ leꞌe lataj chuꞌule naga nna bea Xránadxu,
ne weselá chee̱dxu Jesucristo chadía chacanna.
12 Chee̱ le̱ naꞌ tu dxusáꞌazquezaꞌ lázrele da caní,
lácala ba nézele na,
ne ba ze̱ cháchale lu xel-laꞌ li da ba nápale.
13 Dxácate̱ naca banaꞌ dxéquedaꞌ dxun na ba xen gusáꞌa lázrele chee̱ da caní
14 laweꞌ da ba nezdaꞌ wátezeaꞌ ca ba gunná Xránadxu Jesucristo,
guzre̱ꞌ nedaꞌ.
15 Naꞌa gunaꞌ ca da séquedaꞌ chee̱ gate te gatiaꞌ nedaꞌ,
cheajsá lázrquezle chee̱ da caní.
Benneꞌ beleléꞌene̱ꞌ xel-laꞌ szren chee̱ Cristo
16 Da bsé̱dentuꞌ leꞌe ca naca chee̱ xel-laꞌ szren chee̱ Xránadxu Jesucristo,
ne ca xelé̱ꞌe̱ xecha lasa quebe naca na ca da dxenná xichaj lázrdau bénneache.
Netuꞌ bléꞌequezentuꞌ ca naca xel-laꞌ szren chee̱ Xránadxu.
17 Bléꞌentuꞌ Le̱ꞌ gate Xradxu Dios be̱ꞌe̱ Le̱ꞌ xel-laꞌ ba láꞌana,
ne xel-laꞌ szren,
naꞌ Dios gúzrequeze̱ꞌ Le̱ꞌ lu da xabáa chee̱ꞌ:
“Benneꞌ nigá naque̱ꞌ Zriꞌinaꞌ nazriꞌite̱ lazraꞌ,
ne dxezaca ba lazraꞌ nen Le̱ꞌ.”
18 Nétuꞌqueze bénentuꞌ chiꞌi naꞌ da za na xabáa gate zúantuꞌ nen Xránadxu lu xiꞌa láꞌazxa naꞌ.
19 Chee̱ le̱ naꞌ dxuxrén lázredxantuꞌ dizraꞌ da buluzúaj benneꞌ caꞌ gulenné̱ꞌ waláz chee̱ Dios.
Da xrlátaje dxunle leꞌe laweꞌ da dxenle ca naca dizraꞌ nigá.
Naca na ca tu xiꞌ da dxusení na tu lataj naga naca chul-la ca zrin zra chaníꞌ,
naꞌ Cristo,
Bénneaꞌ naque̱ꞌ ca belaj zila súale̱ne̱ꞌ leꞌe chee̱ guseníꞌe̱ lu xichaj lázrdaule.
20 Le guxúe xanneꞌ ca naca da nigá.
Netú da naxúaj na lu xiche láꞌazxa quebe nu benneꞌ sequeꞌ xuzájle̱ꞌe̱ na lu xel-laꞌ dxéajniꞌi chee̱ze̱ꞌ.
21 Benneꞌ caꞌ buluchálaje̱ꞌ waláz chee̱ Dios quebe buluchálaje̱ꞌ ca da gulaca lázrequeze le̱ꞌ.
Gulaque̱ꞌ benneꞌ chee̱ Dios,
naꞌ gulenné̱ꞌ waláz chee̱ꞌ ca da bnezruj Beꞌ Láꞌazxa le̱ꞌ.