DÍZRAꞌDAUꞌ NEDXU DA BZUAJ SAN PEDRO
Dizraꞌ gusel-la Pedro chee̱ benneꞌ caꞌ gucáꞌa Jesús, ne zaj nase dínnaje̱ꞌ
1
Nedaꞌ,
Pedro,
nacaꞌ benneꞌ gubáz chee̱ Jesucristo.
Dxuzúajaꞌ da nigá chee̱le leꞌe nadxúajle lázrele,
ne zrale xe̱zre caꞌ zaj nababa Ponto,
ne xe̱zre caꞌ zaj nababa Galacia,
ne xe̱zre caꞌ zaj nababa Capadocia,
ne xe̱zre caꞌ zaj nababa Asia,
ne xe̱zre caꞌ zaj nababa Bitinia.
2 Xradxu Dios ba guqué̱ꞌe̱ leꞌe ca da gunné̱ꞌ gate nate.
Ne̱ chee̱ Beꞌ Láꞌazxa ba gucáꞌa Dios leꞌe chee̱ guzúale dizraꞌ chee̱ꞌ,
ne chee̱ chádxele lu dxen chee̱ Jesucristo.
Dxenabaꞌ lau Dios gúnnale̱ꞌe̱ leꞌe da chaweꞌ,
ne xel-laꞌ dxebeza zri lazreꞌ.
Ca da dxebeza lázredxu
3 Dxue láꞌanadxu Dios,
Xra Xránadxu Jesucristo.
Laweꞌ da dxexache lázrele̱ꞌe̱ dxiꞌu ba be̱ne̱ꞌ chee̱dxu bexálajdxu laweꞌ da bebán Jesucristo ládujla benneꞌ gate.
Da nigá nuzaga na dxiꞌu chee̱ cueza lázredxu,
4 ne gun na sile ca da nucueza Dios chee̱le xabáa,
da naꞌ quebe cuia xi na,
ne quebe xexúe na,
ne quebe te chee̱ na.
5 Laweꞌ da dxéajle̱le chee̱ Dios,
Le̱ꞌ guxre̱ꞌ leꞌe nen xel-laꞌ waca chee̱ꞌ ca zrindxa zra naꞌ sile du ca naca xel-laꞌ weselá da nucueze̱ꞌ chee̱dxu,
naꞌ guléꞌene̱ꞌ na lu zra bze̱be niꞌ.
6 Chee̱ le̱ naꞌ dxebéle̱ꞌe̱le lácala dxun na ba xen tele xel-laꞌ ziꞌ tu chíꞌidauꞌ.
7 Xel-laꞌ dxeajlí lazreꞌ chee̱le gaca chee̱ na ca dxaca chee̱ oro da dxedé na lu xiꞌ chee̱ xegáꞌana chaweꞌ na.
Caní naca chee̱ xel-laꞌ dxeajlí lazreꞌ chee̱le,
gate ba gudé na lu xel-laꞌ ziꞌ,
naꞌ xegáꞌana na da zácadxa chee̱ sile xel-laꞌ szren,
ne xel-laꞌ ba láꞌana lu zra naꞌ gate xeláꞌ Jesucristo.
8 Leꞌe nazriꞌile Jesucristo lácala quebe ne léꞌele Le̱ꞌ,
naꞌ laweꞌ da nuxrén lázrele Le̱ꞌ lácala quebe ne xeléꞌele Le̱ꞌ,
dxebéle̱ꞌe̱le.
Ca naca xel-laꞌ dxebé chee̱le naca na da zrente̱ da quebe séquentuꞌ xuzájlaꞌantuꞌ
9 laweꞌ da nalá bénneꞌdu xuꞌule laweꞌ da dxéajle̱le chee̱ Dios.
10 Lu iza da ba guledé gate nate,
benneꞌ caꞌ gulenné̱ꞌ waláz chee̱ Dios buluxúe xánnie̱ꞌ,
ne belexebéajniꞌe̱ ca naca chee̱ xel-laꞌ weselá nigá,
naꞌ buluchálaje̱ꞌ ca naca xel-laꞌ chaweꞌ chee̱ Dios da gunne̱ꞌ leꞌe.
11 Beꞌ Láꞌazxa,
Bénneaꞌ gusel-la Cristo,
bzéajniꞌine̱ꞌ benneꞌ caꞌ buluchálaje̱ꞌ waláz chee̱ Dios gate nate ca da saca Cristo,
ne ca naca xel-laꞌ szren da siꞌe̱ te naꞌ,
naꞌ benneꞌ caꞌ belexexílaje̱ꞌ nuzra benneꞌ nigá,
ne bátala gaca da dxenná Beꞌ Láꞌazxa,
Bénneaꞌ zúale̱ le̱ꞌ.
12 Dios bzéajniꞌine̱ꞌ benneꞌ caꞌ ca naca chee̱ da naꞌ dxuluchálaje̱ꞌ,
gunné̱ꞌ quebe naca na chee̱ lé̱queze̱ꞌ,
san naca na chee̱dxu dxiꞌu.
Naꞌa,
da nigá naca dizraꞌ chaweꞌ da ba bénquezle,
da buluchalaj benneꞌ caꞌ ne̱ chee̱ Beꞌ Láꞌazxa,
Bénneaꞌ ze̱ꞌe̱ xabáa.
Da caní gulaca lazreꞌ gubáz chee̱ xabáa xeléajniꞌine̱ꞌ.
Dios dxenné̱ꞌ dxiꞌu chee̱ gácadxu bi láꞌazxa chee̱ꞌ
13 Chee̱ le̱ naꞌ,
le guxúe xanneꞌ ca da gunle.
Tu dxál-lazqueze gunle da xrlátaje.
Dute̱ lázrdaule le guxrén lazreꞌ xel-laꞌ chaweꞌ chee̱ Dios,
ne le cueza da gunne̱ꞌ leꞌe lu zra naꞌ gate xeláꞌ Jesucristo.
14 Laweꞌ da nácale bi chee̱ Dios,
le guzúa dizraꞌ chee̱ꞌ,
ne québedxa gunle ca da guzá lázrele gate quebe ne gúnbeale Dios.
15 Naꞌa,
le ta lu xel-laꞌ láꞌazxa chee̱ꞌ laweꞌ da naca Dios láꞌazxa,
Bénneaꞌ gunné̱ꞌ leꞌe.
16 Cáꞌanqueze naxúajqueze na lu xiche láꞌazxa chee̱ꞌ,
dxenné̱ꞌ:
“Le gaca láꞌazxa,
laweꞌ da nacaꞌ nedaꞌ láꞌazxa.”
17 Che dxennale leꞌe naca Dios Xrale,
naꞌ Le̱ꞌ dxuchiꞌe̱ ca da dxelún bénneache,
dxal-laꞌ zrébele Le̱ꞌ dxácate̱ ne zúale lu xe̱zr la xu nigá.
18 Dios ba bselé̱ꞌ leꞌe lu da benle gate naꞌ guxíajle̱le ca da belún xra xrtaule,
da cale̱la,
naꞌ ba nézquezle quebe guca na ne̱ chee̱ tu da dxuzru na ca oro,
ne plata.
19 Bselé̱ꞌ leꞌe ne̱ chee̱ dxen zácale̱ꞌe̱ chee̱ Cristo,
Bénneaꞌ bzua cuine̱ꞌ lau Dios ca tu zrílaꞌdauꞌ du lazreꞌ,
ne quebe nadxenbaꞌ,
be̱ dxelutie̱ꞌ chee̱ xunite lau Dios dul-la zaj nabague̱ꞌ.
20 Cristo ba nácaqueze chee̱ꞌ gate nate saque̱ꞌ da nigá,
naꞌ ble̱ꞌe̱ lu zra caní chee̱ gaca chaweꞌ chee̱le.
21 Ne̱ chee̱ Cristo dxéajle̱le chee̱ Dios,
Bénneaꞌ bsebane̱ꞌ Le̱ꞌ ládujla benneꞌ gate,
ne bcaꞌane̱ꞌ Le̱ꞌ szren.
Chee̱ le̱ naꞌ dxéajle̱le chee̱ Dios,
ne dxuxrén lázrele Le̱ꞌ.
22 Naꞌa,
ba bzúale dizraꞌ chee̱ xel-laꞌ li ne̱ chee̱ Beꞌ Láꞌazxa,
chee̱ zriꞌile dute̱ lázrdaule benneꞌ zaj nababe̱ꞌ dxiꞌu.
Chee̱ le̱ naꞌ dxal-laꞌ zriꞌile ljwézrele tule xetule dute̱ lázrdaule,
ne dute̱ xel-laꞌ wala chee̱le.
23 Caní naca na laweꞌ da ba bexálajle,
quegá chee̱ bénneache,
benneꞌ dxelate.
Nálajle ne̱ chee̱ dizraꞌ chee̱ Dios,
da naca ban na,
ne da zua na chadía chacanna.
24 Caní naca na laweꞌ da naxúaj na lu xiche láꞌazxa,
da dxenná na:
Xúgute̱ bénneache zaj naque̱ꞌ ca xixreꞌ,
naꞌ xel-laꞌ szren chee̱ꞌ naca na ca xiaj chee̱ xíxreꞌdu caꞌ.
Xixreꞌ naꞌ dxebizre na,
naꞌ xiaj chee̱ na dxexruj na.
25 Dizraꞌ chee̱ Xránadxu zúatequeze na chadía chacanna.
Dizraꞌ nigá ba benle leꞌe ne̱ chee̱ dizraꞌ chaweꞌ da dxuchálajntuꞌ.