2
Chee̱ le̱ naꞌ,
québedxa gunle da cale̱la.
Québedxa nu si xe̱le,
ne quebe gunle láweze da xrlátaje.
Québedxa gácale xa lazreꞌ,
ne quebe bi nne̱le chee̱ ljwézrele.
2 Cáte̱ze dxeledane bidu dxeꞌene caꞌ nizreꞌ,
caꞌ le gane xrtizra Dios,
da naca na du lazreꞌ,
chee̱ gun na se̱ cháchale,
ne lale lu naꞌ dul-la.
3 Che da li ba guzú laule nézele naca Xránadxu chaweꞌ,
naꞌ gaca lázrele sídxale xrtizre̱ꞌ.
Cristo naque̱ꞌ ca xiaj xre ban
4 Le biga lau Xránadxu,
Bénneaꞌ naque̱ꞌ ca xiaj xre ban.
Bénneache buluzúe̱ꞌ Le̱ꞌ chaláꞌala,
san lau Dios naque̱ꞌ tu xiaj chaweꞌ da zácale̱ꞌe̱ na.
5 Cáꞌanqueze leꞌe nácale ca xiaj ban caꞌ.
Le güe Dios lataj guchínene̱ꞌ leꞌe chee̱ gune̱ꞌ tu xudauꞌ chee̱ Beꞌ Láꞌazxa chee̱ꞌ,
gácale bxruze chee̱ Dios chee̱ guzúale lau Dios ca da dxunna Beꞌ Láꞌazxa leꞌe.
Da nigá waca gunle ne̱ chee̱ Jesucristo,
da xezaca ba lazreꞌ Dios.
6 Chee̱ le̱ naꞌ lu xiche láꞌazxa dxenná Dios:
Nedaꞌ nuzúaꞌ lu xe̱zre láꞌazxa tu benneꞌ
naque̱ꞌ ca tu xiaj blau chee̱ xuꞌu,
da naca na tu xiaj du lazreꞌ,
ne da zácale̱ꞌe̱ na,
naꞌ nu benneꞌ chéajle̱ꞌe̱ chee̱ Le̱ꞌ
quebe gaca xel-laꞌ stu chee̱ꞌ.
7 Chee̱le leꞌe dxéajle̱le chee̱ꞌ,
xiaj nigá zácale̱ꞌe̱ na,
san chee̱ benneꞌ caꞌ quebe dxéajle̱ꞌe̱ naca na ca da dxenná xiche láꞌazxa:
Xiaj naꞌ buluzúa benneꞌ we̱n xuꞌu caꞌ chaláꞌala,
le̱ naꞌ naca na xiaj blau.
8 Cáꞌanqueze naca na ca dxenná xiche láꞌazxa:
Naque̱ꞌ tu xiaj da dxechegu bénneache,
naꞌ laweꞌ le̱ naꞌ dxeajlecházie̱ꞌ.
Caní naca na,
dxeajlecházie̱ꞌ laweꞌ da quebe dxeleziꞌe̱ dizraꞌ chee̱ Dios.
Dios ba núnqueze̱ꞌ gaca caní chee̱ benneꞌ caꞌ.
Benneꞌ zaj naque̱ꞌ bi chee̱ Dios
9 Leꞌe nácale benneꞌ ba gucáꞌa Dios.
Nácale bxuze lu zrin chee̱ Benneꞌ Wenná Bea,
Jesús.
Nácale tu xe̱zre láꞌazxa chee̱ Dios,
naꞌ Le̱ꞌ naxáꞌawene̱ꞌ leꞌe chee̱ guzenle bénneache ca naca xel-laꞌ szren chee̱ Dios.
Le̱ꞌ gunné̱ꞌ leꞌe chee̱ xedxúajle lu da chul-la,
naꞌ súale lu xel-laꞌ naxaníꞌ li lazreꞌ chee̱ꞌ.
10 Gate nate quebe nu bexache lazreꞌ leꞌe,
san naꞌa Diósqueze̱ꞌ dxexache lazre̱ꞌ leꞌe.
Zúale chee̱ gunle zrin chee̱ Dios
11 Bi bichaꞌ nazriꞌite̱ lazraꞌ,
dxataꞌ xuedaꞌ leꞌe,
nácale ca benneꞌ zaj zre̱ꞌe̱ zituꞌ naga zua lazre̱ꞌ,
chee̱ quebe gunle ca da dxenná be̱laꞌ dxen chee̱le,
da dxedíl-lale̱ na bénneꞌdu xuꞌule.
12 Ca da dxunle,
dxal-laꞌ gaca na xrlátaje lau bénneache quebe zaj núnbeꞌe̱ Dios.
Caní gaca na,
lácala naꞌa dxelenné̱ꞌ chee̱le,
dxelennéꞌ nácale benneꞌ caꞌ dxelune̱ꞌ da zrinnaj,
naꞌ weleléꞌequezne̱ꞌ da xrlátaje da dxunle,
naꞌ xelúe láꞌanaqueze̱ꞌ Dios gate zrin zra xenaba Dios da be̱n tu tu bénneache.
13 Laweꞌ da nácale bi chee̱ Xránadxu,
le guzúa dizraꞌ ca da dxenná benneꞌ xuꞌu laweꞌ,
bénneaꞌ buluzúa benneꞌ xe̱zre caꞌ.
Le guzúa dizraꞌ chee̱ benneꞌ nape̱ꞌ xel-laꞌ dxenná bea zren,
14 ne chee̱ benneꞌ dxelenná bea,
benneꞌ caꞌ nasel-la le̱ꞌ chee̱ xuludée̱ꞌ xel-laꞌ ziꞌ benneꞌ caꞌ dxelune̱ꞌ da zrinnaj,
ne xeluꞌe̱ ba láꞌana benneꞌ caꞌ dxelune̱ꞌ da xrlátaje.
15 Dios dxaca lazre̱ꞌ gunle leꞌe da xrlátaje chee̱ guzúa zrile benneꞌ caꞌ quebe zaj naxéajniꞌine̱ꞌ,
gate dxelenné̱ꞌ cale̱la chee̱ dizraꞌ chaweꞌ da nazile.
16 Le gaca ca benneꞌ quebe zaj nadaꞌu,
san quebe guchínele da naꞌ nazile,
quebe gunle da cale̱la.
Le gaca ca benneꞌ caꞌ dxenná beꞌe Dios.
17 Le gapa ba láꞌana xúgute̱ bénneache.
Le zriꞌi bi bíchedxu caꞌ.
Le zrebe Dios,
ne le gapa ba láꞌana benneꞌ dxenná beꞌe̱.
Ca da guzaca ziꞌ Cristo dxuzéajniꞌi na dxiꞌu
18 Leꞌe,
bi we̱n zrin,
le guzúa dizraꞌ chee̱ xránale dute̱ xel-laꞌ ba láꞌana,
quegaze chee̱ benneꞌ zaj naque̱ꞌ zriꞌi lazreꞌ,
ne dxelebéꞌe̱ gunne xue chee̱le,
san cáꞌanqueze gunle chee̱ benneꞌ snia caꞌ zaj naque̱ꞌ xránale.
19 Naca na tu da xrlátaje che guchaga laudxu xel-laꞌ ziꞌ da dxulusaca bénneache dxiꞌu gate dxundxu da nezdxu naca na da dxezaca ba lazreꞌ Dios.
20 Che dxunle tu da cale̱la,
naꞌ dxulusaca ziꞌe̱ leꞌe,
¿bizra da ba neza gaca na chee̱le?
Naꞌa,
che dxedele xel-laꞌ ziꞌ laweꞌ da dxunle da xrlátaje,
ne dxuchaga laule na dute̱ xel-laꞌ zren lazreꞌ chee̱le,
da nigá naca na xrlátaje lau Dios.
21 Dios gunnéꞌ leꞌe chee̱ tele xel-laꞌ ziꞌ caní,
laweꞌ da gudé Cristo xel-laꞌ ziꞌ waláz chee̱le leꞌe,
da dxuzéajniꞌi na leꞌe gunle ca da be̱n Le̱ꞌ.
22 Le̱ꞌ quebe be̱neꞌ dul-la,
ne quebe nu guzí xe̱ꞌe̱.
23 Gate bulucháchale̱ne̱ꞌ Le̱ꞌ,
quebe bi dizraꞌ schanniꞌ beche̱be̱ꞌ.
Gate buludée̱ꞌ Le̱ꞌ xel-laꞌ ziꞌ,
Le̱ꞌ quebe bexéchaje̱ꞌ.
Bzua cuine̱ꞌ lu naꞌ Dios,
Bénneaꞌ dxuchiꞌe̱ ca da naca na.
24 Biáꞌqueze Cristo naꞌ lu be̱laꞌ dxen chee̱ꞌ ca naca dul-la chee̱dxu gate gude̱ꞌe̱ le̱ꞌe̱ xaga begúaj,
chee̱ gácadxu ca benneꞌ gate,
québedxa gundxu dul-la,
naꞌ gaca bandxu chee̱ gundxu da xrlátaje.
Le̱ꞌ guzríe̱ꞌ we̱ꞌ chee̱ xexácale leꞌe chaweꞌ.
25 Leꞌe gudale gate nate ca zrilaꞌ zaj nanítebaꞌ.
Naꞌa ba belaꞌle lau Cristo,
Bénneaꞌ dxuxúe̱ꞌ leꞌe ca dxun tu benneꞌ dxuxúe̱ꞌ zrílaꞌdu caꞌ,
ne dxeꞌe̱ gunne xue chee̱ bénneꞌdu xúꞌule.