DIZRAꞌ CHEE̱ DIOS DA BZUAJ SANTIAGO
Santiago dxuzuaje̱ꞌ chee̱ benneꞌ caꞌ zaj nadxúaje̱ꞌ lazrie̱ꞌ
1
Nedaꞌ,
Jacobo,
nacaꞌ we̱n zrin chee̱ Dios,
ne chee̱ Xránadxu Jesucristo.
Dxugapaꞌ leꞌe diuzre.
Nácale chazrinnu cueꞌ zriꞌine zre sua Israel,
ne nase dínnajle du gabíꞌi xe̱zr la xu nigá.
Xel-laꞌ sina da za lu naꞌ Dios
2 Benneꞌ bíchaꞌdauꞌ,
dxal-laꞌ béle̱ꞌe̱le gate dxedele zane cueꞌ da ste̱be caꞌ,
3 laweꞌ da nézele gate dxedé xel-laꞌ dxeajlí lazreꞌ chee̱le lu da ste̱be,
da nigá dxundxa na leꞌe zren lazreꞌ.
4 Le gun ba xuzre gaca li lazreꞌ xel-laꞌ zren lazreꞌ chee̱le chee̱ gácale benneꞌ xrlátaje̱ ne li lazreꞌ,
ne quebe bi xázrjele.
5 Che núlale leꞌe dxexázrjele xel-laꞌ sina,
le naba na lau Dios,
naꞌ Le̱ꞌ gunne̱ꞌ na leꞌe,
laweꞌ da dxunézrujle̱ꞌe̱ Dios chee̱ xúgute̱ bénneache,
ne quebe dxexezúene̱ꞌ ziꞌ.
6 Dxal-laꞌ nábale nen dute̱ xel-laꞌ dxeajlí lazreꞌ chee̱le,
ne quebe gun chupa lázrele.
Benneꞌ dxun chupa lazre̱ꞌ naque̱ꞌ ca xeajxruza chee̱ nísadauꞌ da dxua beꞌ nila naꞌla.
7-8 Benneꞌ dxune̱ꞌ caní,
ne quebe zrize dxezúa lázrdawe̱ꞌ,
ne quebe tuz ca dxun xichaj lázrdawe̱ꞌ quebe dxal-laꞌ guéquene̱ꞌ bi da xunezruj Xránadxu chee̱ꞌ.
9 Tu benneꞌ bíchedxu naque̱ꞌ baxacheꞌ dxal-laꞌ bene̱ꞌ laweꞌ da guzúa Dios le̱ꞌ ca tu benneꞌ zaca.
10 Benneꞌ nape̱ꞌ xel-laꞌ gunníꞌa dxal-laꞌ bene̱ꞌ gate gun Dios le̱ꞌ dxexruj lazreꞌ laweꞌ da naca benneꞌ gunníꞌa ca tu xiaj xixreꞌ da quebe dxezí béateca na.
11 Gate dxalaj gubizra,
ne dxennále̱ꞌe̱ na,
naꞌ dxebizre xixreꞌ naꞌ,
naꞌ dxexruj xiaj chee̱ na,
naꞌ dxedé xel-laꞌ xrtan chee̱ na.
Cáꞌanqueze gaca chee̱ benneꞌ gunníꞌa,
xenitie̱ꞌ dxácate̱ naꞌ dxezíꞌ lu ne̱ꞌe̱ xel-laꞌ gunníꞌa.
Ca naca chee̱ da ste̱be caꞌ da dxededxu
12 Ba neza naca na chee̱ benneꞌ dxuchaga lawe̱ꞌ da ste̱be caꞌ dute̱ xel-laꞌ zren lazreꞌ chee̱ꞌ,
laweꞌ da che ba bedxúaje̱ꞌ chaweꞌ lu da ste̱be da dxedée̱ꞌ,
naꞌ siꞌ lu ne̱ꞌe̱ da nache̱be lazreꞌ Dios gunézruje̱ꞌ chee̱ benneꞌ caꞌ zaj nazriꞌine̱ꞌ Le̱ꞌ.
13 Gate nu benneꞌ zua da dxegúꞌu xel-laꞌ na le̱ꞌ chee̱ gune̱ꞌ da cale̱la,
quebe dxal-laꞌ guéquene̱ꞌ dxuzúa Dios da naꞌ dxegúꞌu xel-laꞌ na le̱ꞌ,
laweꞌ da quebe bi de̱ da sequeꞌ xegúꞌu xel-laꞌ na Dios chee̱ gune̱ꞌ da cale̱la,
ne quebe bi guzúa Dios da xegúꞌu xel-laꞌ na dxiꞌu chee̱ gundxu da cale̱la.
14 Tu benneꞌ zua da dxegúꞌu xel-laꞌ na le̱ꞌ chee̱ gune̱ꞌ da cale̱la gate xel-laꞌ dxezá lazreꞌ da cale̱la chee̱ꞌ dxecáꞌa na le̱ꞌ,
ne dxenná beꞌe na le̱ꞌ.
15 Nadxa ca naca xel-laꞌ dxezá lazreꞌ da cale̱la caní dxuluzán na dul-la,
naꞌ gate ba guzequeꞌ zua dul-la naꞌ,
naꞌ dxute na bénneaꞌ.
16 Benneꞌ bíchaꞌdauꞌ nazriꞌite̱ lazraꞌ,
quebe güele lataj nu si xe̱ leꞌe.
17 Xúgute̱ da zaj naca xrlátaje ne da zaj naca li lazreꞌ da dxezidxu záꞌaca na xabáa lu naꞌ Dios,
Bénneaꞌ be̱ne̱ꞌ da caꞌ dxulusení na zran xabáa.
Dios quegá dxuchá cuine̱ꞌ,
ne quebe dxuché̱ꞌe̱ ca dxune̱ꞌ.
18 Ca naca da guca lazreꞌ Dios,
ba be̱nne̱ꞌ dxiꞌu xel-laꞌ nabán.
Bchínene̱ꞌ dizraꞌ li chee̱ꞌ,
chee̱ gácadxu ca tu lina nedxu chee̱ꞌ,
chee̱ da ba be̱n Le̱ꞌ.
Xel-laꞌ dxucáꞌana szren Dios da naca na li lazreꞌ
19 Chee̱ le̱ naꞌ,
benneꞌ bíchaꞌdauꞌ nazriꞌite̱ lazraꞌ,
tu tule leꞌe dxal-laꞌ gácale ban lazreꞌ chee̱ xénele,
san dxal-laꞌ cueza lázrele ca da nne̱le ne quebe laꞌ zráꞌate̱le.
20 Tu benneꞌ xichaj zraꞌa quebe dxune̱ꞌ da dxezaca ba lazreꞌ Dios.
21 Chee̱ le̱ naꞌ,
le gusán xúgute̱ da sban ne ca naca da cale̱la da dxanle̱ꞌe̱ na,
naꞌ dute̱ xel-laꞌ dxexruj lazreꞌ chee̱le le siꞌ ca naca dizraꞌ chee̱ Dios da ba naxaza na lu xichaj lázrdaule,
laweꞌ da wazequeꞌ dizraꞌ naꞌ guselá na bénneꞌdu xuꞌule.
22 Le gun ca da dxuléꞌe dizraꞌ naꞌ leꞌe,
ne quegá xénezele na.
Benneꞌ dxénzene̱ꞌ na dxezí xe̱ze cuine̱ꞌ.
23 Bénneaꞌ dxénzene̱ꞌ dizraꞌ naꞌ,
ne quebe dxune̱ꞌ ca dxenná na,
naque̱ꞌ ca tu benneꞌ dxenné̱ꞌe̱ lawe̱ꞌ tu lu wanaꞌ.
24 Dxenné̱ꞌe̱ ca naque̱ꞌ,
naꞌ gate ze xeajze̱ꞌ naꞌ,
naꞌ dxal-la lazre̱ꞌ ca naque̱ꞌ.
25 Benneꞌ dxennáꞌ xánnie̱ꞌ ca da bdxixruj beꞌe Dios da naca na li lazreꞌ,
ne da dxuselá na dxiꞌu,
ne dxusé̱die̱ꞌ ca naca na,
ne quegá dxénzene̱ꞌ na,
quebe dxal-la lazrte̱ꞌ na.
Che dxune̱ꞌ ca naca na,
benneꞌ nigá gaca tu da ba neza chee̱ꞌ lu xúgute̱ da dxune̱ꞌ.
26 Che nu benneꞌ dxéquene̱ꞌ naque̱ꞌ benneꞌ dxucáꞌana szren Dios,
ne quebe dxezéquene̱ꞌ nna beꞌene̱ꞌ luzre̱ꞌ,
benneꞌ nigá dxezí xe̱ze cuine̱ꞌ,
naꞌ ca naca xel-laꞌ dxucáꞌana szren Dios chee̱ꞌ dácheze naca na.
27 Xel-laꞌ dxucáꞌana szren Dios da naca na du lazreꞌ,
ne da naca na da dxezaca ba lazreꞌ Xradxu Dios naca na caní:
Gácale̱dxu bidu caꞌ zaj naze̱be,
ne nuꞌula caꞌ ba zaj nate benneꞌ biu chee̱ꞌ gate zaj zue̱ꞌ lu da ziꞌ da xaꞌ,
ne quebe gundxu ca naca da sban chee̱ xe̱zr la xu nigá.