DIZRAꞌ DA NAZÚAJ CHEE̱ BENNEꞌ HEBREO CAꞌ
Dios ba bchálajle̱ne̱ꞌ dxiꞌu lu dxuꞌa Zríꞌinequeze̱ꞌ
1
Dios bchálajle̱ne̱ꞌ xra xrtáudxu caꞌ gate nate zaneꞌ lasa,
ne zaneꞌ ca bchálaje̱ꞌ lu dxuꞌa benneꞌ caꞌ buluchálaje̱ꞌ waláz chee̱ꞌ.
2 Naꞌa,
lu zra caní,
Dios ba bchálajle̱ne̱ꞌ dxiꞌu lu dxuꞌa Zríꞌinequeze̱ꞌ.
Dios be̱ne̱ꞌ xe̱zr la xu nigá lu naꞌ Zríꞌine̱ꞌ nigá,
ne ba be̱ne̱ꞌ naca chee̱ꞌ xúgute̱ da caꞌ be̱ne̱ꞌ.
3 Zriꞌine Dios nigá naque̱ꞌ Benneꞌ dxuléꞌene̱ꞌ ca naca xel-laꞌ szren chee̱ Dios,
ne naque̱ꞌ ca da nácaqueze Dios,
naꞌ nuxre̱ꞌ xúgute̱ da caꞌ nune̱ꞌ,
dxuchínene̱ꞌ dizraꞌ chee̱ꞌ da nápale̱ꞌe̱ na xel-laꞌ waca.
Gate ba gudúe̱ꞌ dul-la da nabágadxu xeajxedxéꞌe̱ chaláꞌa xabe̱la chee̱ lataj blau chee̱ Dios xabáa.
Zriꞌine Dios nácadxe̱ꞌ blau ca gubáz chee̱ xabáa caꞌ
4 Zriꞌine Dios nácadxe̱ꞌ blau ca gubáz chee̱ xabáa caꞌ chee̱ Dios,
ca naca La Cristo da bzua Dios,
nácadxa na blau ca la gubáz chee̱ xabáa caꞌ.
5 Dios cabataꞌ guzre̱ꞌ tu gubáz chee̱ xabáa ca guzre̱ꞌ Cristo,
gunné̱ꞌ:
Lueꞌ nacuꞌ Zriꞌinaꞌ.
Nedaꞌ nácaquezaꞌ Xrauꞌ naꞌa zra.
Cáꞌanqueze cabataꞌ guzre̱ꞌ tu gubáz chee̱ xabáa ca gunné̱ꞌ chee̱ Cristo:
Nedaꞌ gacaꞌ Xre̱ꞌ,
naꞌ Le̱ꞌ gaque̱ꞌ Zriꞌinaꞌ.
6 Gate bzue̱ꞌ Zríꞌine̱ꞌ lu xe̱zr la xu nigá,
gunné̱ꞌ:
Xúgute̱ gubáz chee̱ xabáa caꞌ xelue láꞌane̱ꞌ Le̱ꞌ.
7 Ca naca chee̱ gubáz chee̱ xabáa caꞌ,
Dios gunné̱ꞌ:
Dsesel-le̱ꞌ gubáz chee̱ꞌ caꞌ ca tu beꞌ da dxaca,
ne dxuchínene̱ꞌ gubáz we̱n zrin chee̱ꞌ caꞌ ca tu xiꞌ.
8 Ca naca chee̱ Zríꞌine̱ꞌ,
gunná Dios:
Lataj blau chiuꞌ lueꞌ,
Dios,
zúate̱queze.
Xel-laꞌ dxenná bea chiuꞌ naca na xlátaje̱.
9 Nazriꞌinuꞌ da xlátaje̱,
ne dxezraꞌu da cale̱la.
Chee̱ le̱ naꞌ Dios chiuꞌ ba bé̱nnadxe̱ꞌ Lueꞌ
xel-la dxebé ca da bnézruje̱ꞌ bi ljwezruꞌ caꞌ.
10 Cáꞌanqueze guzre̱ꞌ Le̱ꞌ:
Lueꞌ,
Xran,
nédxudaute̱ be̱nuꞌ xe̱zr la xu.
Nen xel-laꞌ waca chiuꞌ be̱nuꞌ xabáa.
11 Da caní weledé chee̱ na,
san Lueꞌ súate̱quezuꞌ.
Xúgute̱ da caní welaca gula ca zra lana bénneache.
12 Naꞌ xutubuꞌ na ca tu ladxeꞌ,
ne guchaꞌu na ca dxun tu benneꞌ dxuché̱ꞌe̱ zra lane̱ꞌ.
Lueꞌ zúaquezuꞌ chadía chacanna,
naꞌ xel-laꞌ nabán chiuꞌ quebe téqueze chee̱ na.
13 Dios cabataꞌ guzre̱ꞌ tu gubáz chee̱ xabáa ca guzre̱ꞌ Zríꞌine̱ꞌ,
gunné̱ꞌ:
Gudxeꞌe chaláꞌa xabe̱la chiaꞌ,
cadxa guzúaꞌ benneꞌ caꞌ dxeledábague̱ꞌ Lueꞌ zran niꞌu.
14 Xúgute̱ gubáz chee̱ xabáa caꞌ zaj naque̱ꞌ beꞌ caꞌ dxelún zrin chee̱ Dios,
naꞌ dxesel-le̱ꞌ gubáz chee̱ xabáa caꞌ chee̱ xelácale̱ne̱ꞌ benneꞌ caꞌ dxeleziꞌe̱ xel-laꞌ weselá.