Quebe dxal-laꞌ guzúadxu chaláꞌala xel-laꞌ weselá
2
Chee̱ le̱ naꞌ dxal-laꞌ nnaꞌ xánnedxu dizraꞌ da ba bendxu chee̱ quebe cuásadxu lu neza chee̱ xel-laꞌ li.
2 Dizraꞌ da gusel-la Dios gate nate lu naꞌ gubáz chee̱ xabáa caꞌ guca na li lazreꞌ,
naꞌ xúgute̱ benneꞌ caꞌ buluzúe̱ꞌ na chaláꞌala,
ne quebe buluzúe̱ꞌ dizraꞌ ca da gunná Dios,
Dios bdee̱ꞌ le̱ꞌ xel-laꞌ ziꞌ ca da dxal-laꞌ xelezíꞌe̱.
3 ¿Ájazra gaca ladxu che guzúadxu chaláꞌala tu xel-laꞌ weselá zren caní?
Xránaquezdxu bchálaje̱ꞌ chee̱ xel-laꞌ weselá nigá nédxute̱,
naꞌ gudé naꞌ buluchálaj benneꞌ caꞌ belenne̱ꞌ na,
naꞌ gulenné̱ꞌ naca na da li laudxu dxiꞌu.
4 Cáꞌanqueze ba bzua chacha Dios na ne̱ chee̱ da dxelunna bea na,
ne ne̱ chee̱ da zren caꞌ be̱n Dios,
ne ne̱ chee̱ xel-laꞌ waca zan caꞌ,
ne ne̱ chee̱ Beꞌ Láꞌazxa,
Bénneaꞌ be̱nne̱ꞌ dxiꞌu xel-laꞌ waca caꞌ,
ca da guca lázrequeze Le̱ꞌ.
Jesucristo be̱n cuine̱ꞌ ca nácadxu dxiꞌu
5 Dios quebe bzue̱ꞌ lu naꞌ gubáz chee̱ xabáa caꞌ xe̱zr la xu da za zaꞌ,
chee̱ da naꞌ dxuchálajdxu naꞌa.
6 Naca na ca naxúaj na lu xiche láꞌazxa,
ca da gunná tu benneꞌ:
¿Ájazra naca bénneache che Lueꞌ,
Dios,
dxeajsá lazruꞌ chee̱ꞌ?
¿Ájazra naca bénneache,
che Lueꞌ dxeꞌu gunne xue chee̱ le̱ꞌ?
7 Tu chíꞌidauꞌze bzuꞌ bénneache látezdxa ca gubáz chee̱ xabáa caꞌ.
Nunuꞌ chee̱ꞌ siꞌe̱ xel-laꞌ szren,
ne xel-laꞌ ba láꞌana,
ne bzuꞌ lu ne̱ꞌe̱ xúgute̱ da be̱nuꞌ.
8 Xúgute̱ ba bzuꞌ na zran niꞌa le̱ꞌ.
Caní naca,
gate Dios bzue̱ꞌ xúgute̱ zran niꞌa bénneache,
quebe bi de̱ da quebe guzúa na dizraꞌ chee̱ bénneache,
naꞌ quebe ne xuluzúa ca naca da caꞌ dizraꞌ chee̱ꞌ.
9 Naꞌa dxeléꞌedxu Jesús,
Bénneaꞌ bzua Dios guque̱ꞌ tu chíꞌidauꞌ látezdxa ca gubáz chee̱ xabáa caꞌ.
Dios gúnene̱ꞌ gate Jesús waláz chee̱ xúgute̱ bénneache laweꞌ da nazriꞌine̱ꞌ bénneache,
naꞌ naꞌa nunézruje̱ꞌ Le̱ꞌ xel-laꞌ szren,
ne xel-laꞌ ba láꞌana laweꞌ da gudée̱ꞌ lu xel-laꞌ gute zi xaꞌ.
10 Dios be̱ne̱ꞌ xúgute̱ da zaj zua,
naꞌ zaj zua na chee̱ gaca ba Le̱ꞌ.
Le̱ꞌ dxaca lazre̱ꞌ xelezíꞌ xúgute̱ bi chee̱ꞌ ca naca xel-laꞌ szren chee̱ꞌ.
Chee̱ le̱ naꞌ be̱n na ba xen be̱n Dios naca Jesucristo dute̱ weselá chee̱dxu,
ne̱ chee̱ da ziꞌ da xaꞌ da gudée̱ꞌ chee̱ séquene̱ꞌ guselé̱ꞌ bénneache chadía chacanna.
11 Benneꞌ caní dxegúa Jesús dul-la da zaj nabague̱ꞌ,
naꞌ be̱nneꞌ caní,
ne Lé̱queze̱ꞌ zaj naque̱ꞌ bi caꞌ chee̱ tuze Xradxu.
Chee̱ le̱ naꞌ quebe dxeduéꞌe Jesús nne̱ꞌ chee̱ benneꞌ caꞌ,
zaj naque̱ꞌ bi biche̱ꞌ.
12 Naca na ca dxenná lu xiche láꞌazxa:
Guchálajquezaꞌ da naca chiuꞌ Lueꞌ láwela bichaꞌ caꞌ,
naꞌ gúl-laquezaꞌ da güe láꞌanaꞌ Lueꞌ ládujla benneꞌ caꞌ zaj nazrague̱ꞌ lau Lueꞌ.
13 Cáꞌanqueze dxenná xiche láꞌazxa:
Nedaꞌ guxrén lazraꞌ Dios.
Cáꞌanqueze dxenná na:
Nigá zuaꞌ nen bi chiaꞌ caꞌ,
bi caꞌ be̱nna Dios nedaꞌ.
14 Laweꞌ da zaj naca be̱laꞌ dxen benneꞌ caꞌ zaj naque̱ꞌ bi chee̱ꞌ,
Le̱ꞌ be̱n cuine̱ꞌ be̱laꞌ dxen chee̱ guzéquene̱ꞌ gutie̱ꞌ,
ne caní be̱ne̱ꞌ chee̱ séquene̱ꞌ guzría xiꞌe̱ da xriwe̱ꞌ,
da naꞌ napa na xel-laꞌ dxenná bea gute na bénneache.
15 Caní guca bselé̱ꞌ xúgute̱ benneꞌ gulaque̱ꞌ ca benneꞌ zaj nadaꞌu xúgute̱ iza zaj naca bane̱ꞌ laweꞌ da belezrebe̱ꞌ xel-laꞌ gute.
16 Da li quebe ble̱ꞌe̱ nigá chee̱ gácale̱ne̱ꞌ gubáz chee̱ xabáa caꞌ,
san naca na ca dxenná xiche láꞌazxa:
Ble̱ꞌe̱ chee̱ gácale̱ne̱ꞌ benneꞌ zaj naque̱ꞌ zriꞌine zre sua Abraham.
17 Chee̱ le̱ naꞌ be̱n na ba xen guque̱ꞌ dute̱ ca zaj naca bi biche̱ꞌ caꞌ,
chee̱ séquene̱ꞌ gaque̱ꞌ lau Dios tu bxruze blau naque̱ꞌ li lazreꞌ,
ne dxexache lazre̱ꞌ bénneache,
ne chee̱ séquene̱ꞌ gun cuine̱ꞌ tu da dxegúa na dul-la zaj nabaga bénneache.
18 Laweꞌ da gudéqueze Le̱ꞌ xel-laꞌ ziꞌ gate guca lazre Satanás gun zréaje Le̱ꞌ,
dxezéquene̱ꞌ naꞌa gácale̱ne̱ꞌ benneꞌ caꞌ dxun zréaje da xriwe̱ꞌ le̱ꞌ.