Jesús nácadxe̱ꞌ blau ca Moisés
3
Leꞌe,
benneꞌ bíchaꞌdauꞌ,
nácale bi chee̱ Dios,
laweꞌ da nácale benneꞌ caꞌ ba gunné̱ Dios,
le nnaꞌ xanneꞌ Jesucristo,
Bénneaꞌ gusel-la Dios chee̱ gaque̱ꞌ bxruze blau chee̱ da dxéajle̱dxu.
2 Jesús nigá guque̱ꞌ li lazreꞌ lau Dios,
Bénneaꞌ bzue̱ꞌ Le̱ꞌ lu zrin naꞌ da ba be̱ne̱ꞌ,
ca guca Moisés,
guque̱ꞌ li lazreꞌ lu zrin naꞌ be̱ne̱ꞌ lau benneꞌ caꞌ gulaque̱ꞌ bi chee̱ Dios.
3 Jesús dxal-laꞌ sidxe̱ꞌ xel-laꞌ ba láꞌana ca da siꞌ Moisés,
ca dxaca chee̱ benneꞌ dxune̱ꞌ tu xuꞌu,
dxezidxe̱ꞌ xel-laꞌ ba láꞌana ca da dxezíꞌ xuꞌu náꞌqueze.
4 Tu tu xuꞌu naca na da be̱n benneꞌ,
san Dios nune̱ꞌ xúgute̱ da zaj zua.
5 Ca we̱n zrin chee̱ Dios guca Moisés li lazreꞌ lu zrin naꞌ be̱ne̱ꞌ lau benneꞌ caꞌ gulaque̱ꞌ bi chee̱ Dios,
naꞌ bchálaje̱ꞌ ca naca da nne̱ Dios ca te naꞌ.
6 Cristo naque̱ꞌ li lazreꞌ ca Zríꞌinequeze Dios laudxu dxiꞌu.
Nácadxu ca lizre Dios che se̱ cháchadxu lu da dxuxrén lázredxu ca zrindxa zra cheajsé̱ chee̱dxu,
ne dxebéle̱ꞌe̱dxu lu da dxebeza lázredxu.
Bi caꞌ chee̱ Dios xelexezíꞌ lazre̱ꞌ naga zua Dios
7 Caní naca,
naca na ca da dxenná Beꞌ Láꞌazxa lu xiche láꞌazxa,
dxenné̱ꞌ:
Naꞌa,
che leꞌe dxenle ca da dxenná Dios,
8 quebe gácale lázrdau zideꞌ ca gulaca benneꞌ caꞌ guledábague̱ꞌ Dios,
naꞌ belune̱ꞌ Dios ze̱de le̱ꞌe̱ xixreꞌ laweꞌ lataj.
9 Belún xra xrtaule caꞌ nedaꞌ ze̱de chee̱ gunaꞌ ca gunníaꞌ,
lácala beleléꞌene̱ꞌ da be̱naꞌ láwela chua iza.
10 Chee̱ le̱ naꞌ bzraꞌa xichjaꞌ benneꞌ caꞌ,
naꞌ gunníaꞌ:
Tu dxelebéaj xíchajzqueze benneꞌ caní nedaꞌ,
ne dxeledábague̱ꞌ ca naca da bdxíxrujaꞌ.
11 Chee̱ le̱ naꞌ bzraꞌa xichjaꞌ benneꞌ caꞌ,
ne bzua chúchuaꞌ da guchaꞌ benneꞌ caꞌ,
gunníaꞌ quebe xelexúꞌe̱ naga xelexezíꞌ lazre̱ꞌ naga zúaquezaꞌ nedaꞌ.
12 Leꞌe,
benneꞌ bíchaꞌdauꞌ,
le guxúe cuínale chee̱ quebe gaca lázrdau zideꞌ netule leꞌe,
quebe cuásale lau Dios ban laweꞌ da quebe dxéajle̱le chee̱ Le̱ꞌ.
13 Le gutipa lázrele tule xetule tu zra tu zra,
dxácate̱ ne zúadxu lu zra da nunna Dios dxiꞌu,
chee̱ quebe si xe̱ dul-la netule leꞌe,
naꞌ gácale lázrdau zideꞌ.
14 Che se̱ cháchadxu ca zrin zra cheajsé̱ chee̱dxu ca naca da dxuxrén lázrequezdxu nédxute̱,
naꞌa nácadxu bi chee̱ Cristo.
15 Naca na ca dxenná na lu xiche láꞌazxa:
Naꞌa,
che leꞌe dxenle ca da dxenná Dios,
quebe gácale lázrdau zideꞌ ca gulaca benneꞌ caꞌ guledábague̱ꞌ Dios.
16 ¿Nuzra benneꞌ caꞌ belenne̱ꞌ dizraꞌ chee̱ Dios,
naꞌ ca gudé naꞌ guledábague̱ꞌ Dios?
Zaj naca xúgute̱ benneꞌ caꞌ bebéaj Moisés lu xe̱zr la xu Egipto.
17 ¿Nuzra benneꞌ caꞌ bzraꞌa Dios le̱ꞌ láwela chua iza?
Zaj naca benneꞌ caꞌ belún dul-la,
naꞌ gulátie̱ꞌ le̱ꞌe̱ xixreꞌ laweꞌ lataj.
18 ¿Nuzra benneꞌ caꞌ bzua chuchu Dios xrtizre̱ꞌ gate guzre̱ꞌ le̱ꞌ quebe xelexúꞌe̱ naga xelexezíꞌ lazre̱ꞌ naga zua Le̱ꞌ?
Zaj naca benneꞌ caꞌ guledábague̱ꞌ xrtizra Dios.
19 Naꞌa dxeléꞌedxu quebe guca xelexúꞌe̱ laweꞌ da quebe guléajle̱ꞌe̱ chee̱ Le̱ꞌ.