4
Caní naca,
dxácate̱ ne zua chee̱dxu da nache̱be lazreꞌ Dios chee̱ xexúꞌudxu naga xezíꞌ lázredxu naga zua Dios,
dxal-laꞌ guxúe cuínadxu gagáze nule leꞌe quebe xexúꞌule.
2 Cáꞌanqueze dxiꞌu ba bendxu dizraꞌ chaweꞌ chee̱ Dios ca da belén benneꞌ caꞌ,
san benneꞌ caꞌ quebe bi da ba neza gulezíꞌe̱ chee̱ dizraꞌ da belenne̱ꞌ laweꞌ da quebe guléajle̱ꞌe̱ chee̱ na.
3 Dxiꞌu ba guxéajle̱dxu,
naꞌ chúꞌudxu naga xezíꞌ lázredxu,
ca da gunná Dios gate gunné̱ꞌ:
Chee̱ le̱ naꞌ bzraꞌa xichjaꞌ benneꞌ caꞌ,
naꞌ bzua chúchuaꞌ da guchaꞌ benneꞌ caꞌ,
gunníaꞌ:
Quebe xelexúꞌe̱ naga xelexezíꞌ lazre̱ꞌ naga zua nedaꞌ.
Caní gunná Dios lácala ba bsexuzre̱ꞌ zrin chee̱ꞌ gate naꞌ be̱nte̱ꞌ xe̱zr la xu,
4 laweꞌ da naxúaj na lu xiche láꞌazxa ca naca chee̱ zra gazreꞌ,
dxenná na:
Lu zra gazre bezíꞌ lazreꞌ Dios lu zrin da be̱ne̱ꞌ.
5 Xetú dizraꞌ da naxúaj na lu xiche láꞌazxa dxenná na:
Quebe xelexúꞌe̱ naga xelexezíꞌ lazre̱ꞌ naga zua nedaꞌ.
6 Benneꞌ caꞌ belenne̱ꞌ dizraꞌ chaweꞌ nigá chee̱ Dios nédxute̱ quebe belexúꞌe̱ laweꞌ da quebe buluzúe̱ꞌ dizraꞌ ca naca da gunná Dios.
Naꞌa ne zaj zraꞌ benneꞌ dxal-laꞌ xelexúꞌuqueze̱ꞌ naga xelexezíꞌ lazre̱ꞌ.
7 Chee̱ le̱ naꞌ Dios ba guléaje̱ꞌ xetú zra,
gunné̱ꞌ:
Naꞌa zra.
Caní naca laweꞌ da dxuchálajle̱ Dios dxiꞌu dxuchínene̱ꞌ dizraꞌ da gunná David gudé naꞌ,
da naxúaj na lu xiche láꞌazxa naga dxenná na:
Naꞌa,
che leꞌe dxenle ca da dxenná Dios,
quebe gácale lázrdau zideꞌ.
8 Chela belexezíꞌ lazreꞌ benneꞌ caꞌ be̱ Josué lataj guluꞌe̱ xe̱zr la xu naꞌ,
quegá guchálajdxa Dios chee̱ xetú zra.
9 Caní naca na,
de̱ lataj xelúꞌu bi caꞌ chee̱ Dios naga xelexezíꞌ lazre̱ꞌ naga zua Dios,
10 laweꞌ da xezíꞌ lazreꞌ lu zrin dxun nu benneꞌ chuꞌe̱ naga xezíꞌ lazre̱ꞌ naga zua Dios,
ca be̱n Dios,
bezíꞌ lazre̱ꞌ lu zrin be̱n Le̱ꞌ.
11 Dxal-laꞌ gun zi lázredxu séquedxu chúꞌudxu naga xezíꞌ lázredxu gagáze nu benneꞌ gune̱ꞌ ca belún benneꞌ caꞌ quebe guléajle̱ꞌe̱.
12 Dizraꞌ chee̱ Dios naca na da bane,
ne napa na xel-laꞌ waca.
Naládxa na ca tu xia da nalá na dxupa laꞌate̱,
ne dxaze na naga dxelezraga bénneꞌdu xúꞌudxu,
ne beꞌ nácaquezdxu,
ne dxaze na lu xichaj lázrdau bénneache,
naꞌ dxuchiꞌa na ca naca da dxugúꞌu bea bénneache ne ca da dxéquene̱ꞌ gune̱ꞌ.
13 Quebe bi de̱ da be̱n Dios da sequeꞌ gucache cuina na lau Dios.
Xúgute̱ zaj naláꞌ na,
ne zaj naxalaj na lau Bénneaꞌ dxal-laꞌ xuléꞌedxu Le̱ꞌ ca da be̱ndxu.
Jesús naque̱ꞌ bxruze blau zrente̱
14 Jesús,
Zriꞌine Dios naque̱ꞌ bxruze blau zrente̱ chee̱dxu,
Bénneaꞌ ba bexuꞌe̱ lau Dios.
Chee̱ le̱ naꞌ dxal-laꞌ se̱ típadxu lu da dxéajle̱dxu chee̱ Dios.
15 Bxruze blau chee̱dxu wazéquene̱ꞌ xexache lazre̱ꞌ dxiꞌu che dxiꞌu dxate niꞌa nadxu lu xel-laꞌ dxeajlí lazreꞌ chee̱dxu,
laweꞌ da gudéqueze Le̱ꞌ lu xel-laꞌ ziꞌ caꞌ gate guca lazre da xriwe̱ꞌ gun zréaje na Le̱ꞌ,
ca da dxededxu dxiꞌu naꞌa,
naꞌ Le̱ꞌ quebe be̱ne̱ꞌ dul-la.
16 Chee̱ le̱ naꞌ dxal-laꞌ bígadxu du lázredxu lu lataj blau chee̱ Dios chee̱dxu,
Bénneaꞌ nazriꞌine̱ꞌ dxiꞌu,
chee̱ xexache lazre̱ꞌ dxiꞌu,
ne dute̱ xel-laꞌ xrlátaje chee̱ꞌ gácale̱ne̱ꞌ dxiꞌu gate nachínedxu nu gácale̱ dxiꞌu.