5
Tu tu bxruze blau dxecáꞌa Dios ládujla bénneache,
ne dxuzúe̱ꞌ le̱ꞌ chee̱ gune̱ꞌ zrin lau Dios waláz chee̱ bénneache caꞌ,
ne cuꞌe̱ gunaꞌ lau Dios,
ne gutie̱ꞌ béadu caꞌ ne̱ chee̱ dul-la zaj nabagaꞌ bénneache.
2 Cáꞌanqueze bxruze blau nigá dxate niꞌa ne̱ꞌe̱ lu da caꞌ dxune̱ꞌ ca da dxaca chee̱dxu dxiꞌu.
Chee̱ le̱ naꞌ wape̱ꞌ xel-laꞌ zren lazreꞌ chee̱ benneꞌ caꞌ quebe dxeléajniꞌine̱ꞌ,
ne dxelune̱ꞌ da cale̱la,
3 naꞌ laweꞌ da dxate niꞌa ne̱ꞌe̱,
dxal-laꞌ gutie̱ꞌ béadu caꞌ ne̱ chee̱ dul-la da nabágaqueze̱ꞌ,
cáte̱ze dxune̱ꞌ ne̱ chee̱ dul-la da zaj nabaga xezícadxa bénneache.
4 Quebe nu gaca gun cuina bxruze blau,
san Diósqueze dxenné̱ꞌ bénneaꞌ,
ne dxunézruje̱ꞌ le̱ꞌ xel-laꞌ szren naꞌ,
ca be̱ne̱ꞌ chee̱ Aarón.
5 Cáꞌanqueze naca na chee̱ Cristo,
quebe bzua cuine̱ꞌ bxruze blau,
san Dios be̱ꞌe̱ Le̱ꞌ xel-laꞌ szren naꞌ ca da guzre̱ꞌ Le̱ꞌ:
Lueꞌ nacuꞌ Zriꞌinaꞌ.
Nedaꞌ nácaquezaꞌ Xrauꞌ naꞌa.
6 Cáꞌanqueze naxúaj na lu xiche láꞌazxa ca guzre̱ꞌ Le̱ꞌ:
Lueꞌ nacuꞌ bxruze blau chadía chacanna
ca gúcaqueze Melquisedec.
7 Gate zua Cristo lu xe̱zr la xu nigá,
bchálajle̱ne̱ꞌ Dios,
ne gutaꞌ xuene̱ꞌ Dios nen chiꞌe̱ zizraj,
ne gudxézrele̱ꞌe̱,
laweꞌ da napa Dios xel-laꞌ waca guselé̱ꞌ Le̱ꞌ lu xel-laꞌ gute,
naꞌ Dios benne̱ꞌ chee̱ꞌ laweꞌ da gudape̱ꞌ Xre̱ꞌ ba láꞌana.
8 Caꞌan guca,
lácala naca Cristo Zriꞌine Dios,
bsé̱die̱ꞌ guque̱ꞌ wezúa dizraꞌ ne̱ chee̱ xel-laꞌ ziꞌ da gudée̱ꞌ,
9 naꞌ gate guque̱ꞌ dute̱ Weselá chee̱dxu ne̱ chee̱ da caní,
nadxa guzéquene̱ꞌ bselé̱ꞌ bénneache chadía chacanna,
benneꞌ caꞌ dxuluzúe̱ꞌ dizraꞌ chee̱ꞌ,
10 naꞌ Dios bzue̱ꞌ Le̱ꞌ bxruze blau ca gúcaqueze Melquisedec.
Quebe dxal-laꞌ gusandxu xel-laꞌ dxeajlí lazreꞌ chee̱dxu
11 Dé̱le̱ꞌe̱ da dxal-laꞌ guchálajaꞌ ca naca chee̱ da nigá,
san naca na ste̱be guzéajniꞌidaꞌ leꞌe naꞌa,
laweꞌ da quebe ne gaca chéajniꞌile na.
12 Zaneꞌ iza ba guca dxéajle̱le chee̱ Cristo,
naꞌ ba gul-laꞌ gusé̱dele benneꞌ xula ca naca chee̱ Le̱ꞌ,
san dxun na ba xen nu guzéajniꞌi leꞌe da xula da quebe nácate̱ca ste̱be ca naca dizraꞌ chee̱ Dios.
Ne nácale ca bidauꞌ ne dxázrebeꞌ nizreꞌ.
Quebe ne gaca gágule xel-laꞌ wagu chee̱ benneꞌ waca.
13 Benneꞌ caꞌ zaj naca ca bidauꞌ ne dxázrebeꞌ nizreꞌ zaj naque̱ꞌ benneꞌ caꞌ quebe ne xuluchínene̱ꞌ dizraꞌ chee̱ xel-laꞌ li.
14 Xel-laꞌ wagu chee̱ benneꞌ waca naca na chee̱ benneꞌ caꞌ ba zaj nézene̱ꞌ xelexúnbeꞌe̱ da naca da xrlátaje,
ne da naca da cale̱la.