6
Chee̱ le̱ naꞌ québedxa dxal-laꞌ gusé̱dedxu ca da bsé̱dedxu nédxute̱ ca naca chee̱ Cristo,
san chéajte̱zedxu gusé̱dedxu da naca chee̱ꞌ chee̱ gácadxu benneꞌ waca.
Québedxa bi dxal-laꞌ guchálajdxu chee̱ da du caꞌ da bsé̱dedxu nédxute̱,
ca dxal-laꞌ xexéaje lázredxu chee̱ da caꞌ be̱ndxu da zaj nua na xel-laꞌ gute,
ne ca dxal-laꞌ chéajle̱dxu chee̱ Dios,
2 ne ca dxal-laꞌ xedxúadxu nisa,
ne ca dxal-laꞌ xuluzé̱ ne̱ꞌe̱ xíchajdxu,
ne ca xelexebán benneꞌ gate,
ne ca gun Dios,
guchiꞌe̱ da nun tu tu bénneache chee̱ gudée̱ꞌ benneꞌ caꞌ dxelune̱ꞌ da cale̱la lu lataj ba xaꞌ chadía chacanna.
3 Chee̱ le̱ naꞌ chéajte̱dxu lu da naca chee̱ Cristo,
che Dios gunne̱ꞌ dxiꞌu lataj.
4 Benneꞌ caꞌ ba gulezíꞌe̱ ca naca xel-laꞌ naxaníꞌ chee̱ Dios,
ne ba gulezú laweꞌ xelúnbeꞌe̱ da dxunna Dios,
ne ba gulezíꞌe̱ Beꞌ Láꞌazxa,
5 ne ba gulezú laweꞌ xelúnbeꞌe̱ da xrlátaje caꞌ chee̱ Dios ca naca da xelezíꞌe̱ lu xe̱zr la xu da za zaꞌ,
6 naꞌ te naꞌ che xuluzúe̱ꞌ Dios chaláꞌala,
québedxa gaca xelexexéaje lazre̱ꞌ laweꞌ da gaca na ca xuludé̱ꞌe̱ Cristo le̱ꞌe̱ xaga begúaj da xula,
ne dxelún le̱ꞌ chee̱ꞌ láwela xúgute̱ bénneache.
7 Zaj naque̱ꞌ ca xe̱zr la xu da dxezí na nisa xiuj.
Che xe̱zr la xu naꞌ dxunna lina chaweꞌ chee̱ benneꞌ dxelune̱ꞌ na zrin,
naca na da dxun chaweꞌ Dios,
8 san che dxachuj na xecheꞌ,
ne xixreꞌ da quebe bi culuén napa na,
quebe bi zaca xe̱zr la xu naꞌ,
san naca na tu da xuꞌu deꞌ,
naꞌ naga chéajse̱te̱ chezxe na.
Xel-laꞌ dxebeza lazreꞌ da nápadxu
9 Leꞌe,
benneꞌ bíchaꞌdauꞌ,
lácala dxuchálajntuꞌ caní,
dxuxrén lázrentuꞌ ca naca chee̱le leꞌe wazile leꞌe da chaweꞌ chee̱ xel-laꞌ weselá.
10 Dios dxune̱ꞌ da xlátaje̱,
ne quebe gal-la lazre̱ꞌ ca naca zrin da ba be̱nle,
ne ca bzriꞌile Le̱ꞌ gate gúcale̱le benneꞌ bíchedxu caꞌ,
ne ca da tu dxúnzquezle.
11 Dxaca lázrentuꞌ chéajte̱ze tu tule gunle da caní dute̱ lázrdaule ca zrin zra cheajsé̱ chee̱le,
chee̱ zruéꞌele da dxebeza lázrele.
12 Quebe dxaca lázrentuꞌ xewé̱dele.
Dxaca lázrentuꞌ gunle leꞌe ca belún benneꞌ caꞌ guleajlí lazre̱ꞌ Dios,
ne gulaque̱ꞌ zren lazreꞌ,
naꞌ gulezíꞌe̱ ca da guche̱be lazreꞌ Dios gunézruje̱ꞌ chee̱ꞌ.
13 Gate guche̱be lazreꞌ Dios bi gunézruje̱ꞌ chee̱ Abraham,
naꞌ bzétajqueze cuine̱ꞌ laweꞌ da québedxa nu zua nácadxa szren ca Le̱ꞌ,
nu guzétaje̱ꞌ,
14 gunné̱ꞌ:
“Da li gúnquezaꞌ da chaweꞌ chiuꞌ lueꞌ,
ne guzánquezaꞌ zriꞌine zre suꞌ.”
15 Abraham guleze̱ꞌ dute̱ xel-laꞌ zren lazreꞌ,
naꞌ chee̱ le̱ naꞌ guziꞌe̱ da guche̱be lazreꞌ Dios gunézruje̱ꞌ chee̱ꞌ.
16 Gate nu dxuluzetaj bénneache,
dxuluzétaje̱ꞌ benneꞌ nácadxe̱ꞌ szren ca lé̱queze̱ꞌ,
ne gate bi dxuluzúa chúchue̱ꞌ,
ne dxuluzétaje̱ꞌ Dios,
québedxa bi de̱ da bi xelenné̱ꞌ.
17 Chee̱ le̱ naꞌ Dios bzua chúchue̱ꞌ da guche̱be lazre̱ꞌ,
ne bzetaj cuine̱ꞌ,
laweꞌ da guca lazre̱ꞌ guléꞌene̱ꞌ benneꞌ caꞌ xelezíꞌe̱ da guche̱be lazre̱ꞌ,
Le̱ꞌ gune̱ꞌ ca naca da guche̱be lazre̱ꞌ,
ne quebe guché̱ꞌe̱ ca gune̱ꞌ.
18 Caní naca,
da chupa caní quebe gaca cha na,
naꞌ lu da caní Dios quebe gaca gun lazre̱ꞌ,
ne ne̱ chee̱ da caꞌ Dios ba nunne̱ꞌ dxiꞌu tu da gun na dxiꞌu dipa lazreꞌ,
dxiꞌu naꞌ ba nézedxu dxuxúe Le̱ꞌ dxiꞌu,
ne nuxrén lázredxu siꞌ lu nnadxu da dxebeza lázredxu ca naca da gunne̱ꞌ dxiꞌu.
19 Da nigá dxebeza lázredxu nuxru chacha na bénneꞌdu xúꞌudxu ca dxun tu xia da dxuxru chacha na tu da dxedá laweꞌ nísadauꞌ gate zria na laweꞌ nísadauꞌ.
Da naꞌ dxebeza lázredxu zúale̱ na Cristo cuzru ladxeꞌ da ze̱ lu xudauꞌ da zua xabáa,
20 naga guxúꞌu Jesús waláz chee̱dxu chee̱ gusálaje̱ꞌ neza naga tedxu,
naꞌ Le̱ꞌ naque̱ꞌ tu bxruze blau chadía chacanna ca guca Melquisedec.