Jesús naque̱ꞌ bxruze blau ca guca Melquisedec
7
Melquisedec nigá guque̱ꞌ wenná bea chee̱ xe̱zre Salem,
ne bxruze chee̱ Dios szrente̱.
Gate ze zaꞌ Abraham lu wedil-la gate bzétaje̱ꞌ benneꞌ wenná bea caꞌ,
naꞌ Melquisedec nigá xeajchague̱ꞌ le̱ꞌ,
ne gunabe̱ꞌ lau Dios gune̱ꞌ da chaweꞌ chee̱ Abraham,
2 naꞌ Abraham bnézruje̱ꞌ chee̱ le̱ꞌ tu cueꞌ chee̱ da chi cueꞌ caꞌ ca naca da bzruéꞌene̱ꞌ lu wedil-la naꞌ.
La Melquisedec zéaje̱ na wenná bea xlátaje̱,
ne laweꞌ da guque̱ꞌ benneꞌ wenná bea chee̱ xe̱zre Salem,
da zéaje̱ na xel-laꞌ dxebeza zri lazreꞌ,
le̱ꞌ zéaje̱queze na wenná bea chee̱ xel-laꞌ dxebeza zri lazreꞌ.
3 Quebe naxúaj na zua xre̱ꞌ,
ne xrne̱ꞌe̱,
ne xra xrtawe̱ꞌ,
ne quebe naxúaj na che gúlaje̱ꞌ,
ne che gutie̱ꞌ.
Caní naca na,
da guca Melquisedec dxuléꞌe na ca naca chee̱ Zriꞌine Dios,
naque̱ꞌ bxruze blau chadía chacanna.
4 Le naꞌ xque naꞌa ca szren guca Melquisedec,
che bnezruj xra xrtáudxu Abraham chee̱ le̱ꞌ tu cueꞌ chee̱ da chi cueꞌ chee̱ da guqué̱ꞌe̱ lu naꞌ wenná bea caꞌ lu wedil-la naꞌ.
5 Ca naca da bdxixruj bea Moisés,
bxruze caꞌ,
benneꞌ caꞌ zaj naque̱ꞌ xrtia Leví dxal-laꞌ xelezíꞌe̱ tu cueꞌ chee̱ da chi cueꞌ caꞌ da xelizruj benneꞌ Israel caꞌ,
benneꞌ zaj naque̱ꞌ xrtia ljwezre̱ꞌ,
lácala zaj naque̱ꞌ zriꞌine zre sua Abraham ca zaj nácaqueze benneꞌ caꞌ.
6 Melquisedec,
benneꞌ quebe naque̱ꞌ xrtia Leví guziꞌe̱ tu cueꞌ chee̱ da chi cueꞌ caꞌ da gudizruj Abraham,
bénneaꞌ dxal-laꞌ siꞌe̱ da guche̱be lazreꞌ Dios.
Cáꞌanqueze Melquisedec gunabe̱ꞌ lau Dios gune̱ꞌ da chaweꞌ chee̱ Abraham,
7 naꞌ dxelenná xúgute̱ bénneache nácadxa blau bénneaꞌ dxenabe̱ꞌ lau Dios gune̱ꞌ chaweꞌ chee̱ benneꞌ xula caꞌ quézcala bénneaꞌ siꞌe̱ da chaweꞌ naꞌ dxenabe̱ꞌ.
8 Naꞌa benneꞌ caꞌ dxeleziꞌe̱ tu cueꞌ chee̱ da chi cueꞌ caꞌ zaj naque̱ꞌ benneꞌ dxelate,
san ca naca chee̱ Melquisedec,
naque̱ꞌ ca tu benneꞌ naca bánqueze̱ꞌ laweꞌ da quebe naxúaj na lu xiche láꞌazxa che gutie̱ꞌ.
9 Ca naca chee̱ Leví,
ne ca naca chee̱ xúgute̱ bxruze caꞌ zaj naque̱ꞌ zriꞌine zre sua Leví naꞌ,
benneꞌ caꞌ dxelezíꞌe̱ naꞌa tu cueꞌ chee̱ da chi cueꞌ caꞌ,
wácaqueze nnadxu cáꞌanqueze benneꞌ caní gulízruje̱ꞌ chee̱ Melquisedec tu cueꞌ chee̱ da chi cueꞌ gate naꞌ bezrague̱ꞌ Abraham,
10 laweꞌ da wazequeꞌ nnadxu ne zaj zua zriꞌine zre sua Abraham lu be̱l-laꞌ dxen chee̱ꞌ,
benneꞌ quebe ne xelalaj gate naꞌ bdxuaj Melquisedec xeajchague̱ꞌ Abraham naꞌ.
11 Benneꞌ Israel caꞌ gulezíꞌ lu ne̱ꞌe̱ da bdxixruj bea Dios lu naꞌ bxruze caꞌ zaj naque̱ꞌ xrtia Leví.
Chela guzequeꞌ da belún bxruze caꞌ gun na li lazreꞌ benneꞌ caꞌ buluzúe̱ꞌ dizraꞌ chee̱ da bdxixruj bea Dios naꞌ,
naꞌ quebe be̱n na ba xen laꞌ xetú bxruze ca guca Melquisedec,
ne quegá ca guca Aarón.
12 Che xezráꞌ ca dxal-laꞌ gaca bxruze naꞌ,
naꞌ dxál-laꞌqueze xezráꞌ da nadxixruj bea naꞌ.
13 Xránadxu,
Bénneaꞌ naxúaj na chee̱ꞌ gaque̱ꞌ bxruze ca guca Melquisedec,
nababe̱ꞌ xetú cueꞌ xrtia Israel caꞌ,
benneꞌ caꞌ netue̱ꞌ quebe ne gaque̱ꞌ bxruze.
14 Naca bea na nababa Xránadxu xrtia Judá,
naꞌ Moisés quebe gunné̱ꞌ xelaca benneꞌ caní bxruze.
15 Da nigá naca béadxa na che bxruze cube naꞌ dxal-laꞌ gaque̱ꞌ ca guca Melquisedec,
16 ne bxruze cube nigá quebe gaque̱ꞌ bxruze ne̱ chee̱ tu da nadxixruj bea da dxenná na nu xrtia dxal-laꞌ gaque̱ꞌ.
Gaque̱ꞌ bxruze laweꞌ da nape̱ꞌ xel-laꞌ waca chee̱ tu xel-laꞌ nabán da quebe te chee̱ na.
17 Naca chee̱ꞌ ca da dxenná Dios:
Lueꞌ nacuꞌ bxruze chadía chacanna
ca da guca Melquisedec.
18 Caní guca,
bedxúaj chaláꞌala da bdxixruj bea Dios gate nate laweꞌ da quebe guzequeꞌ bi gun na,
ne quebe bi culuén gudapa na,
19 laweꞌ da quebe guca da gunná bea Moisés gun na bénneache li lazreꞌ.
Naꞌa nápadxu tu xel-laꞌ dxebeza lazreꞌ da cháwedxa,
naꞌ ne̱ chee̱ na dxebígadxu lau Dios.
20 Gate Dios be̱ne̱ꞌ Jesús bxruze,
bzetaj cuine̱ꞌ.
21 Quebe bzetaj cuine̱ꞌ gate bzue̱ꞌ xezícadxa bxruze caꞌ.
Gate be̱ne̱ꞌ Jesús bxruze bzetaj cuine̱ꞌ ca da naxúaj na lu xiche láꞌazxa,
dxenná na:
Xránadxu Dios bzetaj cuine̱ꞌ,
ne quebe guché̱ꞌe̱ xrtizre̱ꞌ.
Gunné̱ꞌ:
“Lueꞌ nacuꞌ bxruze chadía chacanna
ca da guca Melquisedec.”
22 Chee̱ le̱ naꞌ Jesús dxun chúchue̱ꞌ tu xel-laꞌ wezría da nácadxa chaweꞌ ca da nedxu.
23 Xezícadxa bxruze caꞌ,
benneꞌ gulezráꞌ nédxula be̱n na ba xen gulaque̱ꞌ benneꞌ zan laweꞌ da gulate tu tue̱ꞌ,
naꞌ quebe guca xeledíe̱ꞌ.
24 Jesús naque̱ꞌ tu bxruze chadía chacanna laweꞌ da quebe gatie̱ꞌ.
25 Chee̱ le̱ naꞌ dxezéquene̱ꞌ guselé̱ꞌ chadía chacanna benneꞌ caꞌ xelebigue̱ꞌ lau Dios ne̱ chee̱ Le̱ꞌ,
laweꞌ da naca ban Le̱ꞌ chadía chacanna chee̱ gudée̱ꞌ dizraꞌ chee̱ benneꞌ caꞌ lau Dios.
26 Jesús naque̱ꞌ bxruze blau,
bxruze naꞌ dxechínedxu.
Naque̱ꞌ láꞌazxa,
ne quebe bi da cale̱la be̱ne̱ꞌ,
ne quebe nabague̱ꞌ dul-la.
Quebe naque̱ꞌ tuze ca zaj naca benneꞌ dul-la,
naꞌ Dios nucáꞌana szrendxe̱ꞌ Le̱ꞌ ca xúgute̱ da zaj zua xabáa.
27 Quebe naque̱ꞌ ca xezícadxa bxruze caꞌ,
benneꞌ caꞌ be̱n na ba xen belutie̱ꞌ béadu caꞌ tu zra tu zra,
béadu caꞌ buluzúe̱ꞌ nedxu ne̱ chee̱ xtúl-laqueze̱ꞌ,
naꞌ ca gudé naꞌ buluzúe̱ꞌ béadu xula caꞌ ne̱ chee̱ xtul-la bénneache.
Jesús tu lásaze bzua cuine̱ꞌ ne̱ chee̱ dul-la zaj nabaga xúgute̱ bénneache.
28 Da bdxixruj bea Moisés dxuzúa na bxruze blau caꞌ zaj naque̱ꞌ benneꞌ quebe zaj naque̱ꞌ li lazreꞌ.
Gate Dios bzetaj cuine̱ꞌ ca gudé blaꞌ da nadxixruj bea naꞌ,
bzue̱ꞌ tu bxruze blau naque̱ꞌ Zríꞌinequeze̱ꞌ,
Bénneaꞌ be̱n Dios naque̱ꞌ tu bxruze blau li lazreꞌ chadía chacanna.