Jesús naque̱ꞌ bxruze blau chee̱dxu
8
Da naca blaudxa chee̱ da caní dxennantuꞌ naca na da nigá:
Zua tu bxruze blau chee̱dxu caní,
Bénneaꞌ dxeꞌe̱ chaláꞌa xabe̱la chee̱ lataj blau chee̱ Dios xabáa,
2 ne naque̱ꞌ bxruze blau dxune̱ꞌ zrin lu lataj láꞌazxa li,
da be̱n Xránadxu,
quegá bénneache.
3 Xúgute̱ bxruze blau nuzúa Dios le̱ꞌ chee̱ xelegúꞌe̱ gunaꞌ lau Dios,
ne xelútie̱ꞌ béadu caꞌ lau Dios.
Chee̱ le̱ naꞌ dxun na ba xen bi guzúa Cristo lau Dios.
4 La zua Cristo xe̱zr la xu nigá,
quebe gaque̱ꞌ bxruze laweꞌ da ne zaj zraꞌ bxruze caꞌ dxelegúꞌe̱ gunaꞌ ca nadxixruj bea da bde Moisés.
5 Zrin dxelún bxruze caní naca na ca tu da dxuléꞌeze na,
ne ca tu zrúlaze chee̱ da naꞌ zua xabáa.
Nezdxu naca na tu da dxuléꞌeze laweꞌ da gunná Dios,
guzre̱ꞌ Moisés gate ba zue̱ꞌ gune̱ꞌ lataj láꞌazxa:
“Bxue xanneꞌ gunuꞌ xúgute̱ na cáte̱ze naca da bleꞌedaꞌ lueꞌ lu xiꞌa naꞌ.”
6 Naꞌa bxruze blau chee̱dxu nigá dxune̱ꞌ tu zrin zácadxa laweꞌ da naque̱ꞌ wedé dizraꞌ chee̱ tu xel-laꞌ wezría cháwedxa,
da nun Dios ne̱ chee̱ da caꞌ guche̱be lazre̱ꞌ da zaj naca na cháwedxa.
7 La guca li lazreꞌ xel-laꞌ wezría da be̱ne̱ꞌ nedxu,
quebe be̱n na ba xen gune̱ꞌ xel-laꞌ wezría gudxupeꞌ naꞌ.
8 Gate Dios gudil-le̱ꞌ benneꞌ caꞌ zaj naque̱ꞌ bi che,
gunné̱ꞌ:
Dxenná Xránale:
Wazrín zra
gate gunaꞌ tu xel-laꞌ wezría cube
nen benneꞌ Israel caꞌ,
ne benneꞌ Judá caꞌ.
9 Quebe gaca na ca guca xel-laꞌ wezría
da be̱naꞌ nen xra xrtaule caꞌ gate becáꞌa ne̱ꞌe̱,
ne bebéajaꞌ benneꞌ caꞌ lu xe̱zr la xu Egipto.
Caní gunaꞌ laweꞌ da quebe buluzúe̱ꞌ dizraꞌ
xel-laꞌ wezría da nunaꞌ,
naꞌ chee̱ le̱ naꞌ guleaj xichjaꞌ benneꞌ caꞌ.
Da ni dxenná Xránale.
10 Xel-laꞌ wezría gunaꞌ nen benneꞌ Israel caꞌ
ca te chee̱ lu zra caní gaca na caní,
dxenná Xránale:
Guzúaꞌ da gudxixruj beꞌa lu xichaj lázrdau benneꞌ caꞌ,
ne guzúajaꞌ na lu lázrdawe̱ꞌ.
Nadxa gacaꞌ nedaꞌ Dios chee̱ benneꞌ caꞌ,
naꞌ le̱ꞌ xelaque̱ꞌ bi chiaꞌ caꞌ.
11 Quebe gun na ba xen xuluse̱de ljwezre̱ꞌ,
ne quegá nu benneꞌ xe̱ꞌe̱ bi biche̱ꞌ:
Be̱nbea Xránadxu.
Xúgute̱ꞌ xelúnbeꞌe̱ nedaꞌ,
benneꞌ cáꞌaze,
ne benneꞌ blau.
12 Gunite lawaꞌ chee̱ benneꞌ caꞌ
ca naca da cale̱la da zaj nune̱ꞌ,
ne québedxa cheajsá lazraꞌ chee̱ dul-la da zaj nune̱ꞌ.
13 Gate dxuchalaj Dios chee̱ tu xel-laꞌ wezría cube,
naca na laweꞌ da ba gunné̱ꞌ chee̱ da nedxu naca na da gula,
naꞌ da ba dxaca na da gula,
ne da gulasa la xenítete̱ na.