Lataj láꞌazxa da zua lu xe̱zr la xu, ne da zua xabáa
9
Gate ne zua xel-laꞌ wezría nedxu,
zaj de̱ da nadxixruj bea ca dxal-laꞌ xelún bxruze caꞌ tu lu xudauꞌ da zua xe̱zr la xu nigá.
2 Xudauꞌ nedxu caní guca na tu xuꞌu xide zren.
Lu lataj nedxu chee̱ xudauꞌ naꞌ da nazí le na Lataj Láꞌazxa zaj zua da dxusaꞌníꞌ,
ne tu taꞌa naga zria xeta xtila láꞌazxa.
3 Cuzre naga ze̱ ladxeꞌ gudxupeꞌ zua xetú lataj da nazí le na Lataj Láꞌazxa Blau.
4 Lu lataj nigá zaj zua tu táꞌadauꞌ naga xezxe xala,
ne tu xiꞌina chee̱ xel-laꞌ wezría da nun Dios,
da nacu na oro du ca nácaqueze na.
Luꞌule xiꞌina naꞌ xuꞌu tu zruágadauꞌ xuꞌu na xeta maná.
Cáꞌanqueze luꞌule na xuꞌu xágadauꞌ da be̱xru Aarón da naꞌ bezría na,
ne zaj xuꞌu na xiaj caꞌ naga zaj naxúaj dizraꞌ chee̱ xel-laꞌ wezría.
5 Laweꞌ xiꞌina nigá zaj zua gubáz chee̱ xabáa caꞌ zaj naca na oro,
da dxululéꞌe na zua Dios naꞌ,
naꞌ zaj nugacu xrile na naga dxuluzríe̱ꞌ dxen ne̱ chee̱ dul-la zaj nabaga bénneache.
Québedxa séquentuꞌ guchálajntuꞌ ca naca chee̱ da caní naꞌa.
6 Gate ba nagáꞌana chaweꞌ da caní,
naꞌ bxruze caꞌ dxelúꞌuqueze̱ꞌ lu lataj nedxu chee̱ lataj láꞌazxa chee̱ xelune̱ꞌ zrin chee̱ xel-laꞌ bxruze chee̱ꞌ.
7 Lu lataj gudxupeꞌ dxuꞌu tuze bxruze blau tu lásaze tu tu iza,
naꞌ gate dxuꞌe̱ naꞌ dxun na ba xen guꞌe̱ dxen chee̱ béadu caꞌ da guzríe̱ꞌ ne̱ chee̱ dul-la nabágaqueze̱ꞌ,
ne ne̱ chee̱ dul-la zaj nabaga bénneache caꞌ.
8 Beꞌ Láꞌazxa dxuzéajniꞌine̱ꞌ dxiꞌu quebe naxalaj neza chee̱ chúꞌudxu Lataj Láꞌazxa Blau naꞌ dxácate̱ dxelune̱ꞌ zrin chee̱ xel-laꞌ bxruze chee̱ꞌ lu lataj nedxu chee̱ lataj láꞌazxa naꞌ.
9 Xúgute̱ da caní zaj naca na da dxululéꞌeze,
da dxaca lu zra naꞌa zra,
laweꞌ da gunaꞌ caꞌ,
ne dxen chee̱ béadu caꞌ da dxuluzúa bxruze caꞌ lau Dios quebe gaca xelún na bénneache dute̱ li lazreꞌ.
10 Da caní zaj naca na chee̱ da dxeléꞌaj dxelawe̱ꞌ,
ne chee̱ da dxulucáꞌana chaweꞌ cuine̱ꞌ,
ne chee̱ da nadxixruj bea ca naca chee̱ be̱laꞌ dxen chee̱ bénneache,
da caꞌ bzua Dios ca zrindxa zra guché̱ꞌe̱ da caꞌ.
11 Naꞌa ba blaꞌ Cristo,
ne naca Le̱ꞌ bxruze blau chee̱ da xrlátaje caꞌ da ba beleláꞌ.
Lataj Láꞌazxa naga dxun Le̱ꞌ zrin ca bxruze blau naca na blaudxa,
ne da li lázredxa.
Quebe naca na tu da zaj nun bénneache,
da zéaje̱ na,
quebe naca na chee̱ xe̱zr la xu nigá.
12 Cristo ba guxúꞌe̱ Lataj Láꞌazxa Blau,
quegá chee̱ guzúe̱ꞌ dxen chee̱ béadu caꞌ,
ne chee̱ me̱du caꞌ,
san chee̱ guzúe̱ꞌ dxen cheé̱queze̱ꞌ,
naꞌ guxúꞌe̱ ga naꞌ tu lásaze laweꞌ da ba be̱ne̱ꞌ xel-laꞌ weselá chadía chacanna chee̱dxu dxiꞌu.
13 Da li dxen chee̱ be̱zre,
ne chee̱ béadu caꞌ,
ne de chee̱ bé̱zredu caꞌ,
bea caꞌ dxuluzezxe̱ꞌ lu taꞌa chee̱ Dios,
da caꞌ dxuluzré̱ꞌe̱ xichaj benneꞌ caꞌ zaj naque̱ꞌ sban,
zaj napa na xel-laꞌ waca xelibe na benneꞌ caꞌ cúzreze,
ne chee̱ xulucáꞌana chawe na le̱ꞌ lau Dios.
14 Che caní naca na,
wazéquedxa dxen chee̱ Cristo,
Bénneaꞌ bzua cuine̱ꞌ lau Dios ne̱ chee̱ Beꞌ Láꞌazxa dute̱ xel-laꞌ li lazreꞌ chee̱ꞌ,
naꞌ dxen chee̱ꞌ naꞌ dxibe na xichaj lázrdaudxu chee̱ da be̱ndxu da nua na xel-laꞌ gute,
chee̱ séquedxu gundxu zrin chee̱ Dios ban.
15 Chee̱ le̱ naꞌ naca Jesucristo wedé dizraꞌ chee̱ tu xel-laꞌ wezría cube.
Xel-laꞌ gute chee̱ Cristo dxun na zrin chee̱ gaca gunite lau Dios chee̱dxu ca naca dul-la da be̱ndxu gate ne zúadxu lu xel-laꞌ wezría nedxu,
naꞌ naꞌa benneꞌ caꞌ ba gunné̱ Dios waca xelezíꞌe̱ ca naca da caꞌ guche̱be lazreꞌ Dios,
da zaj naca na chadía chacanna.
16 Gate tu benneꞌ dxune̱ꞌ tu xiche da dxeláꞌa na da de̱ chee̱ꞌ,
dxun na ba xen guléꞌedxu ba nate bénneaꞌ chee̱ gundxu ca dxenná xiche naꞌ.
17 Xiche naꞌ quebe bi seque na dxácate̱ ne naca ban benneꞌ be̱ne̱ꞌ na,
san gate ba gute bénneaꞌ,
naꞌ seque na.
18 Chee̱ le̱ naꞌ,
xel-laꞌ wezría nedxu naꞌ guzúa chuchu na ne̱ chee̱ dxen da buluzríe̱ꞌ na.
19 Moisés blabe̱ꞌ xúgute̱ da nadxixruj bea da zaj naxúaj na lu dizraꞌ chee̱ Dios lau xúgute̱ bénneache,
naꞌ ca gudé naꞌ guqué̱ꞌe̱ zrilaꞌ da nadxé na da xrna,
ne tu zruze xaga hisopo,
naꞌ gusebise̱ꞌ na dxen chee̱ me̱du caꞌ,
ne dxen chee̱ béadu caꞌ,
ne nisa,
naꞌ bzre̱ꞌe̱ na laweꞌ xiche naga naxúaj xtizra Dios,
ne bzre̱ꞌe̱ na bénneache caꞌ.
20 Nadxa guzre̱ꞌ benneꞌ caꞌ:
“Dxen nigá naca na da dxuzúa chuchu na xel-laꞌ wezría da nun Dios nen leꞌe.”
21 Cáꞌanqueze bzra Moisés dxen lu lataj láꞌazxa,
ne lu xúgute̱ da dxuluchínene̱ꞌ lu zrin da dxelún bxruze caꞌ.
22 Ca naca da bdxixruj bea Dios,
dxal-laꞌ xulucáꞌana chawe̱ꞌ xúgute̱ da caꞌ nen dxen,
naꞌ che quebe nu gulalaj dxen,
Dios quebe gunite lawe̱ꞌ chee̱ bénneache ca naca dul-la da zaj nabague̱ꞌ.
Dxen chee̱ Jesucristo dxegúa na dul-la
23 Caní be̱n na ba xen xulucáꞌana chawe̱ꞌ da caꞌ zaj naca na da dxululéꞌeze na ca zaj naca da zaj zua xabáa,
naꞌ da caꞌ zaj zua xabáa dxun na ba xen xulucáꞌana chawe̱ꞌ na nen tu da zácadxa.
24 Cristo quebe guxúꞌe̱ lu lataj láꞌazxa da zaj nun bénneache,
da naꞌ naca na tu da dxuléꞌeze ca naca lataj láꞌazxa li da zua xabáa,
san guxúꞌe̱ xabáqueze,
naga zue̱ꞌ naꞌa lau Dios,
dxudée̱ꞌ dizraꞌ chee̱dxu dxiꞌu.
25 Bxruze blau chee̱ benneꞌ judío caꞌ dxuꞌe̱ lu lataj láꞌazxa blau tu iza tu iza chee̱ guzúe̱ꞌ ga naꞌ dxen da quebe naca cheé̱queze̱ꞌ.
Naꞌa Cristo quebe dxuzúa cuine̱ꞌ zaneꞌ lasa.
26 La be̱n na ba xen guzúa cuine̱ꞌ zaneꞌ lasa,
cáꞌanqueze zaneꞌ lasa gatie̱ꞌ ca gudé be̱ne̱ꞌ xe̱zr la xu nigá.
Naꞌa,
gate ba bzrin zra dxaca li ca da guche̱be lazreꞌ Dios,
Cristo ba ble̱ꞌe̱ tu lásaze,
naꞌ bzua cuine̱ꞌ chee̱ cue̱ꞌ dul-la zaj nabaga bénneache.
27 Ca dxun na ba xen xelate xúgute̱ bénneache tu lásaze,
naꞌ te naꞌ Dios guchiꞌe̱ da zaj nun tu tue̱ꞌ,
28 cáꞌanqueze Cristo bzua cuine̱ꞌ chee̱ gutie̱ꞌ tu lásaze chee̱ gudúe̱ꞌ dul-la zaj nabagaꞌ benneꞌ zante̱.
Te nigá xelé̱ꞌe̱ da gudxupeꞌ,
quegádxa chee̱ cue̱ꞌ dul-la,
san chee̱ xedajselé̱ꞌ xúgute̱ benneꞌ dxelebeze̱ꞌ Le̱ꞌ.