10
Da nadxixruj bea da bde Moisés guca na ca tu zrúl-laze chee̱ da chaweꞌ caꞌ da dxal-laꞌ xeleláꞌ,
ne quegá naca na lé̱queze na.
Chee̱ le̱ naꞌ da caꞌ buluzúa bxruze caꞌ lau Dios ca nadxixruj bea naꞌ,
da caꞌ buluzúe̱ꞌ tu iza tu iza,
quebe gulezeque na xelún na benneꞌ caꞌ li lazreꞌ,
benneꞌ caꞌ gulebigue̱ꞌ lau Dios.
2 La guzequeꞌ da nadxixruj bea naꞌ gun na benneꞌ caꞌ li lazreꞌ,
québedxa nu guzúa da caꞌ lau Dios laweꞌ da la guladxe benneꞌ caꞌ lu dul-la zaj nabague̱ꞌ,
québedxa zaj nabague̱ꞌ dul-la.
3 Naꞌa da caꞌ buluzúe̱ꞌ lau Dios tu iza tu iza bulusá na lazre̱ꞌ chee̱ dul-la da zaj nabague̱ꞌ,
4 laweꞌ da quebe guzequeꞌ dxen chee̱ be̱zre caꞌ,
ne dxen chee̱ béadu caꞌ cua na dul-la zaj nabaga bénneache.
5 Chee̱ le̱ naꞌ,
gate blaꞌ Cristo lu xe̱zr la xu nigá,
guzre̱ꞌ Dios:
Quebe dxaca lazruꞌ gunaꞌ,
ne béadu caꞌ nu gute le̱baꞌ lauꞌ.
Naꞌa ba be̱nuꞌ be̱l-laꞌ dxen chiaꞌ nigá.
6 Quebe dxezaca ba lazruꞌ béadu caꞌ dxuluzezxe̱ꞌ lauꞌ,
ne béadu caꞌ dxelutie̱ꞌ lauꞌ chee̱ cua na dul-la zaj nabague̱ꞌ.
7 Nadxa gunníaꞌ:
“Nigá zaꞌa nedaꞌ chee̱ gunaꞌ ca da nnauꞌ Lueꞌ,
Dios,
ca naxúaj na chiaꞌ nedaꞌ lu xiche láꞌazxa.”
8 Nédxula gunné̱ꞌ:
“Quebe dxaca lazruꞌ,
ne quebe dxezaca ba lazruꞌ gunaꞌ,
ne béadu caꞌ nu gute le̱baꞌ lauꞌ,
ne béadu caꞌ dxuluzezxe̱ꞌ lauꞌ,
ne béadu caꞌ dxelutie̱ꞌ lauꞌ chee̱ cua na dul-la zaj nabaga bénneache.”
Caní gunné̱ꞌ lácala zaj naca na da nadxixruj bea na xuluzúe̱ꞌ na lau Dios.
9 Ca gudé naꞌ gunné̱ꞌ:
“Nigá zaꞌa nedaꞌ chee̱ gunaꞌ ca da nnauꞌ Lueꞌ,
Dios.”
Da nigá zéaje̱ na gudée̱ꞌ lu waláz chee̱ da caꞌ buluzúa bxruze caꞌ lau Dios,
gate bzua cuine̱ꞌ lau Dios ne̱ chee̱ dul-la zaj nabaga bénneache.
10 Dios ba bcaꞌana chawe̱ꞌ dxiꞌu lu dul-la nabágadxu laweꞌ da be̱n Cristo ca da gunná Dios gate bde cuine̱ꞌ lau Dios tu lásaze gate gutie̱ꞌ le̱ꞌe̱ xaga begúaj.
11 Xúgute̱ bxruze judío dxelune̱ꞌ zrin lau Dios tu zra tu zra,
ne zaneꞌ lasa dxuluzríe̱ꞌ lau Dios da cáꞌanqueze lácala da caꞌ cabataꞌ xelezeque na xelegúa na dul-la chee̱ bénneache.
12 Jesucristo bzrie̱ꞌ lau Dios tuze da dxugúa na dul-la,
naꞌ gudé naꞌ gudxéꞌe̱ chaláꞌa xabe̱la chee̱ Dios.
13 Zue̱ꞌ naꞌa dxebeze̱ꞌ zra gate guzúa Dios benneꞌ caꞌ dxeledábague̱ꞌ chee̱ꞌ zran niꞌe̱.
14 Caní dxune̱ꞌ laweꞌ da bcaꞌana chawe̱ꞌ chadía chacanna benneꞌ caꞌ zaj naque̱ꞌ bi chee̱ Dios.
Caní be̱ne̱ꞌ gate bzua cuine̱ꞌ lau Dios tu lásaze.
15 Caníqueze dxenná Beꞌ Láꞌazxa laweꞌ da gunné̱ꞌ nédxula:
16 Caní naca xel-laꞌ wezría gunaꞌ nen benneꞌ Israel caꞌ
ca te chee̱ lu zra caní,
dxenná Xránale:
Guzúaꞌ da nadxixruj bea naꞌ lu xichaj lázrdau benneꞌ caꞌ,
ne guzúajaꞌ na lu lázrdawe̱ꞌ.
17 Ca gudé naꞌ dxenné̱ꞌ:
Cabátadxa cheajsá lazraꞌ chee̱ dul-la da zaj nabague̱ꞌ,
ne chee̱ da cale̱la caꞌ da zaj nune̱ꞌ.
18 Caꞌan naca,
gate Dios ba bnite lawe̱ꞌ chee̱ bénneache ca naca dul-la da zaj nabague̱ꞌ,
québedxa dxun na ba xen bi xuluzúe̱ꞌ lau Dios chee̱ cua na dul-la caꞌ.
Dxal-laꞌ bígadxu lau Dios
19 Chee̱ le̱ naꞌ,
benneꞌ bíchaꞌdauꞌ,
waca chúꞌudxu lu lataj láꞌazxa blau dute̱ lázrdaudxu ne̱ chee̱ dxen chee̱ Jesucristo da blalje̱ꞌ.
20 Dxezrindxu lau Dios,
dxededxu tu neza cube,
da quebe naca na ca da xjácale̱ bxruze caꞌ lu lataj láꞌazxa.
Dxededxu neza da naca Crístoqueze,
Bénneaꞌ zúale̱ Dios xabáa.
21 Jesús naque̱ꞌ bxruze blau chee̱dxu,
ne zaj xuꞌu lu ne̱ꞌe̱ bénneache chee̱ Dios.
22 Chee̱ le̱ naꞌ dxal-laꞌ bígadxu lau Dios dute̱ lázrdaudxu ne dute̱ xel-laꞌ dxeajlí lazreꞌ li,
laweꞌ da bcaꞌana chaweꞌ Le̱ꞌ lázrdaudxu chee̱ québedxa sua da ste̱be lu xichaj lázrdaudxu ca naca chee̱ dul-la,
ne naca chee̱dxu cáte̱ze ba gudibe̱ꞌ be̱l-laꞌ dxen chee̱dxu nen da naca ca tu nisa chaweꞌ.
23 Dxal-laꞌ sua cháchadxu ca naca da dxebeza lázredxu chee̱ da dxéajle̱dxu,
ne quebe guchadxu ca dxundxu,
laweꞌ da gun Dios ca da guche̱be lazre̱ꞌ gune̱ꞌ chee̱dxu.
24 Dxal-laꞌ quilaj lázredxu ca gundxu gácale̱ ljwézredxu tudxu xetudxu chee̱ zriꞌi ljwézredxu,
ne gundxu da xrlátaje.
25 Quebe dxal-laꞌ gusandxu xezrágadxu lau Dios ca dxelún bal-la benneꞌ.
Dxal-laꞌ gutipa lazreꞌ ljwézredxu tudxu xetudxu,
naꞌ gúndxadxu caní naꞌa laweꞌ da dxeléꞌedxu ba za bagu zra xeláꞌ Xránadxu.
26 Che núnbeadxu ca naca xel-laꞌ li chee̱ Dios,
ne chéajdxadxu gundxu dul-la,
québedxa bi de̱ da cua na dul-la bágadxu.
27 Lu xel-laꞌ dxezrebe súadxu da naca chee̱ zra guchiꞌa Dios,
ne chee̱ xiꞌ da guzría xi na benneꞌ caꞌ dxeledábague̱ꞌ chee̱ Dios.
28 Gate nu benneꞌ bzue̱ꞌ chaláꞌala da gunná bea Mnoisés,
ne gulezráꞌ chupa u chunna benneꞌ belexeche̱be̱ꞌ chee̱ da be̱n bénneaꞌ,
naꞌ belutie̱ꞌ bénneaꞌ,
ne quebe belexache lazre̱ꞌ le̱ꞌ.
29 Tu da ste̱be zrendxa dxal-laꞌ xelezíꞌ benneꞌ caꞌ dxuluzúe̱ꞌ chaláꞌala Zriꞌine Dios,
ne dxulucáꞌana dítaje̱ꞌ dxen chee̱ꞌ,
da blalje̱ꞌ,
dxen naꞌ dxuzúa chuchu na xel-laꞌ wezría chee̱ Dios,
ne dxucáꞌana chawe na benneꞌ caꞌ,
naꞌ dxelenné̱ꞌ schanniꞌ chee̱ Beꞌ Láꞌazxa chee̱ Dios,
Bénneaꞌ nazriꞌine̱ꞌ le̱ꞌ.
30 Ba núnbeadxu Xránadxu,
Bénneaꞌ gunnáqueze̱ꞌ:
“Nedaꞌ xebéaj lazraꞌ bénneache.
Nedaꞌ gunézrujaꞌ lazruj chee̱ benneꞌ caꞌ.”
Cáꞌanqueze gunné̱ꞌ:
“Xránale guchiꞌe̱ chee̱ bénneache chee̱ꞌ.”
31 Da dxal-laꞌ xelezrebe bénneache naca da ste̱be da gun Dios benneꞌ caꞌ.
32 Le gusá lázrele leꞌe iza da ba guledé,
gate za guzíte̱le xel-laꞌ naxaníꞌ chee̱ Dios,
naꞌ dute̱ xel-laꞌ zren lazreꞌ bchaga laule xel-laꞌ ziꞌ da gudele.
33 Bál-lale leꞌe bulucháchale̱ne̱ꞌ,
ne belúꞌe̱ leꞌe láwela bénneache,
naꞌ xebál-lale leꞌe guzácaꞌle gate gunáꞌale benneꞌ caꞌ guledée̱ꞌ xel-laꞌ ziꞌ caní.
34 Bexache lázrele benneꞌ gulezráꞌ lizre xia,
ne dute̱ xel-laꞌ dxebé bchaga laule da belune̱ꞌ gate gulequé̱ꞌe̱ ca da nápale,
laweꞌ da nézele nápale xabáa da zácadxa na,
ne da naca na da chadía chacanna.
35 Quebe gusanle ca da dxuxrén lázrele,
laweꞌ da nusá xel-laꞌ dxuxrén lazreꞌ chee̱le tu da zren da siꞌle.
36 Leꞌe dxal-laꞌ gácale zren lazreꞌ chee̱ gunle ca da nna Dios,
naꞌ sile ca da guche̱be lazreꞌ Dios gunne̱ꞌ chee̱le.
37 Naca na ca dxenná xiche láꞌazxa:
Xátedauze de̱,
naꞌ xeláꞌ Bénneaꞌ dxal-laꞌ xeláꞌ,
ne quebe chene̱ꞌ.
38 Benneꞌ naque̱ꞌ xlátaje̱ lawaꞌ nedaꞌ,
gataꞌ chee̱ꞌ xel-laꞌ nabán li lazreꞌ laweꞌ da dxéajle̱ꞌe̱ chiaꞌ,
naꞌ che cueaj xíchaje̱ꞌ nedaꞌ quebe xezaca ba lazraꞌ nen bénneaꞌ.
39 Naꞌa dxiꞌu quebe nácadxu tuze nen benneꞌ caꞌ dxelebéaj xíchaje̱ꞌ Dios,
ne xelebía xiꞌe̱.
Nácadxu tuze nen benneꞌ dxeléajle̱ꞌe̱ chee̱ Dios,
naꞌ xelelá bénneꞌdu zaj xuꞌe̱.