Xel-laꞌ dxeajlí lazreꞌ
11
Che nápadxu xel-laꞌ dxeajlí lazreꞌ dxuxrén lazrdxu sidxu da dxebézadxu,
ne nézquezdxu naca da li da quebe dxeléꞌedxu.
2 Xra xrtáudxu caꞌ belexegáꞌane̱ꞌ xrlátaje lau Dios laweꞌ da guléajle̱ꞌe̱ chee̱ꞌ.
3 Lu xel-laꞌ dxeajlí lazreꞌ chee̱dxu nezdxu be̱n Dios xe̱zr la xu nigá,
bchínene̱ꞌ dizraꞌ chee̱ꞌ,
naꞌ ca naca da dxeléꞌedxu naꞌa be̱n Dios le̱ na nen da quebe naláꞌ gate nate.
4 Abel,
lu xel-laꞌ dxeajlí lazreꞌ chee̱ꞌ,
bzue̱ꞌ lau Dios tu gunaꞌ da zácadxa na ca da bzua Caín,
naꞌ chee̱ le̱ naꞌ Dios gunné̱ꞌ naca xlátaje̱ Abel,
ne guziꞌe̱ gunaꞌ chee̱ꞌ.
Caꞌan naca,
lácala ba gute Abel,
ne dxusé̱dene̱ꞌ dxiꞌu ne̱ chee̱ da be̱ne̱ꞌ laweꞌ da gudape̱ꞌ xel-laꞌ dxeajlí lazreꞌ.
5 Enoc,
lu xel-laꞌ dxeajlí lazreꞌ chee̱ꞌ,
Dios beche̱ꞌe̱ le̱ꞌ.
Quebe gutie̱ꞌ,
naꞌ québedxa nu bleꞌe le̱ꞌ laweꞌ da beché̱ Dios le̱ꞌ.
Naxúaj na lu xiche láꞌazxa da dxenná na,
gate quebe ne xeché̱ Dios le̱ꞌ,
be̱n Enoc ca da bezaca ba lazreꞌ Dios.
6 Quebe gaca nu gun da xezaca ba lazreꞌ Dios che quebe dxeajlí lazre̱ꞌ Le̱ꞌ.
Bénneaꞌ dxebigue̱ꞌ lau Dios,
dxun na ba xen chéajle̱ꞌe̱ zua Dios,
ne xunézruje̱ꞌ chee̱ benneꞌ caꞌ dxelexílaje̱ꞌ Le̱ꞌ.
7 Noé,
lu xel-laꞌ dxeajlí lazreꞌ chee̱ꞌ,
gate Dios guzre̱ꞌ le̱ꞌ nédxula ca da dxal-laꞌ gaca,
bzue̱ꞌ dizraꞌ chee̱ Dios,
ne be̱ne̱ꞌ tu da zren da dxedá laweꞌ nísadauꞌ chee̱ xelelá xrtie̱ꞌ caꞌ.
Guxeajlí lazreꞌ Noé Dios,
san gulebía xiꞌ bénneache zaj zre̱ꞌe̱ xe̱zr la xu naꞌ,
laweꞌ da quebe guleajlí lazre̱ꞌ Dios.
Dios bcaꞌane̱ꞌ Noé xrlátaje laweꞌ da guxeajlí lazre̱ꞌ Le̱ꞌ.
8 Abraham,
lu xel-laꞌ dxeajlí lazreꞌ chee̱ꞌ,
gate Dios gunné̱ꞌ le̱ꞌ,
bzue̱ꞌ dizraꞌ,
ne guzé̱ꞌe̱ zéaje̱ꞌ tu lu xe̱zr la xu da guchebe lazreꞌ Dios gunézruje̱ꞌ chee̱ꞌ.
Bdxuaje̱ꞌ lázrie̱ꞌ,
ne quebe nézene̱ꞌ naga zéaje̱ꞌ.
9 Laweꞌ da guxeajlí lazre̱ꞌ Dios,
guzúa Abraham lu xe̱zr la xu naꞌ da guche̱be lazreꞌ Dios gunézruje̱ꞌ chee̱ꞌ,
naga naca xe̱zr la xu chee̱ benneꞌ zituꞌ caꞌ.
Guzúe̱ꞌ tu lu xuꞌu ladxeꞌ,
ne cáꞌanqueze be̱n Isaac,
ne Jacob,
benneꞌ caꞌ,
cáꞌanqueze Dios guche̱be lazre̱ꞌ xelezíꞌe̱ da naꞌ gunezruj Dios le̱ꞌ.
10 Caní be̱n Abraham laweꞌ da guleza lazre̱ꞌ chuꞌe̱ lu xe̱zre naꞌ da quebe te chee̱ na,
da naꞌ guleche Dios,
ne da be̱n Lé̱queze̱ꞌ.
11 Cáꞌanqueze Sara,
lácala ba nácale̱ꞌe̱ benneꞌ gula,
ne quebe nu bi chee̱ꞌ dxalaj,
san xel-laꞌ dxeajlí lazreꞌ chee̱ꞌ guque̱ꞌ xrna bidauꞌ.
Guzúa tu bi biu chee̱ꞌ laweꞌ da guxeajlí lazre̱ꞌ Dios gune̱ꞌ ca da guche̱be lazre̱ꞌ.
12 Caní guca,
Abraham,
lácala ba gúxrule̱ꞌe̱,
guxánle̱ꞌe̱ zriꞌine zre sue̱ꞌ ca naxán xuzreꞌ da zaj dxeꞌ dxuꞌa tu yegu zren,
da quebe nazequeꞌ gulábadxu.
13 Xúgute̱ benneꞌ caní gulatie̱ꞌ,
ne quebe ne xelezíꞌe̱ da caꞌ nache̱be lazreꞌ Dios,
san laweꞌ da guleajlí lazre̱ꞌ Dios,
beleléꞌene̱ꞌ na zítuꞌla,
naꞌ belexezaca ba lázrele̱ne̱ꞌ na.
Caní bululéꞌene̱ꞌ gulaque̱ꞌ ca benneꞌ zituꞌ,
benneꞌ guledeze lu xe̱zr la xu nigá.
14 Benneꞌ dxuluchálaje̱ꞌ caní dxululéꞌene̱ꞌ dxeledé̱ꞌ dxelexílaje̱ꞌ tu lazrie̱ꞌ.
15 La buluwía lazre̱ꞌ ca naca xe̱zr la xu naga gusáꞌaque̱ꞌ,
naꞌ waca xelexezrine̱ꞌ naꞌ.
16 Gulaca lazre̱ꞌ tu lazrie̱ꞌ da naca na cháweꞌdxa,
da naꞌ naca na lazrie̱ꞌ da zua xabáa.
Chee̱ le̱ naꞌ Dios quebe dxexeduéꞌene̱ꞌ gate dxelenná benneꞌ caꞌ naque̱ꞌ Dios chee̱ꞌ,
naꞌ nucueze̱ꞌ tu xe̱zre naga xelezúa benneꞌ caꞌ.
17 Gate guca lazreꞌ Dios nézene̱ꞌ ca naca xel-laꞌ dxeajlí lazreꞌ chee̱ Abraham,
naꞌ lu xel-laꞌ dxeajlí lazreꞌ chee̱ꞌ guché̱ꞌe̱ Isaac chee̱ gutie̱ꞌ-beꞌ lau Dios.
Ba zue̱ꞌ gutie̱ꞌ bi tu lichaꞌ chee̱ꞌ lácala ba nache̱be lazreꞌ Dios,
gunné̱ꞌ:
18 “Ne̱ chee̱ Isaac wazrále̱ꞌe̱ zriꞌine zre suꞌ.”
19 Abraham bxren lazre̱ꞌ Dios wazéquene̱ꞌ gusebane̱ꞌ benneꞌ gate,
naꞌ waca nnadxu bezíꞌ lu ne̱ꞌe̱ zríꞌine̱ꞌ Isaac ládujla benneꞌ gate.
20 Isaac,
lu xel-laꞌ dxeajlí lazreꞌ chee̱ꞌ,
guche̱be lazre̱ꞌ xelezíꞌ zríꞌine̱ꞌ Jacob,
ne Esaú da xrlátaje caꞌ.
21 Jacob,
lu xel-laꞌ dxeajlí lazreꞌ chee̱ꞌ,
gate zua gatie̱ꞌ,
guche̱be lazre̱ꞌ xelezíꞌ tu tu zriꞌine José da xrlátaje caꞌ,
ne be̱ láꞌane̱ꞌ Dios,
nuchiche tipe̱ꞌ xágadu nuxre̱ꞌ.
22 José,
lu xel-laꞌ dxeajlí lazreꞌ chee̱ꞌ,
gate ba zua gatie̱ꞌ gunné̱ꞌ welexedxúaj benneꞌ Israel caꞌ lu xe̱zr la xu Egipto,
ne bdxixruj beꞌe̱ ca dxal-laꞌ xelune̱ꞌ chee̱ zrita xuꞌe̱.
23 Gate gulaj Moisés,
xra xrne̱ꞌe̱,
lu xel-laꞌ dxeleajlí lazreꞌ chee̱ꞌ bulucache̱ꞌ le̱beꞌ laweꞌ chunna beuꞌ,
laweꞌ da beleléꞌene̱ꞌ naca bidu naꞌ xrtanle̱ꞌe̱,
ne quebe belezrebe̱ꞌ benneꞌ wenná bea,
bénneaꞌ bdxixruj beꞌe̱ xelate bidu caꞌ.
24 Moisés,
lu xel-laꞌ dxeajlí lazreꞌ chee̱ꞌ,
gate guque̱ꞌ benneꞌ waca,
quebe guca lazre̱ꞌ gaque̱ꞌ zriꞌine nuꞌula zriꞌine benneꞌ wenná bea chee̱ xe̱zr la xu Egipto,
25 san guca lázredxe̱ꞌ tée̱ꞌ xel-laꞌ ziꞌ nen bi caꞌ chee̱ Dios quézcala sue̱ꞌ tu chíꞌidauꞌ lu da ba neza chee̱ da naca dul-la.
26 Gúquene̱ꞌ nácadxa chaweꞌ gate belún lala bénneache chee̱ꞌ ca da guca chee̱ Cristo,
quézcala gape̱ꞌ ca naca da gunníꞌa chee̱ xe̱zr la xu Egipto,
laweꞌ da dxenné̱ꞌe̱ da gunezruj Dios le̱ꞌ.
27 Moisés,
lu xel-laꞌ dxeajlí lazreꞌ chee̱ꞌ,
bedxúaje̱ꞌ lu xe̱zr la xu Egipto,
ne quebe bezrebe̱ꞌ xel-laꞌ dxezráꞌa chee̱ benneꞌ wenná bea,
naꞌ guzúa chúchue̱ꞌ ca tu benneꞌ dxeléꞌene̱ꞌ Dios,
Bénneaꞌ quebe gaca nu leꞌe.
28 Moisés,
lu xel-laꞌ dxeajlí lazreꞌ chee̱ꞌ,
be̱ne̱ꞌ Laní Pascua gate naꞌ bdxixruj beꞌe̱ xuluzrá benneꞌ Israel caꞌ dxen le̱ꞌe̱ xaga dxa xuꞌu chee̱ quebe gute gubáz chee̱ xabáa chee̱ xel-laꞌ gute netú zriꞌine benneꞌ Israel caꞌ,
bi biu nedxu.
29 Benneꞌ Israel caꞌ,
lu xel-laꞌ dxeleajlí lazreꞌ chee̱ꞌ,
beledée̱ꞌ lu Nísadauꞌ Xrna ca benneꞌ dxeledé lu xu bizre,
san gate gulúꞌu benneꞌ Egipto caꞌ naga ba guledé benneꞌ caꞌ,
naꞌ bezraga nisa naꞌ,
naꞌ gulebéꞌ chiꞌi benneꞌ Egipto caꞌ,
naꞌ gulatie̱ꞌ.
30 Benneꞌ Israel caꞌ,
lu xel-laꞌ dxeleajlí lazreꞌ chee̱ꞌ,
guzréꞌe zeꞌe da naxechaj na xe̱zre Jericó ca gudé guledé benneꞌ Israel caꞌ bezúate̱ xe̱zre naꞌ tu tu lasa du gazre zra.
31 Rahab,
nuꞌula dxezíꞌ lu ne̱ꞌe̱ benneꞌ zaj xuꞌe̱ neza,
lu xel-laꞌ dxeajlí lazreꞌ chee̱ꞌ,
quebe gutie̱ꞌ tu zren nen benneꞌ Jericó caꞌ,
benneꞌ quebe buluzúa dizraꞌ chee̱ Dios,
laweꞌ da gudapa le̱ꞌ ba láꞌana benneꞌ Israel caꞌ,
benneꞌ xeajlennáꞌ lane̱ꞌ xe̱zre naꞌ.
32 ¿Bízradxa nniaꞌ?
Québedxa bi lataj napaꞌ guchálajaꞌ ca be̱n Gedeón,
ne ca be̱n Barac,
ne ca be̱n Sansón,
ne ca be̱n Jefté,
ne ca be̱n David,
ne ca be̱n Samuel,
ne ca belún benneꞌ caꞌ gulenné̱ꞌ waláz chee̱ Dios.
33 Benneꞌ caꞌ lu xel-laꞌ dxeleajlí lazreꞌ chee̱ꞌ gulezíꞌe̱ xe̱zr la xu caꞌ chee̱ benneꞌ xula,
ne gulenná beꞌene̱ꞌ cháweꞌdauꞌ benneꞌ walázr chee̱ꞌ caꞌ,
naꞌ gulezíꞌe̱ da guche̱be lazreꞌ Dios,
laweꞌ da gúcale̱ne̱ꞌ le̱ꞌ.
Belelé̱ꞌ lu dxuꞌa be̱zre xixreꞌ caꞌ.
34 Buluxusule̱ꞌ xiꞌ da dxéneaca.
Belelé̱ꞌ lu xia nalá.
Benneꞌ caꞌ zaj nate niꞌa naꞌ belexaque̱ꞌ dipa lazreꞌ.
Gulaque̱ꞌ benneꞌ wala lu wedil-la,
ne gulaca lu ne̱ꞌe
da gutaꞌ chee̱ benneꞌ caꞌ guledábague̱ꞌ le̱ꞌ.
35 Nuꞌula caꞌ belezíꞌ lu ne̱ꞌe̱ benneꞌ gate chee̱ꞌ caꞌ,
benneꞌ belexebáne̱ꞌ.
Xebal-le̱ꞌ gulátie̱ꞌ gate buludée̱ꞌ le̱ꞌ ba xaꞌ,
laweꞌ da quebe belúꞌe̱ lataj nu gusán le̱ꞌ,
chee̱ xelezruéꞌene̱ꞌ xel-laꞌ dxexebán
chee̱ xeleziꞌe̱ xetú xel-laꞌ nabán da naca na da li.
36 Xebal-le̱ꞌ belún le̱ꞌ chee̱ꞌ,
naꞌ xebal-le̱ꞌ belúꞌe̱ le̱ꞌ,
naꞌ xebal-le̱ꞌ buluchéaje̱ꞌ le̱ꞌ du xia ne guleguꞌe̱ le̱ꞌ lizre xia.
37 Belutie̱ꞌ xebal-le̱ꞌ nen xiaj,
naꞌ xebal-le̱ꞌ gulecheze̱ꞌ le̱ꞌ nen xia.
Xebal-le̱ꞌ buludée̱ꞌ le̱ꞌ lu da ste̱be caꞌ,
naꞌ xebal-le̱ꞌ belutie̱ꞌ nen xia nalá.
Xebal-le̱ꞌ guledée̱ꞌ nila naꞌla,
zaj nacue̱ꞌ zra zrilaꞌ ne zra béadu caꞌ.
Baxacheꞌ gulaque̱ꞌ,
naꞌ guledée̱ꞌ lu da ziꞌ da xaꞌ,
naꞌ buluzalje̱ꞌ le̱ꞌ.
38 Bénneache zaj zraꞌ lu xe̱zr la xu nigá quebe zaj naca chee̱ꞌ xelezíꞌe̱ ba neza chee̱ benneꞌ caní.
Tu guledázqueze̱ꞌ le̱ꞌe̱ xixreꞌ,
ne lu xiꞌa caꞌ,
ne lu bluaj caꞌ,
ne lu bluaj xu caꞌ.
39 Xúgute̱ benneꞌ caꞌ bcaꞌana chaweꞌ Dios le̱ꞌ laweꞌ da guleajlí lazre̱ꞌ Le̱ꞌ,
san quebe ne xelezíꞌe̱ ca naca da guche̱be lazreꞌ Dios,
40 laweꞌ da nucueza Dios tu da nácadxa chaweꞌ chee̱dxu dxiꞌu,
chee̱ xelexaca benneꞌ caꞌ li lazreꞌ tu zren nen dxiꞌu.