Dxal-laꞌ nnaꞌdxu Jesús
12
Laweꞌ da zaj naxéchaj benneꞌ zante̱ dxiꞌu,
benneꞌ caꞌ ba bululéꞌene̱ꞌ ca guléajle̱ꞌe̱ chee̱ Dios,
dxal-laꞌ guzúadxu chaláꞌala xúgute̱ da dxululale na dxiꞌu,
ne dul-la da naxe̱l-la na dxiꞌu,
naꞌ lu dute̱ xel-laꞌ zren lazreꞌ chee̱dxu gundxu zrin chee̱ Dios,
da naca na ca dxezáꞌ chégudxu chee̱ zruéꞌeledxu da dxeléꞌedxu tu chi naꞌ.
2 Dxal-laꞌ nnaꞌdxu Jesús,
Bénneaꞌ dxune̱ꞌ nápadxu xel-laꞌ dxeajlí lazreꞌ,
ne dxune̱ꞌ li lazreꞌ xel-laꞌ dxeajlí lazreꞌ naꞌ.
Jesús gudée̱ꞌ xel-laꞌ ziꞌ le̱ꞌe̱ xaga begúaj,
ne quebe beduéꞌene̱ꞌ laweꞌ da guné̱ꞌe̱ xel-laꞌ dxebé naꞌ da dxebeza na Le̱ꞌ,
naꞌ gudxéꞌe̱ chaláꞌa xabe̱la chee̱ lataj blau chee̱ Dios.
3 Le nnaꞌ xanneꞌ ca da be̱n Jesús,
gudéle̱ꞌe̱ xel-laꞌ ziꞌ da bulusaca benneꞌ dul-la caꞌ Le̱ꞌ.
Chee̱ le̱ naꞌ quebe chajxréquele gunle zrin chee̱ꞌ,
ne quebe gute lázrele.
4 Ba gudíl-lale̱le dul-la,
naꞌ quebe ne gátele lu wedil-la naꞌ.
5 Quebe gal-la lázrele leꞌe ca dxun Dios,
dxuzéajniꞌine̱ꞌ leꞌe ca zríꞌinequeze̱ꞌ,
gate dxenné̱ꞌ:
Zriꞌinaꞌ,
quebe guzúꞌ chaláꞌala da dxun Xranuꞌ gate dxusízrene̱ꞌ lueꞌ,
ne quebe gate lazruꞌ gate dxedil-le̱ꞌ lueꞌ.
6 Xránadxu dxusízrene̱ꞌ bi caꞌ nazriꞌine̱ꞌ,
naꞌ xúgute̱ bi dxezíꞌ lu ne̱ꞌe̱ ca zríꞌinequeze̱ꞌ dxudée̱ꞌ-beꞌ xel-laꞌ ziꞌ.
7 Le guchaga lau leꞌe xel-laꞌ ziꞌ da dxedele,
laweꞌ da dxuxúe Dios leꞌe ca zríꞌinequeze̱ꞌ.
¿Zra bi quebe dxusizre xrabeꞌ le̱beꞌ?
8 Che Dios quebe dxusízrene̱ꞌ leꞌe ca dxusízrene̱ꞌ xúgute̱ bi chee̱ꞌ caꞌ,
quebe nácale zríꞌinequeze Le̱ꞌ.
Nácale ca bi lan caꞌ.
9 Gate ne nácadxu bidauꞌ,
bulusizre xra xrnadxu dxiꞌu,
naꞌ gudápadxu le̱ꞌ ba láꞌana.
Dxal-laꞌ guzúadxadxu dizraꞌ Xradxu zue̱ꞌ xabáa,
naꞌ gaca bandxu.
10 Xra xrnadxu bulusízrene̱ꞌ dxiꞌu tu chíꞌidauze ca da guléquene̱ꞌ chaweꞌ,
san Dios dxusízrene̱ꞌ dxiꞌu chee̱ gaca tu da ba neza chee̱dxu da naca na li lazreꞌ,
chee̱ gácadxu láꞌazxa ca naca láꞌazxa Lé̱queze̱ꞌ.
11 Da li quebe dxedánnedxu da dxusizre xradxu dxiꞌu,
san dxéquedxu ziꞌ,
naꞌ dxedé naꞌ,
che dxéajniꞌidxu ca da dxusízrene̱ꞌ dxiꞌu,
naꞌ gundxu da xrlátaje caꞌ,
ne cueza zri lázredxu lau Dios.
Quebe dxal-laꞌ guzúadxu chaláꞌala da dxenná Dios
12 Chee̱ le̱ naꞌ le guzazraj naꞌle,
ne zríbele da ba dxelate niꞌa naꞌ,
13 ne le saꞌ lu neza da zaj naca na li,
chee̱ quebe chegu níꞌale da quebe zaj zua chacha,
ne chee̱ xelexaca chacha na.
14 Le gun ba xuzre suale lu xel-laꞌ dxebeza zri lazreꞌ nen xúgute̱ bénneache,
ne le gaca li lazreꞌ lau Dios.
Che quebe gunle caní,
quebe gaca léꞌelele Xránadxu.
15 Le guxúe xanneꞌ chee̱ quebe gusanle da chaweꞌ caꞌ dxunna Dios leꞌe,
ne̱ chee̱ quebe gaca netule leꞌe ca tu xixreꞌ slaꞌ da dxulala na,
ne dxuxrinnaj na da xezícala.
16 Le guxúe xanneꞌ chee̱ quebe gunle da sban,
ne quebe guzúale chaláꞌala ca da dxunna Dios,
ca be̱n Esaú,
bénneaꞌ bsane̱ꞌ xúgute̱ da gunezruj xre̱ꞌ le̱ꞌ chee̱ guziꞌe̱ tu cueze xel-laꞌ wagu.
17 Ba nézele ca da guca gudé naꞌ,
gate guca lazreꞌ Esaú naꞌ siꞌe̱ da chaweꞌ da naba xre̱ꞌ lau Dios,
naꞌ xre̱ꞌ bzue̱ꞌ le̱ꞌ chaláꞌala,
ne lácala gudxézrele̱ꞌe̱,
quebe guca xuché̱ꞌe̱ ca da ba be̱ne̱ꞌ.
18 Quebe dxaca chee̱le ca da guca chee̱ benneꞌ Israel caꞌ,
gulebigue̱ꞌ naga zua tu xiꞌa,
da naꞌ wazequeꞌ nu guchiche,
ne naga dxala na xiꞌ,
naga zua da chul-la,
ne dxeꞌ zren,
ne dxaca beꞌ bdunuꞌ.
19 Belenne̱ꞌ gudxezre luzu da dxulucuezre̱ꞌ,
ne chiꞌi Dios bchálajle̱ne̱ꞌ le̱ꞌ.
Benneꞌ caꞌ belenne̱ꞌ chiꞌi Dios naꞌ gulataꞌ xúene̱ꞌ québedxa guchálajle̱ne̱ꞌ le̱ꞌ.
20 Caꞌan guca laweꞌ da quebe gulezéquene̱ꞌ xuluchaga lawe̱ꞌ ca naca da bdxixruj beꞌe Dios,
gunné̱ꞌ:
“Che tu béadauze guléajbaꞌ lu xiꞌa naꞌ,
dxal-laꞌ xelútie̱ꞌ-baꞌ nen xiaj u nen tu xia nalá xécheꞌze.”
21 Da naꞌ beleléꞌene̱ꞌ bchébele̱ꞌe̱ na le̱ꞌ,
naꞌ Moisés gunné̱ꞌ:
“Dxezrízeteaꞌ xel-laꞌ dxezrebe.”
22 Naꞌa leꞌe ba nabígale naga zua xiꞌa láꞌazxa da nazí le na Sión,
ne lu xe̱zre chee̱ Dios ban,
da naca na Jerusalén da zua xabáa,
ne naga zaj zraꞌ gázxue gázxue gubáz chee̱ xabáa,
23 ne naga zaj nazraga benneꞌ caꞌ gulaca bi chee̱ Dios nédxute̱,
benneꞌ caꞌ ba zaj naxúaj le̱ꞌ xabáa,
ne lau Dios,
Bénneaꞌ guchiꞌe̱ chee̱ xúgute̱ bénneache,
ne naga zaj zraꞌ beꞌ gulácaqueze benneꞌ caꞌ ba nun Dios le̱ꞌ li lazreꞌ,
24 ne lau Jesús,
Benneꞌ wedé dizraꞌ chee̱ xel-laꞌ wezría cube,
ne naga bzre̱ꞌe̱ dxen da dxuchalaj na da cháwedxa ca da bchalaj dxen chee̱ Abel.
25 Chee̱ le̱ naꞌ,
le guxúe xanneꞌ cuínale chee̱ quebe guzúale chaláꞌala Bénneaꞌ dxuchálajle̱ne̱ꞌ dxiꞌu.
Quebe belegache benneꞌ caꞌ buluzúe̱ꞌ chaláꞌala Dios gate naꞌ bchálajle̱ne̱ꞌ le̱ꞌ lu xe̱zr la xu nigá,
ne quebe gáchedxu dxiꞌu che guzúadxu chaláꞌala Bénneaꞌ dxuchálajle̱ne̱ꞌ dxiꞌu,
zue̱ꞌ xabáa.
26 Lu zra naꞌ gate gunná Dios,
naꞌ guzrúꞌ xe̱zr la xu nigá.
Naꞌa dxenné̱ꞌ:
“Xetú lásaze gunibaꞌ quegaze xe̱zr la xu nigá,
san cáꞌanqueze xabáa.”
27 Gate gunné̱ꞌ:
“Xetú lásaze”,
zéaje̱ na xecáꞌa Dios ca naca da dxeledá,
da caꞌ be̱ne̱ꞌ,
naꞌ xegáꞌana da quebe sequeꞌ nu gutá.
28 Dxal-laꞌ xe̱dxu Dios:
Xcalenuꞌ laweꞌ da gunne̱ꞌ dxiꞌu tu lataj naga dxenná bea Le̱ꞌ da quebe sequeꞌ nu gutá.
Dxal-laꞌ güe láꞌanadxu Dios du lázredxu ne dute̱ xel-laꞌ ba láꞌana,
ca da dxezaca ba lazre̱ꞌ,
29 laweꞌ da naca Dios chee̱dxu ca tu xiꞌ da guzría xi na da sban.