3 Le gusá lázrele gácale̱le benneꞌ zaj xuꞌe̱ lizre xia,

gun cuínale ca benneꞌ xúꞌuqueze lizre xia nen benneꞌ caꞌ.

Le gusá lázrele gácale̱le benneꞌ caꞌ dxeledée̱ꞌ xel-laꞌ ziꞌ,

gun cuínale ca benneꞌ dxeledéqueze̱ꞌ xel-laꞌ ziꞌ.

4 Xúgute̱le dxal-laꞌ gápale ba láꞌana xel-laꞌ wechaga naꞌ,

ne gunle da xlátaje̱ lu xel-laꞌ wechaga naꞌ chee̱le,

laweꞌ da guchiꞌa Dios chee̱ benneꞌ caꞌ dxuluzúe̱ꞌ chaláꞌala xel-laꞌ wechaga naꞌ chee̱ꞌ,

ne chee̱ benneꞌ caꞌ dxelune̱ꞌ da sban.

5 Quebe sa lázrele xel-laꞌ gunníꞌa.

Le xezaca ba lázrele ca da nápale laweꞌ da ba gunná Dios:

“Cabataꞌ gusanaꞌ lueꞌ,

ne quebe cueaj xíchajquezaꞌ lueꞌ.”

6 Caní naca,

du lázredxu waca nnadxu:

7 Le gusá lázrele gácale̱le benneꞌ caꞌ dxuluxúe̱ꞌ leꞌe,

ne dxuluchálajle̱ne̱ꞌ leꞌe dizraꞌ chee̱ Dios.

Le naꞌ xque ca da dxelúne̱ꞌ,

ne le chéajle̱ chee̱ Dios ca dxelún benneꞌ caꞌ.

8 Túzqueze ca naca Jesucristo neaje,

ne naꞌa zra,

ne chadía chacanna.

9 Quebe sile ca da dxuluchalaj benneꞌ dxulusé̱dene̱ꞌ da quebe naca na ca da naxúaj na lu xiche láꞌazxa chee̱ Dios.

Cháwedxa naca guzúa chuchu lázrdaudxu lu xel-laꞌ zriꞌi lazreꞌ chee̱ Dios,

ne quebe chéajle̱dxu da dxeledxixruj bea benneꞌ ca naca da dxal-laꞌ xiꞌaj gágudxu,

laweꞌ da benneꞌ caꞌ zjácale̱ne̱ꞌ da caꞌ cabataꞌ ne xelezíꞌ ba neza ne̱ chee̱ da caꞌ.

10 Bxruze judío caꞌ gulawe̱ꞌ béadu caꞌ belutie̱ꞌ lataj láꞌazxa.

Quebe zaj naca chee̱ꞌ xelawe̱ꞌ gunaꞌ da dxugúꞌudxu dxiꞌu chee̱ Dios.

11 Bxruze blau judío bzrie̱ꞌ dxen chee̱ béadu caꞌ lu lataj láꞌazxa blau ca tu gunaꞌ da dxegúa na dul-la.

Buluzezxe̱ꞌ da nagáꞌana chee̱ béadu caꞌ cúzrela xe̱zre.

12 Cáꞌanqueze gute Jesús cúzrela xe̱zre naꞌ chee̱ bcaꞌana chawe̱ꞌ bénneache ne̱ chee̱ dxen cheé̱queze̱ꞌ.

13 Le dxuaj,

gundxu tu zren Cristo,

lácala xuluzúa bénneache dxiꞌu chaláꞌala ca belune̱ꞌ chee̱ Le̱ꞌ.

14 Lu xe̱zr la xu nigá quebe de̱ chee̱dxu tu xe̱zre da súate̱queze.

Dxebézadxu tu da za zaꞌ.

15 Chee̱ le̱ naꞌ tu dxál-lazqueze güe láꞌanadxu Dios nen dxúꞌaquezdxu ne̱ chee̱ Jesucristo,

da naca na ca tu gunaꞌ da dxugúꞌudxu chee̱ Dios.

16 Dxal-laꞌ gusá lázredxu gundxu da xrlátaje,

ne bi gunézrujdxu chee̱ benneꞌ caꞌ quebe bi zaj nape̱ꞌ,

laweꞌ da dxezaca ba lazreꞌ Dios le̱ na.

17 Le guzúa dizraꞌ chee̱ benneꞌ caꞌ dxuluxúe̱ꞌ leꞌe,

ne le gun ca da dxelenné̱ꞌ.

Benneꞌ caní dxuluxúe̱ꞌ bénneꞌdu xuꞌule,

ne xuluxudée̱ꞌ lau Dios ca da zaj nune̱ꞌ.

Che gunle caní,

naꞌ benneꞌ caní welune̱ꞌ zrin chee̱ꞌ du lazre̱ꞌ,

ne quebe xelezúa xache̱ꞌ,

laweꞌ da che quebe gunle caní,

quebe bi da ba neza gaca na chee̱le.

18 Le naba lau Dios gaca chaweꞌ chee̱ntuꞌ.

Quebe bi zua lu lázrdauntuꞌ da dxagu na zria netuꞌ laweꞌ da dxun ziꞌ lázrentuꞌ guntuꞌ da xrlátaje ca naca xúgute̱ da dxuntuꞌ.

19 Dxenabaꞌ leꞌe nábale lau Dios gunne̱ꞌ nedaꞌ lataj xídazegaꞌ súale̱naꞌ leꞌe naga zúale.

20 Dxenabaꞌ lau Dios,

Bénneaꞌ dxunne̱ꞌ dxiꞌu xel-laꞌ dxebeza zri lazreꞌ,

ne bsebane̱ꞌ Xránadxu Jesucristo ládujla benneꞌ gate.

Lé̱queze̱ꞌ naque̱ꞌ Benneꞌ Blau Dxuxúe̱ꞌ Dxiꞌu,

nácadxu zrilaꞌ chee̱ꞌ,

naꞌ caní naque̱ꞌ laweꞌ da blalje̱ꞌ dxen chee̱ꞌ da bzua chuchu na xel-laꞌ wezría chadía chacanna da be̱ne̱ꞌ.

21 Dxenabaꞌ Dios gune̱ꞌ leꞌe li lazreꞌ chee̱ séquele gunle da xrlátaje ca da dxaca lazreꞌ Le̱ꞌ,

ne gune̱ꞌ chee̱ntuꞌ ca da dxaca lazre̱ꞌ ne̱ chee̱ Jesucristo.

¡Gaca ba Cristo chadía chacanna!

¡Caꞌan gaca na!

22 Leꞌe,

benneꞌ bíchaꞌdauꞌ,

dxataꞌ xuedaꞌ leꞌe gácale zren lazreꞌ ca naca dizraꞌ caní,

da dxulusizre na leꞌe,

naꞌ látega da du nigá dxuzúajaꞌ chee̱le.

23 Dxuzendaꞌ leꞌe ba bedxúaj bi bíchedxu Timoteo lizre xia,

ne che xeláꞌ zé̱ꞌe̱beꞌ,

naꞌ che̱ꞌa-beꞌ gate xedajnnáꞌa leꞌe.

24 Le gugapa diuzre xúgute̱ benneꞌ caꞌ dxuluchálajle̱ne̱ꞌ leꞌe dizraꞌ chee̱ Dios,

ne le gugapa diuzre xúgute̱ benneꞌ bíchedxu caꞌ.

Benneꞌ zaj zre̱ꞌe̱ xe̱zr la xu Italia nigá dxulugape̱ꞌ leꞌe diuzre.

25 Dxenabaꞌ lau Dios gune̱ꞌ da chaweꞌ chee̱ xúgute̱le leꞌe.

¡Caꞌan gaca na!