Quebe guchale ca gunle chee̱ tu tu benneꞌ
2
Benneꞌ bíchaꞌdauꞌ,
leꞌe dxéajle̱le chee̱ Xránadxu,
Benneꞌ xabáa Jesucristo,
quebe dxal-laꞌ guchale ca gunle chee̱ tu tu benneꞌ.
2 Che chuꞌu tu benneꞌ naga nazrágale,
ne nácue̱ꞌ zra lane̱ꞌ da zaca,
ne xuꞌu da naca na oro lu xrube ne̱ꞌe̱,
naꞌ cáꞌanqueze che chuꞌu tu benneꞌ xacheꞌ,
ne nácue̱ꞌ zra lane̱ꞌ tuzruj,
3 naꞌ che dxeléꞌele cháwedauꞌ bénneaꞌ nácue̱ꞌ zra lane̱ꞌ da zaca,
ne dxe̱le le̱ꞌ:
“Gudxeꞌe nigala naga nácadxa na chaweꞌ”,
naꞌ dxe̱le benneꞌ xacheꞌ naꞌ:
“Xeajsé̱ naꞌla,
u gudxeꞌe lu xu náꞌte̱ze.”
4 Che dxunle caní,
dxuchale ca dxunle chee̱ tu tu benneꞌ,
ne dxuchíꞌale ca zaj naca bénneache,
quebe naca xrlátaje xichaj lázrdaule.
5 Benneꞌ bíchaꞌdauꞌ nazriꞌite̱ lazraꞌ,
le xen da nigá:
Dios ba guqué̱ꞌe̱ benneꞌ caꞌ zaj naque̱ꞌ benneꞌ xacheꞌ lu xe̱zr la xu nigá chee̱ xelaque̱ꞌ benneꞌ gunníꞌa lu xel-laꞌ dxeajlí lazreꞌ,
ne chee̱ xelezíꞌ lu ne̱ꞌe̱ da nucueza Dios naga dxenná bea Le̱ꞌ,
da naꞌ guche̱be lazreꞌ Le̱ꞌ gunézruje̱ꞌ chee̱ benneꞌ caꞌ zaj nazriꞌine̱ꞌ Le̱ꞌ.
6 Leꞌe dxuzúale chaláꞌala benneꞌ xacheꞌ caꞌ.
¿Quegá benneꞌ gunníꞌa caꞌ benneꞌ dxuluchínene̱ꞌ leꞌe,
ne dxeleché̱ꞌe̱ leꞌe lau benneꞌ xulaweꞌ caꞌ?
7 ¿Quegá benneꞌ gunníꞌa caꞌ benneꞌ dxelenné̱ꞌ schanniꞌ chee̱ da xrlátaje ca nazíꞌ lale,
dxennale nácale bi chee̱ Cristo?
8 Che da li dxunle ca dxenná da nadxixruj beꞌe Dios,
da nácadxa blau ca da naxúaj na lu xiche láꞌazxa,
dxenná na:
Bzriꞌi biche ljwezruꞌ ca nazríꞌi cuinuꞌ,
xrlátaje dxunle.
9 Naꞌa che dxuchale ca dxunle chee̱ tu tu benneꞌ,
dul-la dxunle,
ne nabágale zria laweꞌ da quebe dxunle du ca bdxixruj beꞌe Dios.
10 Che tu benneꞌ dxune̱ꞌ ca zaj naca da nadxixruj beꞌe Dios,
san che dxenéguene̱ꞌ ca naca tuze da nadxixruj beꞌene̱ꞌ,
naca na cáte̱ze nabague̱ꞌ zria ca zaj naca xúgute̱ da nadxixruj beꞌe Dios.
11 Lé̱queze Dios gunné̱ꞌ:
“Quebe gunle dul-la da dxichaj na xrba chee̱ xel-laꞌ wechaga naꞌ”,
cáꞌanqueze gunné̱ꞌ:
“Quebe gútele benneꞌ.”
Caní naca,
che tu benneꞌ quebe dxune̱ꞌ dul-la da dxichaj na xrba chee̱ xel-laꞌ wechaga naꞌ,
san che dxutie̱ꞌ benneꞌ,
ba gunéguene̱ꞌ ca da nadxixruj beꞌe Dios.
12 Leꞌe dxal-laꞌ guchálajle,
ne gunle ca dxal-laꞌ xelún benneꞌ caꞌ guchiꞌa Dios ca da dxelune̱ꞌ,
benneꞌ caꞌ zaj nalá lu naꞌ da gunná bea Le̱ꞌ.
13 Benneꞌ caꞌ quebe dxelexexache lazre̱ꞌ chee̱ benneꞌ xula,
Dios guchiꞌe̱ ca da dxelún benneꞌ caꞌ,
ne quebe xexache lazre̱ꞌ chee̱ benneꞌ caꞌ,
san benneꞌ caꞌ dxelexexache lazre̱ꞌ chee̱ benneꞌ xula quebe bi zria xelebague̱ꞌ gate Dios guchiꞌe̱ ca da zaj nun benneꞌ caní.
Ca naca chee̱ xel-laꞌ dxeajlí lazreꞌ, ne chee̱ zrin dxundxu
14 Leꞌe,
benneꞌ bíchaꞌdauꞌ,
¿bizra culuén gapa na che tu benneꞌ dxenné̱ꞌ dxeajlí lazre̱ꞌ Cristo,
naꞌ quebe bi dxune̱ꞌ da dxácale̱n nu benneꞌ dxexázrjene̱ꞌ?
¿Wazequeꞌ xel-laꞌ dxeajlí lazreꞌ naꞌ guselá na le̱ꞌ?
15 Che zraꞌ benneꞌ bíchedxu u nuꞌula zandxu,
benneꞌ quebe bi zaj de̱ zra lane̱ꞌ u da xelawe̱ꞌ,
16 naꞌ che núlale leꞌe xe̱le benneꞌ caꞌ:
“Bexiajzé̱ cháwedauꞌ.
Nazréꞌenuꞌ,
ne gáguguꞌ szriꞌ”,
san che quebe bi gunézrujle ca da dxexázrjene̱ꞌ,
¿bizra culuén gapa da naꞌ gunnále?
17 Caní naca na chee̱ xel-laꞌ dxeajlí lazreꞌ.
Che quebe bi zaj de̱ da chaweꞌ da xululéꞌe na che dxeajlí lazreꞌ bénneaꞌ Cristo,
xel-laꞌ dxeajlí lazreꞌ chee̱ꞌ naca na ca tu da gate.
18 Wannalja nu benneꞌ:
Lueꞌ dxennáuꞌ dxéajle̱ꞌu chee̱ Cristo,
naꞌ nedaꞌ dxunaꞌ da chaweꞌ caꞌ.
Bleꞌe nedaꞌ dxéajle̱ꞌu chee̱ Cristo ne quebe dxunuꞌ da chaweꞌ caꞌ,
naꞌ nedaꞌ guléꞌedaꞌ lueꞌ dxeajlí lazraꞌ Cristo ne̱ chee̱ da chaweꞌ caꞌ da dxunaꞌ.
19 Dxéajle̱ꞌu lueꞌ zua tuze Dios.
Nácaqueze na caꞌ.
Cáꞌanqueze da xriwe̱ꞌ caꞌ dxeléajle̱ na,
ne dxelezrize na lu xel-laꞌ dxelezrebe.
20 Lueꞌ,
benneꞌ xala,
¿dxaca lazruꞌ guléꞌedaꞌ lueꞌ naca xel-laꞌ dxeajlí lazreꞌ ca tu da gate che nu benneꞌ dxeajlí lazre̱ꞌ Cristo naꞌ quebe bi zaj de̱ da chaweꞌ da xelunna bea na?
21 ¿Ájazra guca chee̱ xra xrtáudxu Abraham guque̱ꞌ benneꞌ xrlátaje̱ lau Dios?
Guca na ne̱ chee̱ da be̱ne̱ꞌ gate guxúe̱ꞌ zríꞌine̱ꞌ Isaac lu bdupa xiaj chee̱ guzezxe̱ꞌ-beꞌ.
22 ¿Quebe dxeleꞌenuꞌ?
Ca da be̱n Abraham dxuléꞌe na guxeajlí lazre̱ꞌ Dios,
naꞌ xel-laꞌ dxeajlí lazreꞌ chee̱ꞌ guca na du lazreꞌ ne̱ chee̱ da be̱ne̱ꞌ.
23 Caní guca li ca da dxenná na lu xiche láꞌazxa:
Abraham guxéajle̱ꞌe̱ chee̱ Dios,
naꞌ Dios bléꞌene̱ꞌ le̱ꞌ benneꞌ xrlátaje̱.
Naꞌ bchálaje̱ꞌ ca naca chee̱ Abraham,
gunné̱ꞌ:
“Bi zrágaquezaꞌ,
Abraham.”
24 Naꞌa dxeléꞌele Dios dxezíꞌ lu ne̱ꞌe̱ tu benneꞌ ne̱ chee̱ da chaweꞌ da dxune̱ꞌ,
ne quegá tuze laweꞌ da dxeajlí lazre̱ꞌ Le̱ꞌ.
25 Cáꞌanqueze guca chee̱ Rahab,
nuꞌula we̱n da sban.
Nuꞌula nigá guluꞌe̱ lizre̱ꞌ benneꞌ caꞌ gusel-la Josué,
naꞌ bsiꞌe̱ benneꞌ caꞌ neza xula chee̱ belelé̱ꞌ lu naꞌ benneꞌ caꞌ dxjaque̱ꞌ wedil-la,
naꞌ ne̱ chee̱ da be̱ne̱ꞌ,
Dios guzíꞌ lu ne̱ꞌe̱ nuꞌula naꞌ.
26 Ca naca chee̱ be̱laꞌ dxen chee̱dxu,
che ba bedxúaj beꞌ chee̱ na,
ba nate na,
cáꞌanqueze naca chee̱ xel-laꞌ dxeajlí lazreꞌ chee̱dxu.
Che quebe bi zaj de̱ da chaweꞌ da xululéꞌe na dxeajlí lazrdxu Cristo,
naca na ca tu da gate.